Katu Bible Literal Text
Tarnêêng Nôôq Sưưq-đô 26
Kơi ađek hayơq, bhua Ak-riip-ba móón palơq Phaau-lô: “Amei chóóm pheep buôn truuih đuui leq ađêi.” Tơk bhêêl ađôk, xong xók hayuur têi gluh, Phaau-lô tư paq paraaq, kơi ađô:
“Nhan móón bhua Ak-riip-ba, parpâng tơk dyóp rau hơq aku bâân takaauq tââq manưih Jo Thaaiq, aku lêi ađêi lalua tarhơơnh xók ravang tư pâân paq ađêi toom mat bhua tangêi ađôk, tââm nek taai bhua nek manưih n'nal giit tabhơt nôôq gani takóh lơq paluch nôôq rau dhơơm tavaaih tarkaai dhiq m'pơng kalóóng manưih Jo Thaaiq. Kơi ađek hayơq aku nhan bhua đơơp jruôn tameng xâng aku. Alua kơi ađek, dyóp ngaai manưih Jo Thaaiq maar n'nal kơi mamông ưng aku patư tââq paniên, ơi vaaih tââq xók tââp tanââp dhiq m'pơng dhanuôr aku kung kơi dhiq Jê-ru-sa-leem, taai ơi loom n'nal leq aku tââq đươnh, hayơq la piđó ve lóóm đóng truuih đuui, hơq ađek nek aku ơi mamông ting kabhuh pagei tââm kalóóng lóóm huuiq ưng nôôq yi, nek kabhuh Pha-ri-si. Xók ađôk, aku dyương dhiq ađô đơơp xêi xanêi nek taai lóóm rââm dhiq paraaq hươq Yaang Pleng ơi têêng palơq nôôq abhươp avuôq ưng nôôq yi, nek paraaq hươq hơq majêt bơơr kabhuh nôôq yi dhiq rau bhơt lóóm, xók đương rââm đóng bâân đơơp, xók bhuôih haanh Yaang Pleng tangêi lơq hayum. Nhan móón bhua, chênh taai rau lóóm rââm achêk, aku đôk bâân takaauq patu tââq manưih Jo Thaaiq. La Yaang Pleng têêng manưih chêt mamông lóóiq, hau kơi rau ađek bâân đóng nek chiên kah chóóm bâân huuiq dhiq m'pơng kalóóng nôôq pe? Alua kơi ađek, aku ơi glêh karnóq kiêng phaai têêng bơk kơi tajơl ting kơi palơq dhanóók Jê-su Na-xa-reet, nek nôôq tarnêêng hơq aku ơi têêng patơk dhiq Jê-ru-sa-leem, aku patơk mơ dyơq kóóp król bơk manưih huuiq mót đong kanam xong xók đơơp kataai tââq nôôq takóh kadhâng bhanuôih bhơt liêm, lơq miq bhêêl xók piđó bâân leng chêt, nek aku ơi xaraq bha-aar ting tađuui. Xók taluôn janah piđó dhiq dyóp đong gươl, aku ơi kóóp kayua kajuq piđó phaai praaq chôlô, chadrươh ađek taai kabhróónh bhlơng, aku patơk mơ ơi vôôiq kóóp janah piđó đóng patơk luch nôôq kanóón dhanuôr katiêk lââng, hơq kalóóng nôôq tarnêêng kóóp janah achêk, dyơq xók vôôiq kalơng tơk Đa-met chadrươh palơq kataai lơq đơơp tarnêêng tââq nôôq takóh kadhâng bhanuôih bhơt liêm, nek nhan móón bhua, bhêêl m'pơng dhơng, dhiq kalơng vôôiq, aku lêi kalaaq brương tââq pleng, cha-iil chalóng lơh mat tangêi, dyóól charoh xavaang praang aku lơq nôôq manưih xók vôôiq mandrươh palơq aku. Chadrươh ađek, xong xók tabhơt nôôq yi pachruum chok leq katiêk, aku xâng mưi dhariêng praaq móón palơq aku palơq dhariêng Hê-bơ-rơ: ‘Saau-lơ, Saau-lơ, hau akóón janah Aku? Alua lóng hadhơơp xââng đóng akóón xók chadhơp leq nok huuch.’ Tatun ađek, aku tamóh: ‘Kakoh Chuôq, Amei nek ngaai?’ Hayơq Chuôq móón: ‘Aku nek Jê-su, Yaang hơq akóón xók kóóp janah. Dhơ kơi ađek, phaai yuur dyương lơq dyương tapat dhiq dyung ađêi, ơi taai rau ađôk hơq Aku ơi tabhral palơq akóón, đóng chaleq akóón têêng dhơn ratơơq lơq manưih truuih đuui paluch tơk nôôq rau akóón ơi lêi dhiq Aku, lơq nôôq rau Aku ơi pakah leq akóón, xók paq jóói akóón lơh tââq dhanuôr ađêi lơq lơh tââq nôôq dhanuôr katiêk lââng hơq Aku kayua akóón vôôiq, buôn lóng mat piđó, hơq đóng palâh lơh tââq bóng kanam chô leq kalaaq brương, lơq lơh tââq praan karơ ưng Sa-taan tơk palơq Yaang Pleng, đóng piđó pei đơơp rau lơơi matu lơt, palơq drươp kavaan dhiq m'pơng nôôq manưih ơi bâân pasek tââq lóóm huuiq dhiq Aku.’ Taai kơi ađek, nhan móón bhua Ak-riip-ba, aku ơi yươq khin kaai ting kơi palơq tapalêi tââq pleng achêk, palâh lóóiq, laloom tââm aku ơi truuih pachóóm đóng nôôq manưih dhiq Đa-met, hayơq tabhơt dhiq Jê-ru-sa-leem, lơq plok xưưq Ju-đê, ting đóng nôôq dhanuôr katiêk lââng, phaai klôôq lóóm lơq val chô palơq Yaang Pleng, yuur têêng nôôq tarnêêng pâng dhalam palơq klôôq lóóm achêk. Taai ơi nôôq tarnêêng ađek, manưih Jo Thaaiq, xong xók kóóp jư aku kalóóng đong bhanuôih, bhiêk chêk tabâân leng aku. Kơi ađek, ơi bâân đơơp paq jóói tââq Yaang Pleng đóng tơk tangêi mađôk, aku ơi yuur dyương, truuih đuui drươh đóng manưih paniên, drươh đóng leq manưih taha, kah praaq rau lââng lơh, nôôq rau hơq tabhơt nôôq manưih đââng taruuih palơq Môôi-se ơi praaq nek ravang yuur vaaih — kơi Chuôq Paq Manưih bâân đóng phaai đơơp janah, lơq ơi nek manưih tââp tanââp gluh tââq rau mamông lóóiq ưng nôôq manưih chêt, Ađó lalua e truuih đuui rau brương paluch đóng dhanuôr nôôq yi palơq nôôq dhanuôr katiêk lââng.”
Bhêêl achêk, xók ađó ơi tư paraaq paq palơq nôôq rau ađô, Phê-tu praaq pakarơ dhariêng kơi ađô: “Amei xươl aq, Phaau-lô ơơi! Tarnêêng tabâân hok bơk kuôq têêng amei xar manưih kah n'nal rarau.” Bơơi Phaau-lô móón: “Aku yươq vaaih xươl, nhan móón abhươp Phê-tu bhi chap, palâh lóóiq aku xók móón nôôq paraaq dhalam lơq karnóq brương. Taai bhua n'nal tơk nôôq tarnêêng ađô — aku patơk mơ yươq kakhin ââi palơq amei — tââq aku huuiq lalua kah mưi rau lââng kalóóng nôôq chiên ađô bâân kadrêi bhua, taai rau tarnêêng achêk nek ơi kah ve bâân têêng dhiq mưi m'phooq n'tól ađek tôôh. Nhan móón bhua Ak-riip-ba, bhua huuiq nôôq manưih đââng taruuih kah? Aku n'nal nek bhua huuiq.” Bơơi Ak-riip-ba móón Phaau-lô; “Amei kiêng pei lóóm aku đóng aku xar manưih huuiq Chuôq đâh nek kơi dhơq?” Bơơi Phaau-lô ââi: “Lalua nek aku nhan gavơh Yaang Pleng, dhơ kalóóng ganah êêp môôiq yaal, kah mơ bhua, hơq dyơq tabhơt nôôq ngaai xâng aku tangêi mađôk bâân xar ting marau mađó kơi aku xók ve, kah xêi nôôq tarlêi xiêng ađô.”
Hayơq bhua yuur dyương, palơq kuôn kadhâng xưưq, dyơq amooq Bê-rê-niit lơq nôôq manưih xók tơơt palơq piđó, lơq xong xók yuur xooq, piđó tapraaq xóng ađêi, móón kơi ađô: “Manưih ađô yươq rau têêng đaang chêt môôiq tơơt đong kanam.” Hayơq bhua Ak-riip-ba móón palơq Phê-tu: “Manưih ađô biêh ve chóóm bâân paloh, la ađó ơi yươq kaauq leq Xê-xa.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.