Ga-la-ti 6:2

1Nhan móón adhi anó, la mưi nak bâân lum kalóóng lơt môôp ve rau, hơq adhi anó nek manưih karơ lóóm huuiq phaai klôôq pahei manưih ađek kalóóng lóóm moor dha-iiq, xók tư hêch lêi ađêi kala, óóq vaaih ađêi kung bâân dharơơl galơơk. 2Phaai gưi geng haleng đóng xóng ađêi, lơq kơi ađek adhi anó e têêng dyóp gani ưng Chuôq Paq Manưih. 3Ơi la ngaai kanóq ađêi nek mưi m'bưưiq têêng gamak, dhiq xók kah nek rauriq, manưih achêk tư galơơk chachââr ađêi. 4Bơơi ting nak phaai haliq lêi tarnêêng ađêi, hayơq xók achêk manưih ađek e ve chóóm đóng pajơơr leq ađêi kala, hơq eh rau marchơng palơq mưi ngaai lââng. 5Ơi ting nak e gưi geng haleng ưng chênh ađêi kala.

6Mat lââng ngaai bâân pachóóm taruuih Yaang Pleng phaai paak blah kalóóng dyóp rau liêm palơq manưih pachóóm ađêi. 7Óóq đóng bâân galơơk chachââr. Yaang Pleng kah đơơp ajóóch na. Ơi la palââng chóói haurau nek e xóót rau ađek. 8Ngaai chóói đóng manưih ti ađêi e tââq manưih ti xóót rau chêt bil. Dyơq ngaai chóói đóng Yaang Liêm e tââq Yaang Liêm bâân xóót rau parmông taluôn luôn. 9Nôôq he óóq chóóm pabôôk nhưh xók têêng rau liêm, taai tơk pâng bhêêl ganah, nôôq he e xóót leh yưưm la yươq dhur lóóm. 10Kơi ađek hayơq, xók bhêêl nôôq he ve bâân têêng, nek nôôq he kơng têêng rau liêm đóng dyóp ngaai, hơq kre liêm nek đóng nôôq manưih kalóóng parlóng đong lóóm huuiq.

11Phaai lêi nôôq chư grươq ng'kơi hơq aku ơi xaraq đóng adhi anó, palơq chênh têi ađêi. 12N'nal mơ manưih kiêng tavaaih kanóq liêm kalóóng manưih ti, piđó chut adhi anó đơơp iêt ng'kar, chapiên đóng piđó yươq phaai bâân kóóp róp leq m'baang chatông ưng Jê-su Chuôq Paq Manưih. 13Ơi patơk mơ chênh nôôq manưih đơơp iêt ng'kar ađek kung kah đơơp jư gani, bơơi piđó kiêng adhi anó đơơp iêt ng'kar đóng piđó ve chóóm laach pajơơr kalóóng manưih ti ưng adhi anó. 14Dyơq ting kơi palơq aku, nhan yươq rauriq val vaaih kơi đóng laach pajơơr lơh tââq leq m'baang chatông ưng Jê-su Chuôq Paq Manưih, Chuôq nôôq he, taai m'baang chatông achêk, manưih hóng katiêk ting kơi palơq aku ơi bâân teeng đinh, lơq aku ting kơi palơq manưih hóng katiêk kung kơi ađek. 15Taai eh rau tarnêêng iêt ng'kar nek tarnêêng hau rauriq, kung eh rau tarnêêng kah iêt ng'kar, bơơi tarnêêng ađek nek mưi rau tame. 16Lơq la dhơ dhangaai e jađaang vôôiq ting dhanang ađô, nek nhan yươq rauha lơq rau ayô ka-er tơơt dhiq piđó, lơq dhiq dhanuôr I-sơ-ra-êên ưng Yaang Pleng.

17Tââq ađôk tơk tabhêêl, nhan óóq ngaai têêng parơu panhok leq aku, taai aku dyơq tabóq dhiq achak araang nôôq dham gamuôn ưng Chuôq Jê-su.

18Nhan móón adhi anó, nhan ơơn phươk liêm ưng Chuôq nôôq he, Jê-su Chuôq Paq Manưih tơơt palơq lóóm karnóq adhi anó. A-meen.