Lu-ka 23

1Luch kabhuh piđó yuur dyương, đââng Ađó tơk leq Phi-laat. 2Piđó tââp praaq kaauq Ađó, kơi ađô: “Nôôq yi lêi ađó ađô têêng pangôôk dhanuôr nôôq yi, kajơq pagoop jêên leq Xê-xa, lơq tư móón ađêi nek Chuôq Paq Manưih, chênh nek bhua.” 3Xók achêk, Phi-laat tamóh Ađó, kơi ađô: “Ve alua amei nek Bhua dhanuôr Jo Thaaiq eh?” Bơơi xók ââi ađó ađek, Chuôq móón: “Chênh amei móón kơi ađek.” 4Tatun ađek, Phi-laat móón palơq nôôq takóh kala kadhâng bhanuôih lơq ganơr manưih; “Aku kah rau lêi matu aak marau marâ dhiq manưih padruuih ađô.” 5Bơơi piđó bhiêk praaq mưi kơi móón kơi ađô: “Ađó paxuq manưih dhanuôr, truuih pachóóm plok luch xưưq Ju-đê, tarnââp tââq Ga-li-lê patơk mơ leq ađô.” 6Xók Phi-laat xâng kơi achêk, ađó tamóh Chuôq ve alua nek dhanuôr Ga-li-lê. 7Xók bâân n'nal kơi Chuôq tơơt raal kataai ưng Hê-rôôt, ađó ađek pajaau Chuôq lóóiq leq Hê-rôôt, chênh bhua kung xók tơơt dhiq Jê-ru-sa-leem kalóóng nôôq tangêi achêk.

8Xók Hê-rôôt lêi Chuôq Jê-su, ađó ađek yayar bhlơng taai ađó biêh ơi kiêng lum Chuôq tââq đươnh bhlơng, taai ơi xâng truuih leq Chuôq, hayơq ađó ađek rââm bâân lêi mataai chrih marau marâ bâân têêng tââq Chuôq. 9Hayơq nek, ađó ađek tamóh Chuôq leq bơk rau xayar, bơơi Chuôq kah ââi lóóiq ađó marau marâ. 10Dyơq nôôq takóh kala kadhâng bhanuôih lơq takóh pachóóm gani dyương dhiq ađek tabhlơng kaauq patu Ađó. 11Hayơq luch Hê-rôôt lơq nôôq linh ưng ađó ađek praaq kađiq Chuôq, lơq xong xók praaq paxê Chuôq, paxơp aau bhreh bhrel leq Chuôq, ađó ađek pagơơi taval Chuôq lóóiq leq Phi-laat. 12Xók achêk, tââq Hê-rôôt lơq Phi-laat ơi vil xar parjơơk xóng nhiđó kalóóng tangêi achêk, ơi laloom ađek xók ve vaaih rau tageet tamôôp bhlưa bơơr nhiđó ađek.

