Ga-la-ti 5

1Chuôq Paq Manưih ơi pagluh nôôq he đóng bâân rathaai. Kơi ađek hayơq, phaai dyương tamưng lơq óóq đơơp pei geng et têêng xól dyơq.

2Nhan phaai chamet lêi, aku, Phaau-lô, praaq đóng adhi anó kơi la adhi anó kơng đơơp iêt ng'kar, nek Chuôq Paq Manưih e kah đââng malơơi rauriq đóng adhi anó ve. 3Aku khin praaq majal dyơq palơq dyóp nak đơơp iêt ng'kar kơi ađó achêk ve tarnêêng phaai huuiq jư tabhơt gani. 4Ngaai adhi anó kiêng bâân đóók bhơt liêm tââq gani, ơi bâân talơơi tââq Chuôq Paq Manưih; ơi bil tââq phươk liêm. 5Leq phơn nôôq he, đươi Yaang Liêm, tââq lóóm huuiq, nôôq he tahươk tahơn đương lêi rau rââm leq rau bhơt liêm. 6Taai kalóóng Jê-su Chuôq Paq Manưih, rau liêm lơh eh rau nek iêt ng'kar môôiq kah iêt ng'kar, hơq nek lóóm huuiq bâân matêêng tapâng lóóm tanhơr. 7Adhi anó biêh đóók mut liêm. Ngaai ơi kajơq adhi anó đóng óóq bâân paraaq dhalam kayua huuiq? 8Rau paxuq ađek kah tơk tââq Yaang dhaloong adhi anó! 9M'bưưiq piêng têêng paxơơk luch garboq amun. 10Kalóóng Chuôq aku ve lóóm huuiq mưng leq adhi anó, kơi adhi anó e kah kanóq n'tua kơi. Mat lââng ngaai nak têêng panhok karnóq adhi anó e đơơp tanóóm tóóm, dhơ kah xêi ađó ađek nek ngaai. 11Bơơi, nhan móón adhi anó, la kơi aku bhiêk truuih pachóóm pheep iêt ng'kar hơq ng'kơi aku dyơq bâân kóóp róp? La kơi ađek nek rau têêng lơt ơi taai m'baang chatông ơi bâân katiih lơơi aq. 12Aku patơk mơ rââm nôôq manưih têêng parơu adhi anó e tư blươt ađêi vaq.

13Nhan móón adhi anó, taai adhi anó ơi bâân dhaloong tơk rau rathaai, chapiên nek rau rathaai eh rau đóng đââng lóóiq kapươk đóng lóóm kanóq manưih ti; klóóih dhiq ađek, phaai têêng yaauq palơq xóng ađêi tââq lóóm tanhơr. 14Taai tabhơt gani bâân têêng dyóp kalóóng mưi paraaq kayua: “Akóón phaai nh'nhơr manưih đan tóór akóón kơi chênh ađêi.” 15Dyơq la adhi anó tarjeng tarxeeq lơq tarkap tarđah xóng ađêi, nek phaai hêch lêi, e vaaih adhi anó tarleng xóng ađêi.

16Palâh lóóiq aku praaq kơi ađô, phaai jađaang vôôiq ting Yaang Liêm, nek adhi anó dhakơi yươq têêng iêm lóóm nôôq malóóch kiêng ưng manưih ti. 17Taai manưih ti malóóch kiêng lơt palơq Yaang Liêm, dyơq Yaang Liêm tarjơl palơq manưih ti. Tââq bơơr hót tarjơl palơq xóng nhiđó, đóng hayơq yươq vaaih chiên la adhi anó kiêng nôôq rau ađôk, nek bhiêk têêng. 18Bơơi la adhi anó bâân Yaang Liêm kađââng, nek adhi anó yươq tơơt raraal gani. 19Nôôq tarnêêng têêng ưng manưih ti nek drêh dróói, piđó nek: tapiing taniêt, kah sek liêm, têêng dhiêt. 20Bhuôih kabhêi, têêng abhô, gam chróót, tarjeng pađươk, tatrô, grâ jar-ââih, pađuôh, kah makơi lóóm, tamôôp tablah, 21Chriik lêi, ból plơ, cha ơm palơq rau dhơơm makơi nôôq rau papiing, hơq leq nôôq tarnêêng ađek, aku gaam pagat adhi anó, kơi aku ơi gaam pagat n'loom hei, kơi ngaai dhơơm têêng nôôq tarnêêng kơi ađek e kah bâân tơơt katiêk Yaang Pleng. 22Bơơi pale ưng Yaang Liêm nek tanhơr, bhuui marhaal, yươq rauha, đuôh jruôn, matich mahinh, moor dha-iiq, mưi lóóm, 23moor m'pheep, jư ađêi kala, kah ve ađó gani jơl palơq nôôq rau kơi ađek. 24Mat lââng, nôôq manưih mađó leq Jê-su Chuôq Paq Manưih ơi teeng đinh lóóm karnóq manưih ti palơq nôôq malóóch lơq n'thaam kiêng dhiq m'baang chatông.

25La nôôq he mamông ganơơm Yaang Liêm, nek nôôq he kung kiêng jađaang vôôiq ting Yaang Liêm. 26Óóq val kơi parlaach pajơơr xók ơơr môôp lóóm xóng ađêi, chriik lêi xóng ađêi.