1 Phi-e-rơ 1

1Phi-e-rơ, sưưq-đô ưng Jê-su Chuôq Paq Manưih, pagơơi đóng nôôq manưih bâân chââih m'pơng nôôq dhanuôr tarbóq tachêh plok dyóp leq dhiq xưưq Bông, Ga-la-ti, Kaap-ba-đôk, A-si, lơq Bi-thi-ni, 2ting rau n'nal laloom ưng Yaang Pleng, nek Ama, tââq rau pantua ưng Yaang Liêm đóng rau huuiq bóóp lơq rau havươch ahaam ưng Jê-su Chuôq Paq Manưih. Rââm nhan ơơn Phươk Liêm lơq yươq rauha bâân pagrơơt kơơq xưa raai dhiq adhi anó.

3Đaang babóóch haanh alua Yaang Pleng lơq Ama ưng Chuôq nôôq he, nek Jê-su Chuôq Paq Manưih, Yaang ting mơ lóóm ayô ka-er gamak garóóq ưng Ađó, ơi n'niên lóóiq nôôq he mót kalóóng lóóm parââm mamông ve tââq mamông lóóiq ưng Jê-su Chuôq Paq Manưih tââq akan chêt, 4malóóm leq mưi drươp karvaan kah hư bil, kah khung anhuq, lơq kah laq gluui, ơi bâân jư lêi m'piing pleng đóng adhi anó, 5nek koom đóng nôôq manưih ve lóóm huuiq, bâân jư lêi tââq mataai raman Yaang Pleng đóng rau trôông paq, nek rau bhơt lóóm đóng bâân gluh pakah kalóóng ganah tatun xariêq. 6Ve kơi ađek, adhi anó lóng bhuui marhaal, dhơ đóng xók bhêêl ađôk kiêng phaai đơơp ranguôq rabaang maxưưiq kalóóng dyóp kơi klêêu lêi 7buôn đóng rau móón alua leq lóóm huuiq ưng adhi anó, rau kiiq liêm lơh vaang nek rau chóóm bhriq lêêk, bơơi dyơq đơơp klêêu lêi palơq óih, ve chóóm bâân đơơp n'nal đóng đââng tơk rau bhi haanh, cha-iil tabah lơq bhi chap kalóóng rau gluh tabhral ưng Jê-su Chuôq Paq Manưih. 8Yaang đu adhi anó nh'nhơr kiêng dhơ kah lêi, Xók ađôk, dhơ kah lêi Ađó bơơi taai huuiq ganơơm dhiq Ađó, palơq lóóm bhuui adhi anó yayar tatơq kah mơ móón, lơq bâân bing bhlaai cha-iil tabah, 9pei đơơp machak maraang tââq lóóm huuiq ưng adhi anó, ađek nek rau paq jóói ravaai. 10Nôôq manưih đââng taruuih ơi tabâân n'nal lơq chamet lêi giit bhlơng leq rau paq jóói ađôk, ađek nek nôôq manưih ơi loom praaq leq ơơn phươk liêm koom đóng adhi anó, 11xók tabâân n'nal leq ngaai manưih môôiq n'đó xók hơq Yaang Liêm ưng Chuôq Paq Manưih kalóóng piđó biêh ơi pakah, đóng n'nal laloom leq rau jarnah xarngaat ưng Chuôq Paq Manưih lơq rau cha-iil tabah lơh nôôq tarnêêng achêk. 12Rau ơi bâân pakah đóng piđó, ađek nek piđó biêh kah têêng yaauq đóng chênh ađêi, bơơi đóng adhi anó, leq nôôq rau đu xók ađôk ơi bâân truuih praaq đóng adhi anó tââq nôôq manưih truuih pachóóm Taruuih Liêm đóng adhi anó tââq Chuôq Yaang Liêm bâân kayua tââq pleng, palơq nôôq rau ađek, nôôq dhơn pleng rââm kiêng chalang lêi.

13Taai kơi achêk, palơq kơi ravang ravưa lóóm karnóq adhi anó kơi ngóq xeet tarveng, jư bhriêl maaih. Phaai patơơt tabhơt parââm leq ơơn phươk liêm bâân đââng tơk đóng adhi anó kalóóng rau gluh tabhral ưng Jê-su Chuôq Paq Manưih. 14Kơi akóón anaaq n'nal huuiq bóóp, kah patui ting nôôq lóóm malóóch n'loom ahei kalóóng rau kađiq bhalưưk ưng adhi anó, 15Palâh lóóiq, dhiêp kơi Yaang ơi tađaang dhaloong adhi anó nek sek liêm, chênh adhi anó kung phaai chóóm vaaih sek liêm kalóóng dyóp rau kơi tơơt cha ưng ađêi. 16Taai ve paraaq xaraq: “Nôôq akóón e vaaih tabah liêm taai Aku nek tabah liêm.” 17Lơq la adhi anó đóók Yaang praaq xêi kơi kah paq katơq ting kơi tarnêêng ưng dyóp ngaai nek “Ama” hơq phaai mamông palơq lóóm bhi kakhin kalóóng ganah tơơt pađơ ưng ađêi. 18Taai n'nal kơi eh rau ganơơm nôôq rau ve chóóm hư bil kơi baak hamôôiq vaang đu adhi anó ơi bâân paq gluh tââq parmông kah machak ưng ađêi tââq akonh abhươp truuih lóóiq, 19bơơi nek ve ahaam kiiq ưng Chuôq Paq Manưih, kơi trưưu akóón kah madham madhôôn lơq kah anhuq, 20ơi bâân chââih xók kah ơi tavaaih pleng katiêk, bơơi bâân gluh pakah kalóóng ganah tatun xariêq ađôk ơi taai adhi anó, 21nek nôôq manưih ve Ađó huuiq dhiq Yaang Pleng, Yaang ơi payuur Ađó mamông lóóiq tââq akan chêt lơq đóng cha-iil tabah leq Ađó, đóng lóóm huuiq lơq lóóm parââm ưng adhi anó tơơt kalóóng Yaang Pleng. 22Xók ơi kajut pasek ravaai ađêi ve rau xâng huuiq paraaq dhalam, malóóm tơk tanhơr adhi anó lalua, adhi anó phaai tanhơr xóng ađêi kơi bhơt lóóm palơq lóóm bhóók sek, 23taai ơi bâân n'niên lóóiq, eh rau tââq m'ma chóóm khung nh'xoq, bơơi tââq m'ma kah chóóm khung nh'xoq, ve paraaq taluôn mamông lơq chaq ching ưng Yaang Pleng. 24Ơi taai: “Dyóp manưih ti thê kơi bhơơi, lơq dyóp cha-iil tabah ưng ađó thê kơi pô bhơơi. Bhơơi rang, lơq pô rung, 25bơơi paraaq Chuôq dyơq tơk nh'chró.”

Ađek nek Taruuih Liêm ơi bâân truuih praaq đóng adhi anó.