Ê-phê-sô 6

1Manưih têêng akóón, phaai xâng bóóp akonh kan ưng nôôq akóón kalóóng Chuôq, taai ađek nek rau alua dhalam. 2“Phaai bhi chap akonh kan ưng akóón,” ađek nek gani pachóóm laloom ting lơq paraaq hươq: 3“đóng phươk liêm tơk leq akóón lơq akóón ve chóóm bâân mamông đươnh dhiq katiêk.” 4Manưih têêng akonh óóq ơơr garâ akóón anaaq ađêi. Klóóih dhiq ađek, phaai ban paar piđó kalóóng rau klôôq padheep lơq pató pachóóm ưng Chuôq.

5Manưih têêng dhơn, phaai huuiq bóóp manưih kala ting phơn manưih ti palơq rau bhi chap lơq hayer kakhin dhiq lóóm lalua dhalam ưng ađêi thê kơi palơq Chuôq Paq Manưih, 6eh rau palơq kơi têêng yaauq xók kala chamet lêi kơi nôôq manưih kiêng pei lóóm, bơơi kơi dhơn ratơơq ưng Chuôq Paq Manưih, phaai têêng karnóq kiêng ưng Yaang Pleng palơq bhơt lóóm karnóq, 7huuiq xâng palơq lóóm kiêng têêng, kơi têêng yaauq đóng Chuôq hơq eh rau đóng palââng, 8Taai n'nal kơi dyóp manưih, dhơ têêng xól môôiq rathaai, la têêng tarnêêng liêm n'đó, hơq manưih achêk e đơơp rau markơi tư tââq Chuôq.

9Lơq, manưih têêng kala, phaai praaq têêng dhalam kơi ađek palơq nôôq dhơn ratơơq, xók parngau tarnêêng grươl teng, taai n'nal kơi Manưih Kala lơq ưng ađó lơq ưng adhi anó dyơq tơơt dhiq pleng, lơq kah ve paq katơq dhiq Ađó.

10Tatun xariêq, phaai bâân têêng đóng karơ gamak kalóóng Chuôq, lơq kalóóng praan karơ mataai raman ưng Chuôq. 11Phaai pei xơp tabhơt gróh linh ưng Yaang Pleng, buôn têêng đóng adhi anó ve chóóm dyương mưng, jaklâk lóóiq nôôq karnóq mangê ưng abhưi abhóch. 12Taai ganah tarvei tarjơl ưng nôôq he eh rau nek tarjơl palơq ahaam lơq ng'kar m'bech, bơơi nek tarjơl lóóiq nôôq têêng kala, tarjơl lóóiq nôôq takóh têêng gamak, tarjơl lóóiq nôôq kabhuh kadhâng koq hóng katiêk kanam kanheet ađô, tarjơl lóóiq nôôq yaang môôp tơơt nôôq dhiq m'piing pleng. 13Ơi taai ađek, phaai pei xơp tabhơt gróh linh ưng Yaang Pleng, đóng adhi anó ve chóóm tajơl taklót kalóóng tangêi tarleng, lơq dyương mưng lơh xók xong bhơt dyóp rau. 14Kơi achêk hơq, phaai dyương tamưng, xók xeet talêi xaneet ưng adhi anó palơq paraaq dhalam, pei xơp aau gróh ưng rau bhơt liêm, 15xruk leq dyung rau ơi ravang ưng Taruuih Liêm yươq rauha, 16tanôông payaal gahêêl gamak ưng lóóm huuiq kalóóng dyóp rau, taai ađek hơq adhi anó e ve chóóm m'bhrah tapat dyóp charah óih ưng manưih aak. 17Phaai vech panơơng gróh trôông paq lơq bhươt Yaang Liêm, hơq nek paraaq ưng Yaang Pleng, 18xók gavơh nhan dyóp bhêêl kalóóng Yaang Liêm pakah dyóp paraaq gavơh nhan lơq nhan panhel, lơq kanóq tơk machak maraang dhiq xók meh lóóm palơq tabhơt rau đuôh jruôn lơq rau gavơh nhan pakoom đóng tabhơt nôôq manưih huuiq liêm, 19lơq koom đóng aku, đóng taruuih liêm ve chóóm bâân đóng leq aku, kalóóng tarnêêng pơơh bóóp ưng aku palơq rau nhóól grâ, đóng praaq pakah rau hanua palââp ưng Taruuih Liêm 20(taai Taruuih Liêm achêk hơq aku vaaih xar manưih đââng taruuih dhiq m'pơng hadhơơp jarnah), buôn đóng kalóóng jarnah hadhơơp ađek, aku ve chóóm nhóól grâ truuih pachóóm ting kơi paraaq aku phaai praaq.

21Bơơi đóng adhi anó kung ve chóóm n'nal nôôq chiên pâng tơk aku, aku dyơq têêng haurau, nek Ti-chi-kơ, manưih adhi anó bơk nh'nhơr lơq dhơn ratơơq bhơt lóóm kalóóng Chuôq, e đóng adhi anó n'nal dyóp chiên, 22ađó chêk nek manưih hơq aku ơi yua tơk leq adhi anó taai tarnêêng ađôk, đóng adhi anó ve chóóm n'nal kakơi leq nôôq yi lơq lóóm adhi anó bâân tabhơơl.

23Nhan yươq rauha đóng leq adhi anó, kung palơq lóóm tanhơr lơq lóóm huuiq tââq Yaang Pleng, nek Ama lơq Chuôq, nek Jê-su Chuôq Paq Manưih. 24Nhan phươk liêm tơơt palơq tabhơt nôôq manưih nh'nhơr liêm Jê-su Chuôq paq manưih, Chuôq nôôq he, palơq lóóm tanhơr kah bil.