2 Kô-rin-tô 12

1Achêk nek pa-eep phaai pajơơr ađêi, dhơ kah đââng malơơi harau. Bơơi aku e vôôiq kơơq leq nôôq tapalêi lơq nôôq rau tapakah ưng Chuôq. 2Aku n'nal mưi chanak kalóóng Chuôq Paq Manưih, majêt puôn kamó laloom, ve tơơt kalóóng dyaang achak môôiq kah, aku kah n'nal, môôiq nek tơơt hót nguôi dyaang achak, aku kah n'nal, Yaang Pleng n'nal, mưih chanak kơi achêk ơi bâân đââng padyók đóng tơk talaang pleng đu pe. 3Aku ơi n'nal mưi chanak kơi achêk, dhơ kalóóng dyaang achak môôiq nguôi dyaang achak, aku kah n'nal, Yaang Pleng n'nal 4kơi manưih ađek ơi bâân đââng tơk Ba-ra-đi lơq ơi xâng nôôq paraaq kah chóóm praaq hơq kah đóng pheep mưi ngaai ngâ yuur praaq. 5Leq mưi chanak kơi achêk, aku e pajơơr, bơơi leq chênh ađêi, aku e kah pajơơr, chapiên tơơt kalóóng nôôq rau dhur lóóm ưng aku. 6Ơi la aku rââm kiêng yuur pajơơr, nek aku e eh rau nek ngôôk ngaak, taai aku e praaq rau lalua. Bơơi aku gơt gađơq lóóiq, e vaaih mưi ngaai ađek ve chóóm kanóq leq aku jalơh lơh rau manưih achêk bâân lêi dhiq aku môôiq xâng tââq aku. 7Ơi taai rau ve đaang chap ưng nôôq tapalêi, đóng hayơq buôn aku óóq val kơi laach jơơr, nek mưi axông huuch kalóóng achak araang, mưi abhưi abhóch ưng Sa-taan, ơi bâân đóng leq aku buôn ađó ve chóóm chanaaq janah aku, hơq đóng aku óóq val kơi laach jơơr. 8Leq chiên ađôk, aku ơi mââl nhan Chuôq pe chu buôn Ađó thuôt lơơi ađó tââq aku. 9Kơi achêk hơq Ađó ơi praaq palơq aku: “Ơơn phươk liêm ưng Aku nek dyóp đóng akóón, ơi mataai karơ ưng Aku bâân yuur têêng liêm dyóp kalóóng rau dhur lóóm.” Taai kơi achêk, aku e bhơt bhuui sương yuur pajơơr lơh dyơq kalóóng rau dhur lóóm ưng ađêi, hơq đóng mataai karơ ưng Chuôq Paq Manưih jaq tơơt dhiq aku. 10Taai ađek, aku iêm lóóm kalóóng nôôq dhur lóóm, bharlưưk kađiq, haleng karnóq, chanaaq janah, menh chêt ơi taai Chuôq Paq Manưih; ơi n'đó bhêêl aku dhur lóóm, nek bhêêl ađek aku bâân karơ.

11Aku ơi val kơi ngôôk ngaak; chênh adhi anó ơi pa-eep aku kơi achêk. Ơi aku biêh phaai bâân adhi anó bhi haanh, taai aku ơi yươq tabhuch mưi raurâ ưng nôôq “Sưưq-đô tabech galang” tôôh, dhơ aku patơk mơ nek kah rauriq. 12Nôôq karnal ưng mưi sưưq-đô ơi bâân pakah têêng dhiq m'pơng adhi anó palơq tabhơt rau jruôn kađiq, palơq kanal chrih lơq raman chrih, palơq nôôq tarnêêng mataai karơ. 13Ơi n'dhiq nek rau hơq adhi anó bâân kah đuôh lơh nôôq akóón dhơn Chuôq lââng, chapiên chiên chênh aku ơi kah têêng ganưi haleng đóng adhi anó? Phaai palơh lơơi đóng aku rau kah dhalam ađô!

14Phaai lêi nô! Aku ơi ravang tơk palơq adhi anó chu đu pe ađô, lơq aku e kah tavaaih ve rau ganưi haleng. Ơi aku kah achêk tabâân nôôq karvaan kabhôôq ưng adhi anó, hơq nek chênh adhi anó. Ơi akóón anaaq eh rau koom ha-ơu đóng akonh akan, bơơi nek akonh akan koom ha-ơu đóng akóón anaaq. 15Hayơq aku e lóng bhuui sương kơl cha, patơk mơ đơơp luh-lung pabhơt ơi taai yaang ravaai adhi anó. Ve kơq xók nh'nhơr adhi anó bơk lơh, nek aku bâân nh'nhơr m'bưưiq lơh? 16Bơơi phaai bhiêk lơơi kơi achêk, chênh aku ơi kah têêng ganưi haleng đóng adhi anó, dhơ kơi ađek, taai nek manưih bhriêl tarbech, aku ơi pei pa-eep adhi anó palơq bhriêl tarbech. 17Ve kơq mưi ngaai ađek, nek manưih aku glêh kayua tơk leq adhi anó, hơq aku ơi tapâng manưih achêk kapươk malua adhi anó? 18Aku ơi bhơơl chut Tiit lơq kayua mưi chanak adhi anó lââng ting vôôiq palơq ađó achêk. Hơq ve lua Tiit ơi kapươk malua adhi anó kơq? Nôôq yi ơi kah jađaang vôôiq palơq mađó mưi lóóm karnóq alua? Kah madhiq nôôq lóih dyung alua?

19N'loom ahei, ve lua adhi anó ngóq kơi nôôq yi xók tư praaq xalaai palơq adhi anó? Nôôq yi nek xók praaq toom mat Yaang Pleng, kalóóng Chuôq Paq Manưih. Bơơi adhi anó bơk nh'nhơr ơơi, pabhơt nôôq rau ađô nek taai malơơi đóng tarnêêng têêng hayuur adhi anó. 20Taai aku karaang kakhin, kakhin e ting kơi-kiq ađek, xong xók tơk, aku óóq chóóm ve lêi adhi anó kơi nôôq rau hơq aku rââm kiêng, aku kung óóq bâân adhi anó lêi kơi rau hơq adhi anó rââm đương; vaaih ve tââq tiq ađek rau tarkaai tarlak, makhinh, grâ jar-ââih, tambhiiq tampah, praaq uôr, raxiq-raxóq dhiq hóng, próng kriing, nhôôn nhaauq, 21kakhin e xong xók aku tơk machu dyơq, Yaang Pleng ưng aku ve chóóm têêng aku kachiit mat leq adhi anó, lơq aku kung phaai nhiim griit đóng bơk manưih kalóóng bơk nôôq manưih xók n'loom hei ơi têêng matu lơq ơi kah klôôq lóóm leq tarnêêng anhuq, taniêt tapiing, lơq padheng achak hơq piđó ơi têêng.