13Tatun ađek, xong xók Phi-laat đóng panhoom karong nôôq takóh kala kadhâng bhanuôih, nôôq kuôn gamak lơq dhanuôr, 14ađó móón palơq piđó: “Nôôq pe đââng tơk leq aku manưih padruuih ađô kơi manưih pangôôk dhanuôr, lơq lêi ađô, xong xók tamóh ađó ađek toom mat nôôq pe, aku kah rau lêi kalóóng ađó ađô matu aak đu nôôq pe xók kaauq jơl lóóiq ađó ađek. 15Bơơi eh rau chapiên kơi ađek, Hê-rôôt kung kah rau lêi, taai bhua ơi pajaau ađó ađek lóóiq leq nôôq yi, lơq lêi aq, kah ve rau ơi bâân têêng taai ađó ađek nek đaang chêt. 16Taai kơi ađek, xong xók m'bhiiq ađó, aku e paloh.” 17[Kơi lââng, leq dyóp ganah bhiêk, ađó ve praaq hươq phaai paloh mưi manưih matu leq piđó.] 18Bơơi piđó markơi mandrươh bóóp lalơu karơ, kơi ađô: “Phaai yông ađó, lơq paloh Ba-ra-ba đóng nôôq yi!” 19(Manưih ađô bâân takról dhiq đong kanam ơi ting têêng mưi chu panhôôn panhaauq achêk vaaih dhiq kalóóng kanóón bơk manưih lơq ơi matu leng manưih.) 20Xók achêk, Phi-laat praaq tamóh piđó machu dyơq, taai kiêng paloh Chuôq Jê-su. 21Bơơi piđó dhaloong lalơu kơi ađô: “Nek teeng đinh! Teeng đinh ađó dhiq n'lóóng bang chatông!” 22Hayơq ađó ađek móón palơq piđó chu đu pe: “Ơi hau rau aak đu manưih ađô ơi têêng? Aku kah rau lêi matu aak rau chóóm chêt dhiq ađó ađek. Hayơq kơi ađek, xók m'bhiiq xong, aku e paloh ađó ađek.” 23Bơơi piđó bhiêk karơ dhariêng kah tadhơ nhan Ađó phaai bâân tateeng đinh, lơq dhariêng ưng piđó ơi jươi lơh. 24Phi-laat ơi pakah praaq xêi đóng rau nhan ưng piđó bâân tatêêng. 25Xók achêk, ađó paloh manưih bâân takról kalóóng đong kanam taai matu panhuh nhôôn nhaauq lơq leng manưih, nek manưih đu piđó ơi nhan, bơơi ađó ađek pajaau Chuôq Jê-su ting karnóq piđó.

26Xók palââng đââng Chuôq vôôiq, taai ơi kóóp kayua Si-môôn, mưi manưih Si-reen achêk, tơk tââq bhươl kanóón, hayơq piđó tabóq n'lóóng baang chatông leq ađó achêk đóng đơơq ting tapun Chuôq Jê-su.

27Mưi tanóói dhanuôr bơk bhlơng ting tapun Chuôq, lơq nôôq manưih pađiil nhiim kalau leq Ađó. 28Bơơi xók palâh lêi piđó, Chuôq Jê-su praaq: “Akóón pađiil Jê-ru-sa-leem ơơi, óóq nhiim taai aku, bơơi nek, phaai nhiim taai chênh ađêi lơq taai akóón anaaq nôôq pe. 29Ơi lêi nô, nôôq tangêi ravang tơk, hơq kalóóng nôôq tangêi ađek, palââng e móón: ‘Phươk đóng pađiil kah pabhaq, lơq luônh kah makóón, lơq toh kah đóng mam.’ 30Xók achêk, palââng e tââp móón palơq nôôq bôôl dhơl, ‘Hakơh katơq nôôq yi,’ lơq palơq nôôq bôôl yaal, ‘Nek buur tơp nôôq yi.’ 31Ơi la palââng têêng kơi ađek dhiq n'lóóng dyơq taviêng, nek hau tarnêêng vaaih dhiq n'lóóng rang?”

32Xók achêk, bơơr nak matu lââng kung bâân takóóp đââng đóng đơơp leng madhiq palơq Ađó.

33Xók piđó vôôiq tơk leq dham nek bâân đóók “Paliing Akoq,” nek piđó teeng đinh Ađó dhiq ađek, palơq bơơr chanak matu lơt — mưi nak hót atươm dyơq mưi nak hót ađaai. 34Hayơq piđó padhơơch nh'xóóng xóng piđó aau ưng Chuôq. 35Manưih dhanuôr dyương dhiq ađek ting đương lêi, hayơq kabhuh đu kadhâng koq dhanuôr nek praaq paxê Ađó, kơi ađô: “Ađó ơi paq manưih đu lââng, nek tư paq ađêi kala, la kơi ađó nek Yaang Paq Manưih ưng Yaang Pleng, Yaang bâân Ađó chââih.” 36Kabhuh linh kung praaq paxê Ađó, vôôiq pađan pađơơp đơơk kadyuôq leq Ađó, 37hayơq móón: “La amei nek Bhua dhanuôr Jo Thaaiq nek mơq tư paq ađêi kala.” 38Hót piing Ađó kung ve mưi kalơng chư: “Ađô nek Bhua dhanuôr Jo Thaaiq.”

