Skip to content
BibleKenya

Katu Bible Literal Text

Ja-kơ 2

Nhan móón adhi anó ưng aku, óóq jư lóóm huuiq dhiq Chuôq nôôq he, nek Jê-su Chuôq Paq Manưih cha-iil tabah, palơq rau mahóng malóóm. Ơi parja mưi manưih póón panóón vaang palơq kun aau liêm kra mót kalóóng đong gươl ưng adhi anó, hơq mưi chanak manưih ngeeo palơq kun aau tagêi ramang kung mót dyơq, bơơi adhi anó chamet lêi leq manưih xơp n'đóh kun aau liêm kra lơq móón: “Nhan abhươp tơơt dhiq tanơơt charnap ađô!”, lơq palơq manưih ngeeo, adhi anó móón “Amei dyương dhiq tôôh!”, môôiq “Phaai tơơt tóór jaruh dyung aku!”, hơq eh dhơq adhi anó ơi pantua tơơt praaq dhiq m'pơng chênh nôôq adhi anó lơq xar kơi manưih praaq xêi xanêi palơq nôôq karnóq môôp lơt kơi? Nhan móón adhi anó bơk nh'nhơr ưng aku, phaai tameng xâng: Eh dhơq Yaang Pleng ơi chââih manưih ngeeo ha-ul kalóóng manưih hóng katiêk đóng xar kơi manưih karvaan kabhôôq kalóóng lóóm huuiq lơq manưih bâân đơơp katiêk karuung đu Ađó ơi hươq palơq ngaai nôôq nh'nhơr Ađó kơi? Kơi ađek hơq adhi anó ơi praaq tamôôp manưih ngeeo! Eh dhơq manưih karvaan buôn chanaaq janah adhi anó lơq piđó buôn galôôi adhi anó leq đong xêi xanêi kơi? Eh dhơq piđó buôn praaq tamôôp achak bhi chap ơi bâân tabóq leq adhi anó kơi? Dhơ kơi ađek, la adhi anó têêng liêm dyóp gani ưng Bhua ting kơi Bha-aar Paraaq Yaang Pleng: “Phaai nh'nhơr ayô manưih dharing tapóóng ađêi pakơi chênh achak ađêi kala”, nek adhi anó têêng dhalam. Bơơi la adhi anó mahóng malóóm, hơq adhi anó têêng lơt, lơq bâân gani móón lơt kơi manưih têêng lơt gani. Ơi ngaai manưih ve chóóm huuiq jư tabhơt gani? Lơh tââq n'đóih kalơm dhiq mưi rau, hơq manưih achêk val xar manưih têêng lơt bhơt gani. Taai Yaang ơi praaq: “Óóq têêng tapiing!”, kung ơi praaq: “Óóq leng manưih!” Bơơi la adhi anó yươq têêng tapiing, hơq val leng manưih, nek adhi anó val xar manưih têêng lơt gani. Kơi ađek hayơq phaai papraaq lơq têêng vôôiq kơi nôôq manưih e bâân praaq xêi tââq gani ưng rau rathaai. Ơi rau praaq xêi kah ayô ka-er manưih kah pakah lóóm ayô ka-er. Lóóm ayô ka-er pajơơr jalơh rau praaq xêi!

Nhan móón adhi anó ưng aku, ve rau malơơi la ngaai ađek móón ađêi ve lóóm huuiq bơơi val kah ve tarnêêng têêng? Lóóm huuiq achêk kah chóóm paq manưih achêk, kah lua? Babi mưi adhi anó môôiq mamóóq adhi chapiên kah ve kun aau lơq tabhuch tapiêl chana padyơk dyóp tangêi, bơơi mưi chanak manưih kalóóng adhi anó móón palơq piđó: “Phaai vôôiq kalóóng yươq rauha, phaai jư đóng ngan lơq cha đóng kabhôôq!”, hơq adhi anó kah đóng piđó nôôq rau achak araang kiêng đươi, hơq ve rau malơơi malaai? Lóóm huuiq kung kơi ađek, la kah ve tarnêêng têêng nek chênh ađó chêt. Dhơ kơi ađek, ngaai ađek e móón: “Amei ve lóóm huuiq, hayơq aku ve tarnêêng têêng.” Nek đóng aku lêi lóóm huuiq kah ve tarnêêng têêng ưng amei, hayơq aku e đóng amei lêi lóóm huuiq palơq tarnêêng têêng ưng aku. Amei huuiq kơi Yaang Pleng nek mưi giêl; Amei huuiq dhalam. Abhưi kung huuiq lơq piđó hayer kakhin. Nô manưih ngôôk abhôh, amei kiêng n'nal kơi lóóm huuiq kah ve tarnêêng têêng nek kah malơơi kah? Eh dhơq Ap-ra-haam, abhươp avuôq nôôq he, ơi bâân đóók bhơt liêm palơq tarnêêng têêng xók ađó tapôông I-saak, akóón padruuih ađêi, dhiq baang bhanuôih kơi? Amei lêi kơi lóóm huuiq makơi palơq tarnêêng têêng ưng amei, lơq ve tarnêêng têêng, lóóm huuiq ơi bâân liêm kre. Paraaq Bha-aar Yaang Pleng ađô ơi bâân jaap paraaq, kơi ađô: “Ap-ra-haam huuiq Yaang Pleng, rau ađek bâân đóók nek bhơt liêm đóng ađó,” Lơq ađó bâân đóók nek parjơơk ưng Yaang Pleng. Adhi anó lêi nek, mưi chanak bâân đóók bhơt liêm palơq tarnêêng têêng, lơq kah chapiên tââq lóóm huuiq hơq giêl. Kung makơi kơi ađek, eh dhơq pađiil baan achak Ra-haap bâân đóók bhơt liêm palơq tarnêêng têêng xók pơh yaauq nôôq manưih đââng paraaq lơq đââng piđó vôôiq hót kalơng lââng kơi? Ơi kơi achak kah ve ravaai nek chêt ng'kơi, lóóm huuiq kah ve tarnêêng têêng nek kung chêt kơi achêk.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.