Ga-la-ti 1

1Phaau-lô, mưi sưưq-đô — kah bhral tââq akóón manưih kung kah tââq mưi nak ngaai lââng, bơơi tââq Jê-su Chuôq Paq Manưih lơq tââq Yaang Pleng Ama, Yaang ơi payuur Ađó mamông lóóiq tââq kan chêt — 2palơq tabhơt nôôq adhi anó tơơt palơq aku, pagơơi nôôq akóón dhơn Chuôq dhiq Ga-la-ti. 3Rââm phươk liêm tơk leq adhi anó palơq lơq yươq rau ha tââq Yaang Pleng nek Ama, lơq Jê-su Chuôq Paq Manưih, Chuôq nôôq he. 4Yaang ơi jaau ađêi taai matu lơt nôôq he, đóng Ađó ve chóóm trôông paq nôôq he lơh tââq klaang đơơi têêng aak xók ađôk, ting karnóq kiêng ưng Yaang Pleng, Ama nôôq he. 5Rââm cha-iil tabah chô leq Ađó đóng patơk nh'chró taluôn luôn. A-meen.

6Aku hêq lêi xók adhi anó kuôq tahươk palâh lơh tââq Yaang ơi dhaloong ađêi tââq phươk liêm ưng Chuôq Paq Manưih đóng ting mưi Taruuih liêm lââng, 7hơq Taruuih Liêm nek kah chóóm lalei ơi, chapiên nek tââq nôôq manưih tôôh nek nôôq manưih têêng panhok adhi anó lơq kiêng dhơ palơt Taruuih Liêm ưng Chuôq Paq manưih. 8Bơơi dhơ đóng palơq nôôq yi, môôiq mưi dhơn Chuôq tââq pleng, truuih đóng adhi anó mưi taruuih liêm n'tua palơq taruuih liêm hơq nôôq yi ơi truuih đóng adhi anó, nek manưih ađek phaai bâân tóh karuuh. 9Kơi nôôq yi ơi đóók móón loom hei, lơq xók ađôk aku móón majal dyơq: “La ngaai ađek truuih đuui đóng adhi anó mưi taruuih liêm lalei palơq taruuih liêm hơq adhi anó ơi đơơp xâng, nek manưih ađek phaai bâân tóh karuuh.” 10Taai xók ađôk, aku dyơq têêng iêm lóóm akóón manưih môôiq nek Yaang Pleng? Hamôôiq ve kơq aku tabâân kơi têêng iêm lóóm akóón manưih, la aku biêh dyơq têêng iêm lóóm akóón manưih, nek alua aku eh rau nek dhơn ratơơq ưng Chuôq Paq Manưih.

11Nhan móón adhi anó, aku nhan pakah đóng adhi anó n'nal leq Taruuih Liêm ơi bâân aku truuih đuui kơi Taruuih Liêm achêk eh rau nek ting tađuui mưi ngaai lââng. 12Taai aku ơi kah pei đơơp Taruuih Liêm achêk tââq manak manâ, aku kung kah bâân pachóóm đóng, bơơi ađek nek tââq rau tapakah ưng Jê-su Chuôq Paq Manưih. 13Tââq adhi anó ơi xâng leq kơi mamông bhêêl n'loom ưng aku kalóóng taruuih Jo Thaaiq, ađek nek aku biêh kóóp janah kuôq dhaang akóón dhơn Chuôq ưng Yaang Pleng, lơq bhiêk tabâân leng kaxiêt kabhuh achêk. 14Lơq aku tahayuur kalóóng taruuih Jo Thaaiq jalơh bơk ngaai mađó bhayuur m'pơng dhanuôr aku, xók val kơi tabhlơng pajêi leq nôôq taruuih takóh ưng abhươp ama ađêi. 15Bơơi xók Yaang Pleng, Yaang ơi lơơi pantua aku tââq kalóóng luônh amêêq ađêi, lơq ơi dhaloong aku tââq phươk liêm Ađó, bhuui lóóm 16tapakah Akóón Ađó kalóóng aku, đóng aku ve chóóm truuih pachóóm leq Akóón achêk dhiq m'pơng nôôq dhanuôr katiêk lââng, nek n'drươh ađek aku kah xêi palơq bech lơq ahaam. 17Aku kung kah bhađơk vôôiq tơk Jê-ru-sa-leem đóng lum nôôq manưih têêng sưưq-đô laloom aku. Klóóih dhiq ađek, aku ơi vôôiq tơk A-ra-bi, hayơq val palâh chô dhiq Đa-met.

18Xong ađek, lơh pe kamó, aku đơk vôôiq tơk Jê-ru-sa-leem đóng têêng keen palơq Sê-pha lơq tơơt lóóiq palơq ađó ađek majêt xââng tangêi. 19Bơơi aku ơi kah lum mưi nak ngaai lââng kalóóng nôôq sưưq-đô, lơh tââq Ja-kơ, adhi padruuih ưng Chuôq. 20Leq nôôq rau aku xaraq đóng adhi anó, phaai lêi nô ađô, toom mat Yaang Pleng, aku kah praaq chachââr. 21Xong ađek, aku vôôiq tơk nôôq charhóóng ưng Si-ri lơq Si-li-si. 22Xók achêk aku biêh kah bâân nôôq akóón dhơn Chuôq kalóóng Chuôq Paq Manưih dhiq Ju-đê n'nal mat. 23Bơơi nôôq akóón dhơn chuôq biêh chapiên xâng kơi ađô: “Ađó n'loom hei kóóp janah nôôq he ađôk dyơq truuih đuui lóóm huuiq hơq ađó achêk đóók tabâân leng kaxiêt.” 24Hayơq piđó bhi haanh Yaang Pleng ơi taai aku.