2 Kô-rin-tô 13

1Ađô nek chu đu pe aku tơk palơq adhi anó. “Dyóp bhiêk chiên e bâân klôôq paliêm ganơơm dhiq paraaq ưng bơơr môôiq pe chanak truuih đuui.” 2Aku ơi praaq loom kơi xók tơk chu đu bơơr, lơq xók ađôk, dhơ xók kah ve mat, aku kung praaq, palơq nôôq manưih xók n'loom ơi têêng matu, palơq pabhơt nôôq manưih dyơq lóóiq, kơi la aku ve chóóm tơk dhiq ađô machu dyơq, aku e kah lơơi lơt mơ, 3Ơi taai adhi anó xók mââl tamóh rau ngi lêi Chuôq Paq Manưih praaq pachóóm dhiq aku, nek Yaang kah dhur lóóm nek palơq adhi anó mơ, bơơi bing praan mataai dhiq m'pơng adhi anó. 4Taai Ađó ơi tââq dhiq dhur lóóm đơơp teeng đinh dhiq m'baang chatông, bơơi Ađó dyơq mamông tââq mataai karơ ưng Yaang Pleng. Taai nôôq yi kung dhur lóóm kalóóng Ađó, bơơi nek palơq adhi anó, nôôq yi e mamông palơq Ađó tââq mataai karơ ưng Yaang Pleng.

5Adhi anó phaai haliq lêi kala achak ve alua nek ađêi xók tơơt kalóóng lóóm huuiq. Phaai drêh lalua chênh ađêi. Môôiq adhi anó kah đơơp n'nal dhơ dhakơi leq kala achak kơi Jê-su Chuôq Paq Manưih tơơt kalóóng ađêi alua, la kơi achêk, hơq ve alua adhi anó nek galơơk chachââr kơq? 6Bơơi aku đương rââm nek adhi anó e đơơp n'nal kơi chênh nôôq yi eh rau nek galơơk chachââr. 7Hayơq nôôq yi gavơh nhan palơq Yaang Pleng buôn adhi anó óóq têêng dhơ dharau n'đó lơt môôp, eh rau buôn chênh nôôq yi ve chóóm pakah ađêi nek đaang ngaai đươi, bơơi nek buôn chênh adhi anó ve chóóm têêng rau dhalam liêm, dhơ đóng chênh nôôq yi nek kơi ngóq kah bâân ngaai đươi. 8Ơi nôôq yi kah ve chóóm têêng mưi rau huông palơq paraaq dhalam, palâh lóóiq nôôq yi nek taai paraaq dhalam. 9Ơi nôôq yi bhuui marhaal xók nôôq yi nek dhur lóóm hayơq adhi anó bâân karơ. Nôôq yi kung gavơh nhan đóng rau ađô: rau bhơt liêm ưng adhi anó. 10Ơi taai rau achêk, xók bhêêl kah ve mat, aku xaraq nôôq rau ađô, buôn xók ve mat, aku yươq phaai praaq xêi kơi râng tamarươih ting praan kataai hơq Chuôq ơi đóng leq aku đóng leq tarnêêng têêng hayuur, hơq eh rau malóóm tơk tarnêêng rơh pahư.

11Xariêq tatun, nhan móón adhi anó, phaai bhuui marhaal! Phaai malóóm tơk rau liêm dhalam, phaai lơơi ađêi bâân tabhơơl, phaai ve markơi lóóm kanóq, phaai mamông paliêm lóóiq. Yaang Pleng ưng lóóm tanhơr lơq yươq rauha e tơơt palơq adhi anó.

12Phaai chap yayar xóng ađêi palơq chanum liêm. Tabhơt nôôq manưih huuiq Chuôq chap yayar adhi anó.

13Nhan ơơn phươk liêm ưng Chuôq, nek Jê-su Chuôq Paq Manưih, palơq lóóm nh'nhơr ưng Yaang Pleng lơq rau mađó madhiq ưng Chuôq Yaang Liêm tơơt palơq tabhơt adhi anó.