39Mưi nak kalóóng bơơr nak manưih matu xók pâng tayông kung praaq paxê Ađó, kơi ađô: “Amei eh dhơq Chuôq Paq Manưih alua? Phaai tư paq ađêi kala lơq nôôq yi dyơq.” 40Bơơi xók ââi lóóiq, manưih matu tôôh trêh ađó, ađó ađek móón: “Amei dyơq kah n'nal kakhin Yaang Pleng xók amei ting đơơp palơq mưi phanaak alua? 41Dhơ bơơr nhang kơi ađô nek pâng, taai bơơr nhang xók đơơp lóóiq rau ađaang palơq tarnêêng ađêi ơi têêng, bơơi manưih ađô kah têêng marau marâ lơt.” 42Lơq ađó ađek móón: “Thêi Jê-su, xók thêi mót leq kalóóng katiêk amei, nhan hei tơk aku.” 43Chuôq móón ađó: “Alua, aku móón palơq amei mađôk amei e bâân tơơt palơq aku kalóóng Ba-ra-đi.”

44Xók achêk nek leq meen jơ đu chapat vaq, hơq kanam kanheet blo dhuum klum plok xưưq đóng tơk jơ đu takiêh. 45Mat tangêi nek yuur kanam. Hayơq bhaai yoong kalóóng đong bhanuôih bâân taheek têêng bơơr. 46Xong xók lalơu karơ dhariêng, Chuôq Jê-su móón: “Kakoh Ama, Akóón pajaau ravaai Akóón kalóóng têi Ama.” Tatun ađek, xók praaq luch paraaq ađô, Ađó pat parhââm xariêq. 47Xók achêk, xong xók linh têêng koq lêi tarnêêng ơi vaaih, ađó bhi haanh Yaang Pleng, kơi ađô: “Manưih ađô lalua nek bhơt liêm.” 48Xók luch tanóói manưih bơk karong madhiq taai tarnêêng leng manưih ađô ting lêi rau dhơơm ơi vaaih, nek piđó tơm tadhưa xooq chô. 49Dyơq paluch nôôq ngaai n'nal Ađó palơq nôôq manưih pađiil ting tapun Ađó tââq Ga-li-lê, piđó biêh ơi dyương tââq changaai đương lêi nôôq chiên achêk.

50Tôôh, mưi nak achak Jô-seep, nek mưi nak kalóóng kabhuh takóh xêi xanêi, nek manưih ve lóóm nh'nhơr lơq bhơt liêm, 51(Ađó biêh ơi kah markơi karnóq palơq nôôq kabhuh takóh lơq tarnêêng têêng ưng piđó) ađó gluh tââq A-ri-ma-thê, mưi kanóón ưng manưih Jo Thaaiq, nek ađó xók đương rââm katiêk ưng Yaang Pleng. 52Xók vôôiq lum Phi-laat, chênh ađó ơi nhan xaak Chuôq Jê-su. 53Lơq xong xók padhaluônh xaak Chuôq dhuônh, ađó raleng xaak palơq bhaai mahaak, lơq tơp Chuôq kalóóng mưi đong ping bâân têêng kalóóng dhơl, dhiq dham kah ơi ve ngaai glêh tatơp. 54Tangêi ađek nek tangêi Ravang, lơq tangêi Sa-baat ravang tơk. 55Xók achêk, nôôq adhi anó pađiil, nek nôôq manưih ơi buôn ting vôôiq palơq Chuôq tââq Ga-li-lê, xók vôôiq ting tapun hót hóng, piđó chalaang lêi ping lơq kơi xaak Chuôq bâân tabêch. 56Hayơq xók ơi val chô, piđó ravang janươu lơq dhơu thum.

Tơk tangêi Sa-baat, piđó dhêi drơq ting kơi gani.