Ê-phê-sô 4:32

1Kơi achêk hơq, aku, manưih takról kalóóng Chuôq, mââl yua adhi anó phaai mamông kơi đu đaang palơq rau dhaloong yua đu adhi anó ơi bâân dhaloong tơk; 2Palơq tabhơt rau pakatưưiq lóóm lơq moor dha-iiq, kung palơq lóóm đuôh jruôn, đơơp maniin palơq xóng ađêi kalóóng lóóm tanhơr. 3Phaai raan tabhơt praan đóng jư rau markơi lóóm ưng Yaang Liêm kalóóng pajum patoom makơi luônh lóóm. 4Chapiên mưi achak araang lơq mưi Yaang Liêm, kung kơi adhi anó ơi bâân dhaloong tơk mưi lóóm rââm kalóóng rau dhaloong yua ưng ađêi, 5chapiên mưi Chuôq, mưi lóóm huuiq, mưi pheep bap-teem; 6chapiên mưi Yaang Pleng, Ama ưng dyóp ngaai, Yaang tơơt papiing dyóp ngaai, lơh dyóp ngaai lơq kalóóng dyóp ngaai. 7Bơơi ơơn phươk liêm ơi bâân đóng leq ting mưi chanak nôôq he ting mơ dhanang kalóóng rau pađơơp đóng ưng Chuôq Paq Manưih. 8Kơi ađek, ve paraaq xaraq:

“Xók Ađó dyók leq nôôq dhiq yaal,

Ađó vôôiq laloom ting đââng tanóói manưih takról,

lơq đóng bơk kliim kaliim leq akóón manưih.”

9Dhơ kơi ađek: “Ađó yuur dyók” nek harau kiêng móón la eh rau nek Ađó kung ơi dhaluônh tơk nôôq dhiq êêp ưng katiêk? 10Chênh Yaang ơi dhaluônh kung nek Yaang ơi dyók leq yaal lơh tabhơt nôôq klaang pleng, đóng Ađó ve chóóm têêng bing bhlaai dyóp rau. 11Chênh Ađó ơi patơơt masôôq têêng sưưq-đô, masôôq têêng manưih đââng taruuih Yaang Pleng, masôôq manưih têêng truuih đuui Taruuih Liêm, masôôq têêng Muk sư lơq manưih pachóóm, 12đóng đââng tơk rau ravang pasam nôôq manưih huuiq liêm đóng tarnêêng têêng yaauq, malóóm tơk rau tavaaih hayuur achak araang ưng Chuôq Paq Manưih, 13đóng patơk xók tabhơt nôôq he bâân tơk rau makơi lóóm kalóóng lóóm huuiq lơq rau dyóp n'nal Akóón Yaang Pleng, xar kơi manưih gamak taha, bâân tơk dhanang dyaang bhơt liêm ưng Chuôq Paq Manưih, 14đóng nôôq he yươq dyơq nek akóón paniên, bâân dhalươq dhaxươk lơq pajươk kamôôi ting dyóp ploong adhiiq hok taruuih tââq huông hư ưng palââng ve lóóm tabâân mangê palơq rau galơơk chachââr, môôp lơt. 15Klóóih dhiq ađek, xók praaq pagluh paraaq dhalam kalóóng lóóm tanhơr, nôôq he ve chóóm grơơt tahayuur dhiq dyóp rauriq malóóm tơk Ađó, Yaang nek akoq, hơq nek Chuôq Paq Manưih, 16patư tââq Ađó hơq bhơt achak araang bâân pajum lóóiq lơq patoom xóng piđó ve dyóp tahaal chauq dyring poor jóói, ting kơi mơ đuôh têêng vôôiq dhiq dyóp beq dhiq achak, têêng đóng achak araang grơơt gamak đóng tư têêng hayuur kalóóng lóóm tanhơr.

17Taai kơi ađek, aku praaq rau ađô lơq yua chut adhi anó kalóóng Chuôq, đóng kah dyơq cha tơơt thê kơi dhanuôr lââng dyơq, piđó mamông kalóóng rau kah matich ưng lóóm kanóq ađêi, 18Taai lóóm kanóq piđó ơi bâân têêng đóng kanam kanheet, xar kơi changaai chrih palơq rau mamông ưng Yaang Pleng tââq rau ngôôk khơl tơơt kalóóng piđó, tââq lóóm piđó nhâng nhóóng. 19Xók xar kơi kah n'nal kah đươi, piđó ơi patui ađêi mót rau bhuui sương đóng têêng dyóp rau anhuq palơq lóóm malóóch n'thaam. 20Bơơi adhi anó ơi kah hok n'nal Chuôq Paq Manưih kơi achêk, 21taai alua nek adhi anó ơi xâng leq Ađó lơq ơi bâân pachóóm kalóóng Chuôq, ting kơi paraaq dhalam tơơt kalóóng Chuôq Jê-su, 22kơi phaai lôh m'peq tââq adhi anó nôôq rau pâng leq kalơng mamông n'loom ahei, hơq nek akóón manưih ti bâân chêt bil taai lóóm malóóch kiêng galơơk chachââr, 23hơq bâân têêng vaaih tame ve Yaang liêm kalóóng lóóm karnóq ađêi; 24lơq pei xơp akóón manưih tame, nek manưih bâân yuur tavaaih kơi Yaang Pleng, kalóóng rau bhơt liêm lơq rau sek tabah ưng paraaq dhalam.

25Kơi achêk hơq, xók ơi m'peq lơơi rau galơơk chachââr; dyóp ngaai phaai praaq rau lalua dhalam palơq manưih dharing tapóóng ađêi, ơi taai nôôq he nek dyung, têi, moh, mat ưng xóng ađêi. 26Adhi anó bâân yuur pagrâ hơq yươq têêng lơt. Phaai lơơi mat tangêi kah xriêp dhiq rau ơơr jar-ââih adhi anó, 27kung óóq tavaaih ve bhêêl đóng abhưi abhóch. 28Manưih tatông papei óóq tatông papei dyơq. Bơơi liêm lơh, manưih achêk phaai tabhơt praan têêng tarnêêng liêm kre palơq chênh bơơr têi ađêi, buôn đóng manưih achêk ve đóng blah nh'xóóng palơq ngaai nôôq dyơq tơơt kalóóng ganah tabhuch tapiêl. 29Óóq đóng paraaq praaq anhuq n'đó pađóh gluh tââq bóóp adhi anó, hơq phaai praaq nôôq paraaq n'đó kre liêm kanóq tơk rau têêng payuur ngaai manưih kalóóng ganah kadhaap kara, đóng paraaq achêk ve chóóm đââng ơơn liêm đóng manưih xâng. 30Lơq óóq têêng ranguôq Chuôq Yaang Liêm ưng Yaang Pleng, taai Ađó hơq adhi anó bâân tabóq karnal đóng tangêi trôông paq. 31Phaai m'peq lơơi tââq adhi anó tabhơt ahaaq atang, grâ jar-ââih, môôp lóóm, tarkaai tarlak, praaq tamôôp, palơq dyóp rau lơt aak. 32Klóóih dhiq ađek, phaai pakah đóng xóng ađêi lóóm moor dha-iiq, ayô ka-er, lơơi lơt xóng ađêi kung kơi Yaang Pleng ơi lơơi lơt adhi anó kalóóng Chuôq Paq Manưih.