Katu Bible Literal Text
Ê-phê-sô 5
Kơi achêk phaai val kơi nôôq manưih ting tađuui Yaang Pleng, kơi akóón anaaq lóng bâân nh'nhơr liêm ưng Ađó, lơq phaai mamông kalóóng lóóm tanhơr, kung kơi Chuôq Paq Manưih ơi nh'nhơr nôôq he lơq chênh Ađó đơơp chêt taai nôôq he kơi mưi rau bhanuôih lơq adhah bhuôih palơq barbưưih n'naq thum tapôông leq Yaang Pleng.
Dyơq rau têêng taniêt, palơq dyóp rau kah liêm môôiq n'thaam nek patơk mơ óóq bâân pahei tơk dhiq m'pơng adhi anó, kơi rau achêk nek targlap palơq nôôq manưih huuiq liêm. Kung óóq praaq paraaq tataaiq, paraaq papóh, môôiq praaq bharlưưk bablôônh, nek nôôq rau kah targlap, hơq klóóih dhiq ađek palơq paraaq ma-ơơn. Alua kơi achêk, phaai n'nal rau ađôk đóng mưng dhakơi nek dyóp manưih têêng taniêt, kah liêm môôiq n'thaam, hơq nek manưih bhuôih kabhêi, maar kah ve drươp karvaan kalóóng katiêk karuung ưng Chuôq Paq Manưih lơq Yaang Pleng. Óóq đóng ngaai galơơk chachââr adhi anó palơq nôôq bóóp paraaq kah machak maraang, taai tââq nôôq rau achêk, ganơt pagrâ janah ưng Yaang Pleng n'toh leq dhiq nôôq akóón anaaq kah huuiq bóóp. Đóng hơq, adhi anó óóq xar kơi nôôq manưih ting tapâng palơq piđó, taai n'loom ahei adhi anó dyơq kanam kanheet, bơơi ađôk nek taklaaq brương kalóóng Chuôq. Phaai cha tơơt kơi akóón anaaq ưng rau brương (taai pô pale ưng rau brương tơơt m'pơng dyóp rau liêm kre, bhơt liêm, lơq alua dhalam), xók chagơn giit chamet lêi n'đó nek rau liêm lóóm Chuôq. Óóq ting tapâng leq nôôq tarnêêng kah malơơi malaai ưng rau kanam kanheet, bơơi phaai gluh pakah piđó pâng lơh, ơi alua nek kachiit mat xók chapiên pahei tơk nôôq tarnêêng piđó pei têêng kơi kadrêi lalââp. Bơơi dyóp rau bâân lêi drêh xók bâân pakah taai kalaaq brương, taai dyóp rau bâân lêi drêh maar nek kalaaq brương. Taai kơi ađek, ve paraaq praaq:
“Phaai taach mat yuur, ơơi manưih dyơq bêch,
phaai yuur pađâh tââq kalóóng kabhuh manưih chêt,
Chuôq Paq Manưih nek dyóól tabrương amei.”
Kơi achêk hơq, phaai đương lêi chagơn kơi adhi anó dyơq cha tơơt; óóq kơi manưih ngôôk ngaak, bơơi kơi manưih tabech galang, xók kapươk vech tangêi kaxe, taai nôôq tangêi nek môôp. Taai kơi achêk, óóq xar kơi manưih ngôôk ngaak, bơơi phaai n'nal n'đó nek karnóq kiêng ưng Chuôq. Óóq ból buôh, taai rau ađek nek huông hư. Palâh lóóiq, phaai bâân bing bhlaai palơq Yaang Liêm, tar-ââi palơq xóng ađêi palơq chachơp, bha-aar haanh lơq guôp babóóch parhei, palơq kalóóng lóóm ađêi babóóch chaxuul lơq bhi haanh Chuôq, tapôông paraaq ma-ơơn Yaang Pleng, nek Ama, kalóóng dyóp bhêêl leq dyóp rau vơn dhanóók Jê-su Chuôq Paq Manưih, Chuôq nôôq he, lơq huuiq bóóp xóng ađêi kalóóng rau bhi kakhin Chuôq Paq Manưih —
Manưih têêng kađiêl, phaai huuiq bóóp kayiik ađêi kơi huuiq bóóp Chuôq. Taai kayiik nek akoq kađiêl, kung kơi Chuôq Paq Manưih nek akoq Akóón Dhơn Chuôq, chênh Ađó nek Chuôq paq ưng achak araang. Dhơ kơi ađek, Akóón Dhơn Chuôq huuiq bóóp Chuôq Paq Manưih ng'kơi, nek kađiêl kung phaai huuiq bóóp kayiik ađêi kalóóng dyóp tarnêêng kơi achêk. Manưih têêng kayiik, phaai nh'nhơr kađiêl ađêi, kung kơi Chuôq Paq Manưih ơi nh'nhơr Akóón Dhơn Chuôq lơq đơơp chêt chênh ađêi taai Akóón Dhơn Chuôq; đóng Ađó ve chóóm paxar liêm kabhuh achêk, lơh xók têêng đóng sek tabah palơq kajut raau ưng đơơk kung palơq paraaq dhalam, buôn đóng Ađó đââng pakah mat đóng chênh Ađêi mưi Akóón Dhơn Chuôq cha-iil tabah, kah ve madhôôn bhrơuq môôiq garnhoq gartong, hamôôiq dhơ dharau haurau kơi achêk, bơơi đóng Akóón Dhơn Chuôq bâân sek tabah lơq kah dhiq jươm trêh. Ting dharing kơi achêk nek kayiik kung phaai nh'nhơr kađiêl ađêi kơi chênh achak ađêi. Manưih kayiik nh'nhơr kađiêl ưng ađêi nek nh'nhơr chênh ađêi. Taai yươq ngaai geet achak ađêi glêh mơ, bơơi ban paar lơq gamang lêi ađó, kung dhiêp kơi Chuôq Paq Manưih palơq Akóón Dhơn Chuôq, taai nôôq he nek nôôq dyung, têi, moh, mat ưng achak araang Chuôq. “Ơi taai ađek, manưih padruuih nek lơơi akonh kan lơq e bâân tơơt madhiq palơq kađiêl ađêi, miq bơơr e xar kơi mưi achak.” Rau lalââp hanua ađôk alua gamak bhlơng, bơơi aku dyơq praaq leq Chuôq Paq Manưih lơq leq Akóón Dhơn Chuôq. Dhơ kơi achêk, adhi anó kung ting kơi ađek ting chanak mưi, dyóp manưih kayiik phaai nh'nhơr kađiêl ađêi, kơi chênh ađêi, dyơq manưih kađiêl achêk nek chóóm bhi chap kayiik ađêi.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.