Katu Bible Literal Text
Ga-la-ti 4
Bơơi aku kiêng móón kơi đóng patơk ađó mơ manưih đơơp drươp kavaan dyơq xayââr paniên, nek ađó achêk kah rau n'tua mưi nak têêng xól, dhơ nek kala ưng tabhơt drươp kavaan. Palâh lóóiq ađó achêk tơơt raraal nôôq manưih chamet lêi lơq nôôq manưih gamang đóng patơk ganah ơi xêi loom ưng akonh. Kung makơi achêk, xók nôôq he dyơq nek akóón paniên, nôôq he bâân têêng xól đóng nôôq dhaniêng tââp tanââp ưng akóón manưih. Bơơi bhêêl xók ơi xong ganah nil ơi tơk, Yaang Pleng ơi kayua Akóón Ađó, xók n'niên tââq mưi nak pađiil, n'niên raal gani, đóng Ađó paq jóói nôôq manưih tơơt raal gani, hơq đóng nôôq he ve chóóm bâân pei đơơp kataai têêng akóón partơơt. Mat lââng, taai adhi anó nek akóón, hayơq Yaang Pleng ơi kayua Yaang Liêm ưng Akóón Ađó mót leq lóóm nôôq he, dhaloong karơ kơi ađô: “A-ba, Ama.” Taai kơi ađek, adhi anó yươq dyơq nek têêng xól dyơq, bơơi nek akóón, hơq la nek akóón, hơq kung nek manưih đơơp drươp kavaan ganơơm Yaang Pleng.
Bơơi bhêêl n'loom, xók kah ơi n'nal Yaang Pleng, adhi anó ơi bâân têêng xól đóng nôôq rau dhơơm hơq leq achak araang eh rau nek yaang rauriq. Dyơq bhêêl ađôk xók ơi lêi n'nal Yaang Pleng, hơq dhalam lơh nek ơi bâân Yaang Pleng n'nal tơk, nek ng'kơi têêng adhi anó val palâh chô palơq nôôq dhaniêng tââp tanââp kah machak lơq kah chóóm đươi, adhi anó rââm kiêng têêng xól đóng piđó kơơq mưi chu dyơq môôiq alua? Adhi anó dyơq lêi tangêi, kaxe, nil, lơq kamó! Aku karaang đóng adhi anó, kakhin nek dhakơi aku ơi têêng nhưh nhen kơi kah malơơi malaai dhiq m'pơng adhi anó.
Nhan móón adhi anó, aku nhan adhi anó phaai val xar thê kơi aku, ơi aku kung kơi adhi anó. Adhi anó yươq têêng tamôôp aku m'bưưiq m'bâ. Adhi anó n'nal kơi tapâng rau ka-ai dhuôr kalóóng achak araang ađô, aku ơi truuih đuui Taruuih Liêm đóng adhi anó jal tââp tarnââp. Palơq rau klêêu lêi leq adhi anó dhiq talum achak araang aku, adhi anó ơi kah kađiq lơơi, kung yươq kah đươi, palâh lóóiq, adhi anó ơi pơh yaauq aku kơi dhơn pleng ưng Yaang Pleng, kơi Jê-su Chuôq Paq Manưih. Kơi achêk nek lóóm bhuui sương achêk ưng adhi anó n'dhiq vaq? Taai aku truuih đuui leq adhi anó kơi, la ve chóóm bâân, adhi anó alua ơi bhalok mat ưng ađêi kliim đóng leq aku. Kơi ađek nek aku ơi xar manưih brau ưng adhi anó taai praaq rau lalua đóng adhi anó alua? Nôôq manưih achêk bhơt lóóm palơq adhi anó, eh rau ve karnóq liêm, bơơi piđó kiêng blah n'tua adhi anó gluh, đóng adhi anó bhơt lóóm palơq piđó. Bơơi đơơp bhơt lóóm dyóp bhêêl đóng rau liêm nek kre, lơq eh rau chapiên xók aku ve mat palơq adhi anó. Nôôq akóón ưng aku ơơi, taai nôôq akóón hơq aku phaai đơơp ka-ai luônh ayaai machu dyơq patơk bhêêl Chuôq Paq Manưih bâân xar achak kalóóng nôôq akóón — mat lââng, aku rââm kiêng tơơt đan palơq nôôq akóón n'drươh bhêêl ađôk lơq klóóih dhơ dhariêng bha-ươr, ưng aku taai aku dyơq karnóq hêch leq nôôq akóón.
Nô nôôq manưih kiêng tơơt raal gani, phaai đóng aku n'nal, adhi anó kah tameng xâng gani ha? Taai ve paraaq xaraq kơi ađô Ap-ra-haam ve bơơr akóón padruuih, mưi nek tââq manưih pađiil têêng xól, lơq mưi nek tââq manưih pađiil đu rathaai. Dhơ kơi ađek, panong akóón tââq manưih pađiil têêng xól bâân n'niên ting ng'kar m'bech, hayơq panong akóón tââq manưih pađiil rathaai bâân n'niên tââq paraaq hươq. Nôôq tarnêêng ađô nek bâân móón tơk kơi mưi babi, taai bơơr chanak pađiil achêk nek bơơr raket bóóp. Mưi raket bóóp dhiq bôôl Si-naai, n'niên akóón gluh têêng xól. Ađek nek A-ga. A-ga nek bôôl Si-naai dhiq A-ra-bi, lơq makơi palơq kanóón Jê-ru-sa-leem xók ađôk, taai kanóón ađek kung palơq akóón anaaq ađêi dyơq têêng xól. Bơơi Jê-ru-sa-leem dhiq pleng nek rathaai, hơq ađek nek amêêq ưng nôôq he. Taai ve paraaq xaraq:
“Phaai bhuui marhaal, ơ manưih kah makóón, nek manưih pađiil kah pabhaq;
Phaai yuur papraaq lơq driêu gahơ, ơ manưih yươq ka-ai karuôq taai n'niên akóón;
Taai akóón anaaq ưng manưih pađiil bâân talơơi bơk lơh akóón anaaq ưng manưih pađiil ve kayiik.”
Nhan móón adhi anó, thê kơi I-saak, adhi anó nek akóón ưng paraaq hươq. Dhơ kơi ađek, dhalam kơi xók hanua, panong akóón bâân n'niên ting ng'kar m'bech jarnah chanaaq panong akóón ting Yaang Liêm ng'kơi, nek xók ađôk kung kơi achêk. Bơơi Bha-aar Yaang Pleng harau praaq? “Phaai chuih manưih pađiil têêng xól lơq akóón ưng ađó. Taai akóón ưng pađiil têêng xól dha kơi e kah bâân ting đơơp drươp kavaan kung palơq akóón ưng manưih pađiil rathaai.” Taai kơi ađek, nhan móón adhi anó, nôôq he eh rau nek akóón ưng manưih pađiil têêng xól, bơơi nek akóón ưng manưih pađiil rathaai.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.