Ga-la-ti 3

1Ơ, Nôôq manưih Ga-la-ti parngôôk! Ngaai ơi pagun adhi anó, xók hơq toom mat adhi anó, Jê-su Chuôq Paq Manưih đơơp teeng đinh dhiq m'baang chatông ơi bâân truuih đuui kơi drêh dróói? 2Aku chapiên kiêng tabâân n'nal rau ađô tââq adhi anó: Adhi anó ơi bâân đơơp Yaang Liêm tââq tarnêêng têêng kơi gani môôiq tââq rau ting xâng kalóóng lóóm huuiq? 3Adhi anó parngôôk kơi ađek alua? Xók ơi tââp tanââp palơq Yaang Liêm, kah alua xók ađôk adhi anó ơi paxong palơq achak araang? 4Kah alua adhi anó ơi đơơp n'nal mơ hadhaap janah đóng kah bâân rauriq? — la alua kơi ađek nek alua kah malơơi malaai! 5Kơi ađek, Yaang đóng Yaang Liêm leq adhi anó lơq têêng nôôq tarnêêng mataai raman dhiq m'pơng adhi anó, achêk nek tââq tarnêêng têêng ting gani, môôiq tââq rau ting xâng kalóóng lóóm huuiq? 6Kơi Ap-ra-haam “huuiq ganơơm Yaang Pleng lơq ađek nek rau đóng ađó bâân đóók nek bhơt liêm,” 7kơi ađek nek, phaai n'nal kơi, ngaai dhơơm ve lóóm huuiq, ađek nek akóón ưng Ap-ra-haam. 8Bơơi xók loom lêi kơi Yaang Pleng đóók manưih katiêk lââng nek bhơt liêm tââq lóóm huuiq, nek bha-aar Yaang Pleng ơi truuih pachóóm Taruuih Liêm laloom đóng Ap-ra-haam kơi ađô: “Dyóp dhanuôr e bâân phươk dhiq akóón.” 9Đóng hayơq, ngaai ve lóóm huuiq nek bâân phươk kung palơq Ap-ra-haam, ađó ve lóóm huuiq. 10N'nal mơ manưih ganơơm dhiq tarnêêng têêng ting gani nek tơơt raal paraaq tóh karuuh; taai ve xaraq kơi ađô: “Đaang tóh karuuh dyóp ngaai kah mưng lóóm palơq dyóp rau bâân xaraq kalóóng bha-aar gani đóng têêng piđó.” 11Bơơi drêh dróói kơi kah ngaai ganơơm gani bâân đóók bhơt liêm toom mat Yaang Pleng, taai “manưih bhơt liêm e mamông tââq lóóm huuiq,” 12Dyơq gani nek kah gluh tââq lóóm huuiq, bơơi, “Manưih têêng nôôq tarnêêng ưng gani e mamông ganơơm piđó.” 13Chuôq Paq Manưih ơi pók nôôq he lơh tââq rau tóh karuuh ưng gani xók đơơp tóh karuuh klóóih đóng nôôq he, taai ve paraaq xaraq: “Đaang tóh karuuh ngaai nak bâân tayông dhiq n'lóóng chatông” — 14đóng phươk liêm ưng Ap-ra-haam tơk leq manưih katiêk lââng kalóóng Jê-su Chuôq Paq Manưih, buôn đóng nôôq he ve chóóm bâân đơơp paraaq hươq leq Yaang Liêm ganơơm lóóm huuiq.

15Nhan móón adhi anó, aku praaq ting kơi akóón manưih. Dhơ kah n'nal kơi, kah ngaai ve chóóm rơh tabil ha môôiq trul tamót raket bóóp ơi bâân akóón manưih tavaaih. 16Mat lââng, nôôq paraaq hươq nek ơi bâân praaq palơq Ap-ra-haam lơq đóng akóón chachau ưng ađó. Paraaq achêk kah praaq “lơq đóng nôôq akóón chachau” kơi chaleq tơk bơk ngaai, bơơi nek “lơq đóng akóón chachau ưng akóón” kơi chaleq tơk mưi nak, hơq ađek nek Chuôq Paq Manưih. 17Bơơi leq rau aku kiêng praaq ađek nek: Xók vaaih bhral lơh puôn hariêng pe jêt kamó, gani kah rơh tabil raket bóóp ơi bâân Yaang Pleng tavaaih laloom hei dhalam kah baq tiêng paraaq hươq. 18Taai la kavaan bhral tââq gani, nek kavaan achêk kah dyơq nek taai paraaq hươq. Bơơi Yaang Pleng ơi đóng ơơn leq Ap-ra-haam tapâng paraaq hươq. 19Kơi ađek nek, gani hau ngi đươi? Gani ơi bâân tamót kơơq ơi taai nôôq rau tarnêêng lơt, xong xók bâân đóng tââq nôôq dhơn pleng leq têi ưng mưi nak manưih dhiq m'pơng, đóng patơk n'đó xók akóón chachau bhral, hơq paraaq hươq ơi bâân tavaaih leq akóón chachau achêk. 20Bơơi manưih dhiq m'pơng nek kah koom đóng mưi hót, hơq Yaang Pleng nek ve mưi. 21Kơi ađek gani vôôiq tapalâh lóóiq paraaq hươq eh lua? Rau ađek nek kah kơi chóóm! Ơi la gani bâân đóng hơq ve chóóm đââng lóóiq parmông, nek alua rau bhơt liêm alua bhral tââq gani. 22Bơơi Bha-aar Yaang Pleng ơi król tabhơt dyóp rau raal matu lơt đóng tââq ve lóóm huuiq dhiq Jê-su Chuôq Paq Manưih, paraaq hươq ve chóóm bâân đóng leq nôôq manưih ve lóóm huuiq.

23Kơi ađek bơơi, xók loom lóóm huuiq achêk tơk, nôôq he biêh bâân takról raal gani, xók bâân takról đóng patơk xók lóóm huuiq bâân tapakah. 24Patơk mơ, gani ơi val xar manưih đương lêi ưng nôôq he kanóq tơk Chuôq Paq Manưih, buôn nôôq he ve chóóm bâân đóók bhơt liêm tââq lóóm huuiq. 25Bơơi xong xók lóóm huuiq ơi bhral, nôôq he kah dyơq tơơt raraal manưih đương lêi dyơq. 26Taai tabhơt adhi anó nek akóón ưng Yaang Pleng, đươi lóóm huuiq dhiq Jê-su Chuôq Paq Manưih. 27Tââq la ngaai dhơơm ơi đơơp bap-teem kalóóng Chuôq Paq Manưih nek maar pei xơp Chuôq Paq Manưih. 28Kah pantua Jo Thaaiq môôiq Hi-laap, kah pantua têêng xól môôiq rathaai, kah pantua padruuih môôiq pađiil, ơi tabhơt adhi anó nek mưi kalóóng Jê-su Chuôq Paq Manưih. 29Hơq la adhi anó mađó lơq Chuôq Paq Manưih, hơq adhi anó nek akóón chachau ưng Ap-ra-haam, nek nôôq manưih pâng đơơp ting paraaq hươq.