Tarnêêng Nôôq Sưưq-đô 23

1Xók achêk, xong xók lêi li-mrang leq kabhuh xêi xanêi, Phaau-lô praaq: “Nhan móón nôôq pe, nhan móón nôôq adhi anó, aku ơi mamông toom mat Yaang Pleng palơq paluch lóóm liêm sek tabah đóng tơk tangêi mađôk.” 2Bơơi takóh kadhâng bhanuôih bhơt liêm A-na-nia praaq parâng đóng nôôq manưih dyương đan ađó m'bhah leq bóóp ađó. 3Tơk bhêêl ađô, Phaau-lô móón palơq ađó ađek: “Jađơr bâân kathel parhóm bhóók tôôh, Yaang Pleng ravang m'bhiiq amei! Amei tơơt xêi xanêi aku ting gani, hơq praaq kayua đóng aku bâân tambhiiq lơt gani alua?” 4Dhơ kơi ađek, nôôq manưih dyương tóór ađek móón: “Amei xók praaq môôp takóh kadhâng bhanuôih bhơt liêm ưng Yaang Pleng alua?” 5Phaau-lô móón: “Nhan móón adhi anó, aku ơi kah n'nal kơi ađó ađek nek takóh kadhâng bhanuôih bhơt liêm. Taai ơi ve xaraq kơi ađô: ‘Amei óóq praaq rau tamôôp palơq manưih kadhâng akoq dhanuôr ađêi.’”

6Kơi ađek hayơq, xók bâân lêi kơi mưi kabhuh nek manưih Sa-đu-sê, dyơq kabhuh tôôh nek manưih Pha-ri-si, Phaau-lô ơi praaq karơ dhariêng dhiq m'pơng Kabhuh Xêi Xanêi, kơi ađô: “Nhan móón nôôq pe, nhan móón nôôq adhi anó, aku nek mưi manưih Pha-ri-si, akóón ưng manưih Pha-ri-si; Aku xók bâân xêi xanêi tapâng tơk rau lóóm rââm lơq mamông lóóiq ưng manưih chêt.” 7Xók achêk, xók ađó móón rau ađô, nek mưi rau tarkaai val vaaih dhiq m'pơng manưih Pha-ri-si lơq manưih Sa-đu-sê, hayơq kabhuh manưih bâân yuur tablah 8Taai manưih Sa-đu-sê praaq kơi kah ve mamông lóóiq, kung kah ve dhơn pleng môôiq nôôq yaang, bơơi manưih Pha-ri-si nek đơơp huuiq miq bơơr rau ađek. 9Kơi ađek hayơq, dhariêng lalơu jơl kah đươi kabroong val vaaih, lơq xong xók yuur dyương, masôôq takóh pachóóm gani mađó kabhuh Pha-ri-si tarkaai, kơi ađô: “Nôôq yi kah lêi ve matu lơt rauriq dhiq manưih ađô. Hơq ngaai n'nal, mưi yaang môôiq dhơn pleng ơi praaq palơq ađó ađek …” 10Lơq hayơq, xók tarkaai tarlak val xar karơ, takóh linh kadhâng koq, taai kakhin e Phaau-lô ve chóóm bâân piđó tech heek, ơi kayua parâng đóng nôôq kabhuh linh vôôiq dhaluônh pei jeng ađó tââq m'pơng piđó, chadrươh đââng ađó leq pơơq linh.

11Bơơi, tơk hayum tangêi rayiiu, xók tơk hót tóór ađó, Chuôq praaq: “Phaai mưng lóóm taai akóón ơi truuih đuui leq Aku ng'kơi dhiq Jê-ru-sa-leem, nek rau kơng bhlơng đóng akóón kung nek truuih đuui kơi ađek dhiq Rô-ma.”

