Tarnêêng Nôôq Sưưq-đô 27

1Xók achêk, xók kanóq ơi bâân pakah đóng leq nôôq yi vôôiq leq kalơng taxiiq tơk I-ta-li, nek piđó pajaau bhơt Phaau-lô lơq masôôq manưih matu lââng đóng mưi takóh linh kadhâng koq, achak Ju-lơ, mađó kabhuh linh Ơu-gu-ta. 2Bhêêl achêk, xók ơi bhadyaang dyung leq mưi beq jatau tââq A-tra-miit, xók ravang ravưa chaang taxiiq tơk nôôq dhiq taring leq A-si, nek nôôq yi bâân đââng leq taxiiq, A-ri-taak, manưih kanóón Tê-sa-lô-ni-ka, xưưq Ma-xê-đoan dhiq palơq nôôq yi. 3Hayơq tangêi rayiiu, nôôq yi bóói mót leq Si-đôôn, chadrươh Ju-lơ, ơi yaauq palơq Phaau-lô kơi liêm bhlơng, ơi đóng pheep ađó tơk palơq nôôq parjơơk đóng ve bâân rau gamang ưng piđó. 4Tââq dhiq ađek, xong xók gluh vôôiq leq taxiiq, nôôq yi đóng jatau pagriêq kôông Chiip-rơ ơi taai dhiiq xók pruung chachriik. 5Chadrươh, xong xók chaang gan prah taxiiq chóók ting Si-li-si lơq Baam-phi-li, nôôq yi ơi bóói mót leq jarơm Mi-ra, mađó leq Li-si. 6Dhiq ađek, taai takóh kadhâng koq linh bâân lêi mưi beq jatau tââq A-lek-xan-tri ve vôôiq kalơng taxiiq tơk I-ta-li, hayơq ađó đââng nôôq yi dyók leq jatau ađek. 7Hayơq, bhluuch bơk tangêi vôôiq jih lơq xók ơi tơk đan Kơ-niit mưi kơi hadhaap, nek taai dhiiq kah đóng pheep nôôq yi tơk đan lơh dyơq, nôôq yi ơi đóng jatau pagriêq kôông Kơ-rêêt, chaang gan Sa-môôn. 8Hayơq bhiêk vôôiq taring tóór palơq kôông achêk mưi kơi hadhaap, nôôq yi vôôiq tơk mưi dham tôôh bâân đóók nek Mi Kaang, dham ađô dhiq đan kanóón La-sê.

9Bơơi taai ơi bil bơk bhlơng tangêi, lơq kalơng vôôiq taxiiq nek ơi xar kadhaap taai patơk mơ ơi lơh ganah điêng cha lơh vaq, hayơq Phaau-lô móón praaq, 10xók praaq palơq piđó, kơi ađô: “Nhan móón adhi anó, aku lêi kơi kalơng vôôiq taxiiq ađô ve ngóq e talum palơq bhrê hư lơq bơk hư bil, eh chapiên nôôq đô-đaak lơq jatau, hơq dyơq parmông ưng nôôq he dyơq.” 11Bơơi takóh linh kadhâng koq bâân xâng bóóp tââq manưih laaiq jatau lơq kala jatau lơh nek nôôq paraaq bâân Phaau-lô praaq pakah. 12Dhơ kơi ađek, taai jarơm kah kre đóng bóq jatau leq nil hapruôt, hayơq bơk manưih pakah praaq xêi gluh vôôiq leq taxiiq tââq dham ađôk, la palơq tarnêêng ve kơi, nek piđó ve chóóm mót leq jarơm tơơt dhiq Phê-niit, mưi jarơm dhiq Kơ-rêêt, lêi ting hót bhlưa charhóóng mat bhlót lơq ting hót bhlưa charhóóng hót lóóm, đóng ting xâng nil hapruôt. 