Skip to content
BibleKenya

Katu Bible Literal Text

1 Phi-e-rơ 2

Kơi ađek hơq, xók ơi m'peq lơơi dyóp rau môôp aak, dyóp rau galơơk chachââr lơq lóóm kanóq galơơk, rau makhinh palơq dyóp paraaq praaq uôr, kơi nôôq paniên par-aang, phaai rahaal đơơk toh tââq pleng sek tabah, đóng ve ađek adhi anó ve chóóm bâân têêng đóng grơơt gamak đóng tơk rau paq jóói, la adhi anó ơi bâân n'nal kơi Chuôq moor liêm, xók tơk đan palơq Ađó, nek bhangôh dhơl mamông, ơi bâân akóón manưih m'peq lơơi, bơơi val nek rau chââih lưa kiiq liêm toom mat Yaang Pleng, lơq chênh adhi anó, thê kơi nôôq kaliêng dhơl mamông, dyơq bâân yuur têêng xar dhanong đong lóóm huuiq, koom đóng tarnêêng manưih kadhâng bhanuôih tabah liêm đóng tapôông adhah bhanuôih lóóm huuiq iêm lóóm Yaang Pleng, tââq Jê-su Chuôq Paq Manưih. Hayơq, nôôq paraaq ađô ve xaraq kalóóng Bha-aar Yaang Pleng: “Lêi nô, Aku patơơt dhiq Si-ôôn mưi kaliêng dhơl n'tól, bâân chââih lưa, lóng akiiq bhlơng. Lơq ngaai huuiq dhiq Ađó alua dhakơi kah bâân kachiit mat.”

Taai kơi ađek, rau bhi chap achêk koom đóng adhi anó nek nôôq manưih huuiq. Dyơq palơq nôôq manưih kah huuiq:

“kaliêng dhơl đu nôôq manưih têêng m'peq lơơi,

dhơl achêk ơi bâân val xar dhơl liêm n'tól đong”

lơq

nek “Kaliêng dhơl têêng n'đóih dyung, dharaaq dhơl têêng đóng m'bhuôh kalơm.”

Piđó n'đóih kalơm taai kah ting huuiq paraaq Chuôq, hơq leq chiên ađôk piđó kung ơi bâân loom kanóq aq. Bơơi adhi anó nek dhong nooi bâân chââih lưa, nek tarnêêng kadhâng bhanuôih đong Bhua, nek dhanuôr manưih tabah sek, mưi dhanuôr chô kala đơơp đươi ưng Yaang Pleng, đóng adhi anó truuih đuui nôôq tarnêêng chrih laaq ưng Yaang ơi dhaloong adhi anó gluh tââq bóng kanam mót kalóóng taklaaq brương liêm kra ưng Ađó,

hơq adhi anó n'loom ahei “eh rau nek mưi dhanuôr,”

bơơi ađôk nek “dhanuôr ưng Yaang Pleng;”

nek nôôq manưih ơi “kah bâân ayô ka-er,”

hơq ađôk ơi “bâân ayô ka-er.”

Adhi anó bơk nh'nhơr, aku yayeen pahêêl adhi anó, kơi nôôq dhanuôr tarbóq lơq tamóói tơơt pađơ, phaai róch changaai nôôq marlóóch kiêng manưih ti, nek rau tarvei tarleng tarjơl palơq ravaai adhi anó, xók jư kơi tơơt cha ưng adhi anó đóng tapat liêm dhiq m'pơng nôôq manưih katiêk lââng, đóng hayơq, kalóóng haurau palââng praaq tamôôp leq adhi anó kơi nôôq manưih têêng aak, nek tââq yaam lêi nôôq tarnêêng liêm ưng adhi anó, piđó ve chóóm bhi haanh Yaang Pleng kalóóng tangêi Ađó vôôiq tham.

Ơi taai Chuôq, phaai huuiq bhi dyóp rau kala xanêi akóón manưih, ve n'jau ađek nek bhua kơi manưih kadhâng akoq bhơt gamak, hamôôiq nôôq kuôn têêng gamak, kơi nôôq manưih bâân bhua kayua đââng tơk rau phaak janah manưih têêng aak lơq rau chaner haanh manưih têêng liêm. Taai ađôk nek karnóq kiêng ưng Yaang Pleng: têêng tarnêêng liêm lơơi têêng đóng nôôq akóón manưih ngôôk abhôh bóóp paraaq kah n'nal rarau phaai kabip bóóp, kalóóng lóóm kanóq kơi nôôq manưih rathaai, lơq kah đươi rau rathaai ưng ađêi kơi bhaai pađơp đóng tarnêêng aak, bơơi kơi nôôq dhơn ratơơq ưng Yaang Pleng. Phaai bhi chap dyóp ngaai. Phaai nh'nhơr adhi anó ađêi. Phaai bhi kakhin Yaang Pleng. Phaai bhi chap bhua.

Nô nôôq adhi anó têêng dhơn ratơơq, phaai huuiq bhi kala ađêi palơq tabhơt lóóm bhi chap, eh rau chapiên manưih kala kre lơq moor dha-iiq, bơơi dyơq manưih kala ngaang kek dyơq. Ơi la ngaai đơơp jruôn ka-ai jarnah kalóóng xók n'nal kơi rau kah kre taai tââq lóóm kanóq malóóm leq Yaang Pleng, ađek nek mưi ơơn phươk. Ve rau tarhơơnh la têêng lơt hayơq adhi anó phaai đơơp bâân m'bhiiq m'bhah? Bơơi la têêng liêm hayơq adhi anó phaai đơơp n'nal kơi jarnah xarngaat hơq ađek nek mưi ơơn phươk toom mat Yaang Pleng. Taai adhi anó ơi bâân tađaang dhaloong đóng rau achêk, tââq Chuôq Paq Manưih kung ơi đơơp jarnah klóóih adhi anó, lơơi lóóiq mưi xamil đóng adhi anó buôn đóng adhi anó ve chóóm ting đuui jađaang dyung Ađó.

“Yaang kah têêng matu lơt,

kung kah ve paraaq galơơk chachââr n'đó bâân lêi dhiq bóóp Ađó”;

nek Yaang xók bâân teng praaq, Ađó yươq teng praaq lóóiq. Xók đơơp jarnah, Ađó yươq gaam pakhin, bơơi Ađó pajaau Ađêi đóng Yaang praaq xêi bhơt liêm. Chênh Yaang achêk ơi gưi matu lơt nôôq he kalóóng achak araang Ađó dyók n'lóóng chatông, đóng lơh xók ơi chêt palơq matu lơt, nôôq he ve chóóm mamông đóng rau bhơt liêm, ve nôôq bhrê hư ưng Ađó hơq adhi anó ơi bâân payươh yươh. Taai adhi anó biêh kơi trưưu vôôiq xraang, bơơi đôk adhi anó ơi bâân val chô palơq Yaang jư trưưu lơq Chanak Takóh Jư Lêi ưng ravaai ađêi.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.