Skip to content
BibleKenya

Katu Bible Literal Text

Ja-kơ 4

Nôôq ganơt tarkaai tarlak bhral tââq n'đó dhiq lơq nôôq rau tarjeng tarvei gluh vaaih n'tââq m'pơng adhi anó? Eh dhơq piđó gluh vaaih tââq nôôq lóóm malóóch ưng adhi anó, nek rau bhiêk dyơq tarjeng tarvei m'pơng nôôq achak araang ưng adhi anó kơi? Adhi anó malóóch kiêng hơq kah ve bâân, adhi anó leng manưih. Adhi anó n'thaam malóóch, hơq kah kơi chóóm bâân, adhi anó tarjeng lơq tarleng. Adhi anó kah ve taai adhi anó kah nhan. Adhi anó nhan hơq kah bâân đơơp taai adhi anó nhan kơi rau lơt, lơơi ramuôh đóng nôôq lóóm malóóch n'thaam ưng ađêi. Nôôq manưih têêng tapiing tôôh! Adhi anó kah n'nal kơi tarnêêng têêng parjơơk palơq manưih hóng katiêk nek brau tarjơl palơq Yaang Pleng kơi? Hayơq, la ngaai kiêng têêng parjơơk palơq manưih hóng katiêk, nek manưih ađek bâân patơơt dhiq tanơơt manưih brau ưng Yaang Pleng. Môôiq adhi anó ngóq kơi Bha-aar Paraaq Yaang Pleng praaq kah malơơi: “Yaang Liêm đu Ađó têêng mamông kalóóng nôôq he, Yaang achêk kiêng nh'nhơr nôôq he patơk mơ tatrô”? Dhơ kơi ađek, Ađó đââng đóng ơơn phươk liêm gamak lơh, hayơq Bha-aar Paraaq Yaang Pleng móón: “Yaang Pleng jaklâk lóóiq manưih praaq laach, bơơi Ađó đóng ơơn phươk liêm leq manưih pa-êêp lóóm.” Taai kơi ađek, phaai huuiq xâng bóóp Yaang Pleng. Bơơi phaai jaklâk abhưi abhóch, hayơq ađó e viêr changaai tââq adhi anó. Phaai tơk pađan Yaang Pleng, lơq Ađó e tơk đan adhi anó. Nôôq manưih têêng lơt, phaai têêng pasek têi ađêi; nôôq ngaai bơơr lóóm, phaai kajut pasek lóóm ađêi. Phaai ranguôq luônh lóóm, nhiim kalau lơq xaxih kagôh! Phaai raxal dhariêng kachang ưng adhi anó xar dhariêng nhiim, lơq raxal bhuui bhe vaaih ranguôq rabaang. Phaai tư pa-êêp ađêi toom mat Chuôq, hayơq Ađó e tơq adhi anó yuur.

Nhan móón adhi anó, óóq praaq tamôôp xóng ađêi. Manưih praaq tamôôp adhi anó môôiq praaq xêi adhi anó ađêi nek praaq tamôôp gani lơq praaq xêi lơt gani. Bơơi la amei xêi lơt gani hơq amei eh rau nek manưih ting huuiq đuui gani, hơq nek manưih xêi xanêi. Yaang đóng gani lơq xêi lơt nek mưi giêl, nek Yaang têêng kala paq jóói lơq leng kaxiêt. Hayơq amei nek ngaai, manưih xêi matu lơt manưih dharing tapóóng ađêi?

Xók ađôk, phaai xâng nô, nôôq manưih xók praaq kơi ađô: “Vaar ađôk hamôôiq tangêi rayiiu nôôq yi nek vôôiq tơk kanóón tôôh, hayơq e têêng tarnêêng dhiq ađek mưi kamó, buôn baan lơq bâân kavaan.” Nek nôôq manưih kah bâân n'nal chiên tangêi rayiiu, parmông ưng adhi anó nek hau rau? Taai adhi anó nek huôl đơơk avaaih kalóóng maxưưiq hayơq bâân huôl bil tich. Klóóih dhiq ađek, adhi anó phaai móón: “La Chuôq kiêng, hơq nôôq yi e mamông lơq e têêng tarnêêng ađô hamôôiq tarnêêng tôôh.” Bơơi, adhi anó xók ađôk dyơq parlaach dhiq karnóq pakah pajơơr ưng ađêi. Dyóp tarnêêng pajơơr kơi ađek nek môôp lơt. Hayơq, ngaai manưih n'nal rau liêm kiêng têêng hơq val kah têêng, hơq manưih achêk ve matu lơt.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.