13Xók achêk, xók dhiiq charhóóng hóng pruung taxiin, taai ngóq ơi pâng kơi kanóq, hayơq xong xók rôôq nok, piđó đóng jatau mut tring ting tóór, đan griêq kôông Kơ-rêêt. 14Bơơi kah mơ đươnh dyơq, mưi gral dhiiq gamak bhlơng bâân đóók nek Ơ-ra-kui-lôôn, tââq kôông pruung chok leq. 15Xók achêk, xók jatau ơi bâân palóóng lơq kah chóóm tajơl palơq dhiiq đuôh dyơq, nek xong xók lơơi mak kơi, nôôq yi bâân lóóng. 16Bơơi xong xók mut tring ting hót đơp dhiiq ưng mưi kôông achêk bâân đóók nek Kơ-lô-đa, nek kadhaap bhlơng nôôq yi hơq ve chóóm tabâân kadhâng bhuông trôông parmông katưưiq, 17nek rau hơq xók ơi ruiq padyók, piđó pei đươi nôôq rau dhơơm chóóm đươi, gariêq jư jatau đóng tamưng. Chadrươh ađek, taai kakhin, n'nal kơi ve n'jau kađóóng hariêq dhiq xuôr tóór Si-rơ-tơ, nek xók ơi đóng patôq talêi chok leq, piđó bhiêk lơơi đóng lóóng kơi ađek. 18Bơơi xók nôôq yi bâân dhiiq m'bhrah tatech taheek, nek tơk tangêi rayiiu, palââng tââp laloom vuung đô-đaak chok leq taxiiq đóng hangiil jatau. 19Lơh tangêi đu pe, piđó tư têi vuung chok leq taxiiq nôôq đô-đaak dhiq jatau. 20Xók achêk, bhêêl xók kah ve mat tangêi kung kah ve nôôq xatur vaaih dhiq bơk tangêi, chadrươh dhiiq gamak bhlơng bhiêk dyơq janah nôôq yi, nek tabhơt rau rââm dyơq lóóiq ng'kơi đóng nôôq yi bâân trôông ơi bâân bil luch. 21Hayơq xók lơh mưi ganah đươnh kah chacha, nek Phaau-lô, xók yuur dyương dhiq m'pơng piđó, ơi praaq: “Nhan móón nôôq pe, kơi parpâng la ơi xâng kơi aku óóq yuur vôôiq gluh tââq Kơ-rêêt, nek kung ơi bâân viêr bhrê hư lơq hư bil ađô. 22Xók ađôk, aku nhan móón adhi anó yuur panhóól, taai e yươq ve bhrê hư leq parhââm akóón manưih dhiq m'pơng adhi anó, hơq chapiên bil jatau ađô giêl. 23Taai yum ađôk, mưi dhơn pleng tââq Yaang Pleng, Yaang aku mađó lơq nek Yaang aku bhuôih haanh, ơi dyương hót tóór aku, 24móón: ‘Phaau-lô, óóq kakhin. Amei kơng phaai dyương dhiq toom Xê-xa, hayơq phaai lêi tôôh, tââq lóóm ayô ka-er Yaang Pleng ơi đóng leq amei dyóp ngaai dyơq vôôiq dhiq kalơng vôôiq taxiiq chadrươh palơq amei.’ 25Taai kơi ađek, nhan móón adhi anó, phaai mưng lóóm! Taai aku huuiq ganơơm Yaang Pleng, kơi rau tarnêêng e yuur vaaih kơi ađek, ting kơi rau ơi bâân truuih leq aku. 26Bơơi nôôq he phaai kađóóng hariêq dhiq mưi beq kôông mak ađó.”