12Kơi ađek hayơq tơk brương, xong xók xêi mangê xóng ađêi, nôôq manưih Jo Thaaiq tư praaq ng'kóh parâng, kơi kah cha kung kah ơm đóng tơk xók nôôq piđó bâân leng Phaau-lô. 13Bhêêl achêk, ve lơh puôn jêt chanak xêi mangê ađô, 14hơq xók tơk palơq nôôq takóh kadhâng bhanuôih bhơt liêm lơq nôôq takóh bhươl, piđó móón: “Nôôq yi ơi paraaq ng'kóh parâng mưi paraaq tanóh chênh ađêi đóng kah cha rauriq đóng tơk xók nôôq yi bâân leng Phaau-lô. 15Taai kơi ađek, xók ađôk, nhan nôôq pe palơq Kabhuh Xêi Xanêi pakah mat toom takóh linh kadhâng koq, kơi ngóq xók karnóq praaq xêi đóng giit lơh nôôq rau dhơơm pâng tơk ađó, đóng ađó ađek ve chóóm đââng xêi ađó dhaluônh leq nôôq pe. Dyơq nôôq yi nek ravang đóng leng ađó loom xók ađó tơk leq ađek.” 16Bơơi akóón padruuih ưng mamóóq Phaau-lô, taai ơi xâng leq mangê đương choop góón, hayơq xong xók tơk lơq mót leq kalóóng pơơq linh, ơi truuih chiên ađô đóng Phaau-lô. 17Kơi ađek nek, xók ơi dhaloong mưi kalóóng nôôq linh têêng koq lóóiq, Phaau-lô móón: “Nhan đââng padruuih tadhóm ađô tơk palơq takóh linh kadhâng koq, taai ađó ve rau truuih chiên leq ađó achêk.” 18Kơi ađek, xong xók đââng padruuih ting, linh têêng koq ơi đââng ađó tơk lum takóh linh kadhâng koq lơq móón: “Phaau-lô manưih takról, xong xók dhaloong aku, ơi kayua aku đââng padruuih tadhóm ađô tơk leq amei, taai ve rau phaai praaq palơq amei.” 19Kơi ađek nek, xong xók ơi kadhâng têi ađó lơq chơơng mót dhiq lalââp, takóh linh kadhâng koq tamóh: “Rau hơq amei ve đóng truuih chiên leq aku nek hau?” 20Xók achêk padruuih ââi kơi ađô: “Nôôq manưih Jo Thaaiq ơi makơi lóóm nhan yua amei ng'kơi đóng tangêi rayiiu amei ve chóóm đââng Phaau-lô dhaluônh leq Kabhuh Xêi Xanêi, kơi ngóq xók karnóq praaq xêi kơi giit lơh leq ađó achêk. 21Taai ađek, nhan amei óóq đóng nôôq piđó đươk lóóm, taai lơh puôn jêt chanak kalóóng sôôq piđó xók kadrêi đương choop góón ađó achêk, nek nôôq manưih ơi tư praaq ng'kóh parâng kah cha kung kah ơm đóng tơk xók bâân leng ađó. N'drươh xók ađôk piđó ơi ravang, đương rââm rau đơơp xâng tââq amei.” 22Kơi ađek, takóh linh kadhâng koq đóng padruuih tadhóm gluh chô, pató ađó: “Óóq đóng ngaai n'nal nek amei ơi truuih chiên leq aku nôôq chiên ađô.” 23Xong xók dhaloong bơơr nak linh têêng koq tôôh, ađó móón: “Phaai ravang bơơr hariêng linh palơq tapól jêt linh dhââng axeh lơq bơơr hariêng linh kadhâng kóóih kơi đóng kabhuh linh ve chóóm yuur vôôiq leq Sê-sa-rê leq jơ đu pe hayum ađôk,” 24chadrươh ravang đóng adhah dhââng buôn đóng leq Phaau-lô dyók dhââng, tanóói ve chóóm đââng ađó ađek yươq rauha tơk leq kuôn têêng kala xưưq Phê-liit, 25Dhiq xók ơi xaraq bha-aar ve kiêng móón kơi ađô:

26“Kơ-lôôt Li-sia pagơơi kuôn têêng kala xưưq Phê-liit bhi chap: Chap yayar khe liêm. 27Manưih ađô, xong xók bâân takóóp tââq manưih Jo Thaaiq lơq ravang bâân palââng leng, nek aku ơi jóói poor xók lóón tơk kung palơq nôôq linh, taai bâân n'nal kơi manưih ađô nek dhanuôr La-ma. 28N'drươh ađek, taai kiêng n'nal leq paraaq kaauq patu hơq taai ađek piđó kaauq ađó ađek, aku ơi đââng ađó ađek dhuônh leq Kabhuh Xêi Xanêi ưng piđó, 29hơq aku lêi ađó ađek bâân takaauq ve pâng nôôq tarkaai leq gani takóh ưng piđó, bơơi eh rau ve takaauq lââng chóóm chêt hamôôiq tamót đong kanam. 30Kơi ađek hayơq, xong xók mưi mangê e val vaaih makhich palơq manưih ađô bâân pakah đóng aku, aku ơi n'drươh đââng manưih ađô tơk leq amei, xók kung kayua parâng đóng nôôq manưih kaauq patu phaai xêi xanêi manưih ađô toom mat amei.”

31Kơi ađek, nôôq kabhuh linh, ting paraaq râng bâân kayua đóng leq ađêi, xong xók đââng Phaau-lô ting, ơi đââng ađó vôôiq kalóóng hayum kanam tơk An-ti-ba-tri. 32Hayơq tangêi rayiiu, piđó val chô leq pơơq linh, xók ơi lơơi linh dhââng axeh bhiêk vôôiq palơq ađó, 33hơq kabhuh linh ađô, xók ơi mót leq kalóóng kanóón Sê-sa-rê lơq pajaau bha-aar đóng kuôn kala xưưq, nek kung ơi đââng pakah Phaau-lô đóng ađó achêk. 34Xók achêk, xong xók đââng bha-aar lơq tamóh ađó nek n'niên tââq n'đó xưưq, hayơq xók ơi n'nal nek dhiq xưưq Si-li-si, 35kuôn kala xưưq móón: “Aku e xêi xanêi amei ting gani xók nôôq manưih kaauq patu amei kung tơk ađôk”, hayơq kayua đóng ađó bâân đương jư kalóóng đong ưng Hê-rôôt.