Ja-kơ 1

1Ja-kơ, dhơn ratơơq ưng Yaang Pleng lơq ưng Jê-su Chuôq Paq Manưih, pagơơi đóng majêt bơơr dhong nooi kalóóng xók talum tachêh tavươk: Nhan chap yayar adhi anó kalóóng bhuui marhaal. 2Nhan móón adhi anó ưng aku, xók adhi anó n'tôq leq dyóp rau klêêu lêi, phaai lêi ađek nek lóóm marhaal bing dyóp, 3taai n'nal kơi rau klêêu lêi lóóm huuiq adhi anó yuur avaaih praan karơ đơơp jruôn. 4Bơơi, praan karơ đơơp jruôn phaai tabhlơng lơh liêm dyóp praan karơ, đóng adhi anó ve chóóm bâân tadhơ gamak lơq xong bhơt, yươq dyơq rau tabhuch. 5Hayơq la ngaai ađek kalóóng adhi anó thiêuq tabech galang, manưih achêk phaai gavơh nhan tââq Yaang Pleng, Yaang đóng chok leq kơi xưa bhlaai đóng dyóp ngaai manưih hơq kah trêh teng, nek rau tabech galang e bâân đóng leq manưih achêk. 6Bơơi manưih achêk phaai gavơh nhan kalóóng lóóm huuiq, kah rau paangra, taai manưih paangra dhiêp kơi ga-uul taxiiq, bâân kajêêq đââng lơq dyók dhaluônh toom adhiiq. 7Manưih kơi ađek óóq rââm kơi ađêi e bâân đơơp ve rau tââq Chuôq, 8hơq nek manưih buôn paangra, kah mưng karnóq kalóóng dyóp kalơng katôôch ađêi. 9Manưih adhi anó kalóóng dhiq ngeeo katui phaai pajơơr leq tanơơt yaal charnap ưng ađêi, 10hayơq manưih kavaan phaai pajơơr leq rau katưưiq katit ưng ađêi, taai manưih achêk e bil tich kơi pô raring dhiq klung bhơơi. 11Mat tangêi yuur blo palơq puih parđiêq óch róh lơq têêng arang vet bhơơi n'lóóng, pô ađó ruuh n'tôq, hót nguôi liêm kra ưng ađó gluui bil. Makơi ađek, manưih kavaan kung e bâân rang vet m'pơng tarnêêng parvôôiq viêng tapun ưng ađêi. 12Phươk đóng manưih đơơp klêêu lêi. Taai, xók ơi bâân lêi đuôh jruôn, manưih achêk e đơơp dhanưưk rau mamông, nek rau đu Yaang Pleng ơi hươq đóng leq nôôq ngaai nh'nhơr Ađó. 13Xók bâân dharơơl galơơk, óóq ve ngaai móón kơi ađô: “Aku bâân Yaang Pleng dharơơl galơơk.” Taai Yaang Pleng nek kah chóóm bâân rau aak dharơơl galơơk, hơq chênh Ađó kung kah dharơơl galơơk ngaai. 14Bơơi ting chanak manưih bâân dharơơl galơơk, xók bâân pajươk kajôông lơq chut dharơơl tââq lóóm malóóch ưng chênh ađêi kala. 15Tââq ađek, lơh xók ơi achak kadhaap, malóóch kiêng avaaih matu lơt, hơq xong xók ơi bâân ban gamak matu lơt avaaih akan chêt. 16Nhan móón adhi anó bơk nh'nhơr ưng aku, óóq đóng ađêi bâân galơơk chachââr. 17Dyóp rau chrooi đóng liêm kre lơq dyóp kliim kaliim bhơt liêm maar bhral tư tââq yaal, nek bhral tââq Ama ưng rau brương, hơq kalóóng Ađó kah ve rau tadhơ môôiq a-ô tadhơ raxal. 18Ting kơi ơi praaq, Ađó ơi n'niên nôôq he tavaaih palơq paraaq ưng paraaq dhalam, đóng nôôq he nek mưi rau pale tââp bóóng kalóóng nôôq rau tavaaih ưng Ađó. 19Nhan móón adhi anó tanhơr ưng aku, phaai n'nal kơi ađô: Dyóp ngaai phaai đâh xâng, jih praaq, jih grâ. 20Taai garâ jar-ââih ưng akóón manưih kah têêng vaaih rau bhơt liêm ưng Yaang Pleng. 21Taai kơi achêk, lơh xók ơi lôh m'peq dyóp rau anhuq palơq n'nal mơ rau môôp lơt, Phaai pei đơơp dhiq rau moor dha-iiq paraaq bâân choh chóói, nek paraaq ve chóóm paq jóói ravaai adhi anó. 22Phaai val kơi nôôq manưih ting têêng kơi paraaq, óóq chapiên nek nôôq manưih xâng hơq bhlơp galơơk chênh ađêi. 23Ơi la ngaai manưih nek manưih xâng paraaq hơq eh rau nek manưih ting têêng, nek manưih achêk thê kơi mưi chanak manưih ngil haliq mat kaxu ưng ađêi kalóóng xamil. 24Manưih achêk ơi ngil ađêi hayơq yuur xooq, n'drươh hơq havil vaq ađêi biêh ng'kơi vaq. 25Bơơi ngaai chamet kanóq leq gani dyóp liêm ưng rau rathaai, lơq bhiêk tabhlơng têêng kơi ađek, kah val kơi manưih xâng buôn havil, hơq nek manưih têêng rau kiêng têêng, hơq manưih ađek e bâân phươk kalóóng tarnêêng têêng ưng ađêi. 26La ngaai kanóq ađêi nek huuiq taruuih liêm, hơq kah jư n'taak ađêi, bơơi bhiêk bhlơp chachââr lóóm ađêi, nek taruuih liêm ưng manưih achêk kah rau malơơi. 27Taruuih liêm sek tabah lơq yươq madham anhuq toom mat Yaang Pleng, Ama nôôq he, ađek nek poor jóói paniên dharit, kamaai atươp dhiq garnhuh bhrê hư ưng piđó, lơq jư ađêi yươq anhuq tââq manưih hóng katiêk.