Ja-kơ 5

1Hayơq bhêêl ađô, phaai chamet lêi nô, nôôq manưih karvaan tôôh, phaai nhiim griit lơq dhaloong lalơu taai rau jarnah xaryô ưng nôôq pe xók bhral. 2Drươp karvaan nôôq pe bâân khung kluuiq, hayơq kun aau nôôq pe val xar chana đóng kóót kamuôr. 3Vaang lơq baak ưng nôôq pe bâân laq parhóm, lơq rau ateet aróóq ưng piđó e nek karnal jaklâk lóóiq nôôq pe, lơq ađó e cha lâân achak araang nôôq pe thê kơi óih. Nôôq pe ơi kaboq karong drươp karvaan ađêi kalóóng nôôq tangêi tatun xariêq. 4Phaai lêi tôôh, jêên makông ưng nôôq manưih têêng makông, hơq nek nôôq manưih chaxóót dhiq nôôq kalung klung ưng nôôq pe, jêên achêk ơi bâân kadhâng lóóiq dhiq nôôq pe, ađó dyơq yuur dhaloong lalơu, lơq nôôq dhariêng nhiim kalau ưng nôôq manưih chaxóót achêk ơi tơk hót katór Chuôq nôôq kabhuh linh. 5Nôôq pe ơi mamông laq lôh lơq rathaai dhiq katiêk. Nôôq pe ơi paramaq lóóm ađêi đóng tangêi leng adhah. 6Nôôq pe ơi patu lơq leng chêt manưih bhơt liêm, manưih achêk kah jaklâk jơl lóóiq nôôq pe.

7Taai kơi ađek, nhan móón adhi anó, phaai raan jruôn patơk xók Chuôq bhral. Lêi tôôh, manưih têêng hare đương lêi pô pale kiiq bhlơng tââq katiêk, raan jruôn đương lêi ađó patơk bhêêl katiêk bâân đơơp bó tanââp nil lơq parluch nil. 8Adhi anó kung phaai đơơp jruôn. Phaai têêng đóng mưng lóóm ađêi taai rau tơk tabhral ưng Chuôq ơi ađan. 9Adhi anó ơơi, óóq ta-uôr jaklâk jơl xóng ađêi, đóng adhi anó óóq bâân xêi lơt. Lêi tôôh, Takóh Praaq Xêi dyơq dyương dhiq palóng. 10Nhan móón adhi anó, phaai ngil xamil leq rau đơơp jarnah lơq đơơp jruôn ưng nôôq manưih đââng paraaq Yaang Pleng, nôôq manưih vơn achak Chuôq truuih pachóóm. 11Lêi nô, nôôq he đóók nôôq manưih mưng karnóq nek “ve phươk”. Adhi anó ơi xâng leq praan đuôh đơơp jruôn ưng Joop, lơq adhi anó ơi lêi karnóq kiêng ưng Chuôq, taai Chuôq kavaan lóóm ayô ka-er, lơq lóóm dha-iiq.

12Bơơi, laloom tââm, nhan móón adhi anó ưng aku, óóq ng'kóh, kung óóq chaleq pleng hamôôiq chaleq katiêk môôiq dhơ dharau paraaq ng'kóh rau lââng. Bơơi, “ve” hơq phaai nek móón “ve”, lơq “kah” nek móón “kah”, đóng adhi anó óóq bâân jaluq mót dhiq praaq xêi matu lơt.

13Ngaai manưih kalóóng adhi anó dyơq đơơp jarnah kơi? Manưih achêk phaai gavơh nhan. Ve ngaai bhuui marhaal kơi? Manưih achêk phaai babóóch haanh. 14Ngaai manưih kalóóng adhi anó dhuôr ka-ai kơi? Manưih achêk phaai kayua nôôq takóh taha kalóóng akóón dhơn Chuôq vôôiq lơq kalóóng achak ưng Chuôq, piđó phaai gavơh nhan klóóih đóng ađó, xut dhơu đóng ađó. 15Paraaq gavơh nhan ưng lóóm huuiq e paq jóói manưih dhuôr ka-ai lơq Chuôq e tơq manưih achêk yuur. La manưih ađô ve kơi ơi têêng lơt, hơq manưih achêk e bâân lơơi lơt. 16Kơi achêk, phaai truuih matu lơt palơq xóng ađêi lơq gavơh nhan đóng xóng ađêi đóng adhi anó ve chóóm bâân payươh. Paraaq gavơh nhan ưng manưih bhơt liêm xók bâân têêng vôôiq hơq lóng tiêng bhlơng. 17Ê-li nek mưi akóón manưih đơơp lóóm karnóq bhuui ranguôq dhiêp kơi nôôq he. Lơq ađó gavơh nhan palơq kơi bhơt lóóm nhan đóng pleng óóq bó, hơq pleng kah bó kalóóng xưưq bhluuch pe kamó chapat kaxe. 18Hayơq Ê-li val gavơh nhan, hơq pleng n'toh bó, lơq katiêk avaaih chanoh chabet.

19Nhan móón adhi anó ưng aku, la ngaai manưih kalóóng adhi anó vôôiq xraang tââq paraaq dhalam, lơq ve ngaai ađek đââng manưih achêk val chô, 20nek phaai n'nal kơi ngaai palâh charhóóng manưih ve matu lơt gluh tââq kalơng lơt xraang ưng ađó, manưih ađek e trôông paq ravaai manưih achêk tââq akan chêt, lơq nek pađơp buur bơk rau matu lơt.