Ga-la-ti 2:20

1Lơh bhluuch majêt puôn kamó, aku yuur vôôiq lóóiq tơk Jê-ru-sa-leem palơq Ba-na-ba, kung xók đââng Tiit ting vôôiq. 2Xók achêk, ting rau tapakah, aku ơi yuur vôôiq lơq truuih pakah toom piđó Taruuih Liêm hơq aku truuih đuui bhlưa kalóóng nôôq dhanuôr katiêk lââng, bơơi ting kơi n'tua kala palơq nôôq manưih ve têêng gamak, kapơn e kơi kiq ađek hơq ađêi dyơq mut hamôôiq ơi mut kalóóng kah machak maraang. 3Dhơ kơi ađek, chênh kơi Tiit, manưih ting vôôiq palơq aku, nek manưih Hi-laap, kung kah bâân par-eep phaai đơơp iêt ng'kar. 4Hơq chiên achêk nek tââq nôôq adhi anó têêng palơt kadrêi palââp, nek nôôq manưih ơi karluk mót đóng ting choop rau rathaai ưng nôôq yi, nek rathaai hơq nôôq yi ve kalóóng Jê-su Chuôq Paq Manưih, hơq đóng piđó ve chóóm kóóp nôôq yi têêng xól. 5Hơq nôôq yi kung ơi kah pakah rau parngau toom piđó kalóóng maxưưiq maxâ, đóng paraaq dhalam ưng Taruuih Liêm ve chóóm chaq ching palơq adhi anó. 6Dyơq leq phơn nôôq manưih đơơp thê nek têêng gamak ađek tôôh (dhơ n'loom hei piđó ve nek têêng mak n'đó, nek kah đuôh têêng n'tua ting kơi palơq aku; Yaang Pleng kah chamet lêi hót nguôi ưng akóón manưih) alua, nôôq manưih đơơp lêi bhi chap ađek kah trul paxóng hau rauriq đóng aku marau marâ. 7Bơơi palâh lóóiq, xók đơơp n'nal kơi aku ơi bâân huuiq pajaau tarnêêng truuih đuui Taruuih Liêm koom đóng manưih kah đơơp iêt ng'kar, thê kơi Phi-e-rơ nek koom đóng manưih đơơp iêt ng'kar 8(Taai, Yaang praaq têêng kalóóng Phi-e-rơ đóng têêng tarnêêng sưưq-đô chamet tơk manưih đơơp iêt ng'kar, kung praaq têêng kalóóng aku kanóq tơk manưih katiêk lââng), 9lơq xong xók bâân n'nal phươk liêm ơi bâân đóng leq aku, hơq Ja-kơ, Sê-pha, lơq Jang, nôôq manưih thê kơi nek nôôq tanól, ơi pađơơp têi atươm makơi palơq Ba-na-ba lơq aku, đóng nôôq yi nek kanóq tơk nôôq dhanuôr katiêk lââng, dyơq piđó kanóq leq nôôq manưih đơơp iêt ng'kar, 10chapiên pató kơi ađô nôôq yi kiêng hei tơk manưih ngeeo, chênh nek rau hơq aku kung ơi pajêi têêng.

11Bơơi xók Sê-pha vôôiq tơk An-ti-ôôt nek aku ơi jaklâk jơl n'drươh toom mat ađó taai ađó biêh đaang chóóm teng jươm. 12Taai laloom xók nôôq manưih tââq Ja-kơ bhral, ađó biêh cha madhiq palơq nôôq manưih katiêk lââng. Bơơi xók piđó bhral, ađó ơi róch lơh lơq blah ađêi n'tua, taai kapơn nôôq manưih mađó kabhuh panhuh đơơp pheep iêt ng'kar. 13Lơq nôôq manưih Jo Thaaiq dyơq lóóiq kung ting kabhuh galơơk chachââr ting ađó, patơk mơ chênh nek Ba-na-ba kung bâân tapaxuq ting tađuui lóóm chachââr galơơk ưng piđó. 14Bơơi xók aku lêi kơi piđó dyơq kah praaq têêng pâng tapat ting paraaq dhalam ưng Taruuih Liêm, aku ơi praaq palơq Sê-pha toom mat dyóp ngaai: “La amei, nek manưih Jo Thaaiq, mamông kơi manưih katiêk lââng hơq eh kơi manưih Jo Thaaiq, nek hau kơi amei ve đuôh pa-eep manưih katiêk lââng phaai mamông thê manưih Jo Thaaiq?” 15Nôôq yi nek manưih Jo Thaaiq tââq xók n'niên, hơq eh rau manưih matu lơt gluh tââq manưih katiêk lââng. 16Bơơi taai n'nal kơi kah mưi ngaai bâân đóók bhơt liêm ganơơm tarnêêng têêng ting kơi gani, lơh tââq nek ve lóóm huuiq dhiq Jê-su Chuôq Paq Manưih, hơq nôôq yi ơi tabóq lóóm huuiq dhiq Jê-su Chuôq Paq Manưih đóng nôôq yi bâân đóók bhơt liêm chênh ve lóóm huuiq dhiq Chuôq Paq Manưih hơq eh rau đươi tarnêêng têêng ting kơi gani. Taai dyóp ng'kar m'bech e kah bâân đóók bhơt liêm tââq tarnêêng têêng ting gani. 17Bơơi la, dyơq xók chik-chêk kơi bâân đóók bhơt liêm kalóóng Chuôq Paq Mưih, chênh nôôq yi kung bâân chamet lêi nek manưih ve matu, hơq ve kơq Chuôq Paq Manưih nek manưih têêng yaauq đóng matu lơt? Rau ađek nek kah mơ chóóm ve! 18Ơi la aku kadhơng lóóiq nôôq rau hơq ađêi ơi rơh pahư, nek aku lalua ađêi nek manưih têêng lơt gani. 19Tââq pakah gani aku ơi chêt ting kơi palơq gani, đóng aku ve chóóm mamông đóng Yaang Pleng. Aku ơi bâân tateeng dhiq m'baang chatông lơq Chuôq Paq Manưih, 20dhơ aku kah ve mamông dyơq, bơơi Chuôq Paq Manưih mamông kalóóng aku. Dyơq gral đơơi hơq aku xók ađôk dyơq mamông kalóóng ng'kar m'bech, nek aku mamông kalóóng lóóm huuiq, dhiq Akóón Yaang Pleng, Yaang ơi nh'nhơr aku lơq pajaau chênh mưi Ađó klóóih đóng aku. 21Aku kah ve kajêêq lơơi phươk liêm ưng Yaang Pleng, ơi la rau bhơt liêm nek tââq gani kơi achêk nek Chuôq Paq Manưih ơi chêt kơi kah malơơi!