27Xók achêk, xók tơk hayum đu majêt puôn, dhiq xók nôôq yi bhiêk dyơq lalơơng dhơơng dhiq Taxiiq A-đơ-ria-tiit, nek đan m'pơng hayum, nôôq manưih gaai jatau đóng kơi piđó n'dhương đan tơk mưi dham katiêk mak ađó. 28Xong xók patôq pale dhanang, piđó lêi dhơuq bơơr jêt achương, hayơq vôôiq grơơt mưi gral changaai lơh, lơq val patôq pale dhanang, piđó lêi dyơq majêt xââng achương. 29Chadrươh ađek, taai ơi kakhin, kah machưng nôôq yi nh'jau chóóm ng'guh leq dhơl klêch mak dhiq ađek, hayơq xók ơi patôq puôn beq nok dhâng tââq dham chađui jatau, piđó đương rââm tơk pleng brương. 30Bơơi xók nôôq manưih gaai jatau tabâân yuur klôôn tââq jatau lơq đóng padhaluônh bhuông trôông katưưiq chok leq taxiiq, xanaan têêng kơi kanóq vôôiq patôq nok tââq koq jatau, 31Phaau-lô móón palơq takóh linh kadhâng koq lơq nôôq kabhuh linh: “La nôôq manưih ađô kah tơơt lóóiq dhiq jatau, nôôq pe kah chóóm bâân trôông.” 32Kơi ađek nek nôôq linh kut patươt talêi bhariêq ưng bhuông trôông parmông lơq lơơi đóng ađó yuur lóóng. 33Xók achêk, đóng tơk xók pleng đan val kơi brương kiêt, Phaau-lô móón bhơơl dyóp ngaai phaai cha m'bưưiq chana, kơi ađô: “Xók dyơq đương rââm đóng patơk vaar ađôk, tangêi đu majêt puôn, adhi anó dyơq bhiêk tơơt tadhrơng, kah đơơp cha marau marâ. 34Kơi ađek, aku nhan adhi anó phaai cha m'bưưiq chana, taai rau ađek nek ravang đóng rau paq jóói adhi anó. Taai kah ngaai kalóóng adhi anó e bil mưi n'dreh xok dhiq koq.” 35Kơi ađek nek, xók ơi praaq kơi ađek lơq pei pagluh beng, ađó ma-ơơn Yaang Pleng toom mat dyóp ngaai, hayơq xong xók veh beng, ađó ravang cha. 36Hayơq xók dyóp ngaai ve bâân rau tabhơơl lóóm, nek chênh piđó ơi pei chana cha. 37Xók achêk, nôôq yi ve tabhơt bơơr hariêng tapól jêt chapat chanak dhiq jatau. 38Lơq hayơq, xók bâân kabhôôq luônh palơq rau cha xong, piđó têêng pahangiil jatau, palơq kơi vuung haró aviq chok leq taxiiq. 39Xók achêk bhêêl pleng ơi brương, piđó kah n'nal xưưq achêk, bơơi piđó bâân lêi mưi beq n'tól achêk ve xuôr taxiiq, nek dham hơq piđó tapraaq xóng ađêi lêi ve chóóm gaai jatau mót chóóm kah. 40Kut m'peq talêi nok xong, piđó lơơi lóóiq dhiq taxiiq. Chadrươh ađek, xong xók lêh talêi benh chir lơq yoong bhaai dhiq moh jatau, nek ting kalơng dhiiq, piđó jư đóng jatau jaluông tapat tơk tóór taxiiq. 41Bơơi xók ng'guh dhalam dhiq bơơr palô đơơk tajaap nek jatau kađóóng hariêq, lơq taai moh jatau tagliêq mưng dhiq ađek, jatau bhiêk kah chóóm pagơơt m'bưưiq m'bâ, dyơq chađui jatau nek bâân havóh lêêk taai ga-uul karơ. 42Bhêêl achêk, karnóq ưng kabhuh linh nek ng'kơi têêng đóng piđó leng chêt nôôq manưih tơơt đong kanam, nh'jau kơi mak ngaai ve chóóm loh taai bhaluôh lơh. 43Bơơi taai kiêng paq Phaau-lô, takóh linh kadhâng koq ơi kajơq karnóq ưng piđó, chadrươh ađó kayua parâng đóng ngaai dhơơm chóóm bhaluôh laloom tââm chrơm gluh tââq jatau đóng bhaluôh leq kakóóng, 44lơq nôôq manưih đu dyơq, ve ngaai bhuôm leq nôôq tala bhaan, dyơq nôôq chanak tôôh pei nôôq rau lââng tââq jatau, hayơq ting kơi achêk, rau vaaih tơk leq tabhơt nôôq yi nek bâân đââng dyók leq kakóóng kơi yươq rau ha.