Tarnêêng Nôôq Sưưq-đô 22

1“Nhan móón nôôq pe, nôôq adhi anó lơq nôôq ama ayêi, nhan xâng paraaq paq ưng aku palơq nôôq pe xók ađô.”

2Bhêêl achêk, xók xâng kơi ađó dyơq papraaq palơq dhariêng Hê-bơ-rơ palơq ađêi, piđó n'dhương dyơq parngau lơh dyơq. Hayơq ađó móón:

3“Aku nek manưih Jo Thaaiq, n'niên dhiq kanóón Taat-sơ xưưq Si-li-si, bơơi bâân hok kalóóng kanóón ađô raal dyung thêi Ga-ma-li-êên, bâân pachóóm ting kalơng vôôiq pagat ưng gani đơơp xâng tââq abhươp ama, ve lóóm bhreh bhriêl leq Yaang Pleng thê kơi tabhơt nôôq pe xók ve tangêi mađôk, 4nek manưih ơi kóóp janah Taruuih ađô đóng tơk chêt, xók kóóp klooiq lơq tamót leq đong kanam paluch padruuih palơq pađiil, 5i kơi takóh kadhâng bhanuôih bhơt liêm truuih đuui đóng aku palơq tabhơt nôôq takóh bhươl, nek nôôq manưih hơq xong xók đơơp bha-aar tââq dham piđó pagơơi đóng nôôq adhi anó, aku yuur vôôiq tơk Đa-met, vôôiq kóóp klooiq nôôq manưih bâân takóóp jư tơơt dhiq ađek chô tơk leq Jê-ru-sa-leem, buôn đóng piđó ve chóóm bâân taphaak. 6Xók achêk, chiên val vaaih đóng aku ađek nek xók vôôiq kalơng lơq đan tơk Đa-met, mơ m'pơng dhơng, parmat, mưi kalaaq brương lóng karơ tââq pleng dyóól klaaq xirvir aku. 7Chadrươh, aku n'tôq chok leq katiêk lơq xâng mưi dhariêng praaq palơq aku, kơi ađô: ‘Saau-lơ, Saau-lơ, hau akóón janah Aku?’ 8Kơi ađek hayơq, aku ââi lóóiq: ‘Chuôq ơơi, Amei nek ngaai?’ Ađó praaq palơq aku: ‘Aku nek Jê-su manưih Na-xa-reet, Yaang hơq akóón xók janah.’ 9Bhêêl achêk, nôôq manưih xók tơơt palơq aku ve lêi kalaaq brương ađek, bơơi piđó kah n'nal rau dhariêng ưng Yaang xók praaq palơq aku. 10Dyơq aku nek ââi: ‘Kakoh Chuôq, hau akóón phaai têêng?’ Tatun ađek, Chuôq praaq palơq aku: ‘Xong xók yuur dyương, phaai vôôiq mót leq kanóón Đa-met, lơq dhiq ađek akóón e bâân móón đóng n'nal leq tabhơt rau dhơơm ơi bâân ravang đóng akóón phaai têêng.’ 11Hayơq nek, xók bhêêl aku kah chóóm lêi giit ơi taai kalaaq brương cha-iil chadhiêng ađek, hayơq ganơơm bâân dyuôch têi chơơng vôôiq tââq nôôq manưih tơơt palơq aku, aku ơi vôôiq mót leq kanóón Đa-met. 12Xók achêk, anó A-na-nia achêk, mưi manưih bhơt lóóm ting gani, bâân truuih liêm tââq dyóp ngaai manưih Jo Thaaiq mamông dhiq ađek, 13xók ơi tơk palơq aku lơq dyương hót tóór, ađó móón aku: ‘Anó Saau-lơ ơơi, nek brương mat lóóiq.’ Chênh xók ađek, aku ngơơq lêi ađó achêk. 14Tatun ađek, ađó móón: ‘Yaang Pleng ưng abhươp avuôq nôôq he ơi chââih amei đóng n'nal kanóq kiêng Ađó, lơq đóng lêi Yaang Bhơt Liêm, kung kơi đóng xâng dhariêng praaq tââq bóóp Ađó, 15taai amei e nek mưi manưih truuih đuui leq Ađó toom dyóp ngaai leq rau dhơơm amei ơi lêi lơq xâng. 16Xók ađôk, amei hau dyơq pađươnh? Xong xók yuur dyương, phaai đơơp bap-teem lơq phaai têêng pasek matu lơt ađêi ganơơm nhan gavơh dhanóók Ađó.’ 17Tatun ađek, chiên val vaaih leq aku xók ơi val chô leq Jê-ru-sa-leem, lơq bhêêl aku xók gavơh nhan kalóóng đong bhanuôih, ađek nek chênh ađêi vaaih rangat gluh ravaai. 18Aku lêi Ađó praaq palơq aku: ‘Pađâh aq, lơq nek gluh tââq Jê-ru-sa-leem đóng pađâh, taai piđó e kah đơơp xâng paraaq truuih đuui ưng akóón leq Aku.’ 19Bơơi aku ââi: ‘Kakoh Chuôq, chênh piđó n'nal kơi akóón biêh ơi kóóp lơơi đong kanam lơq m'bhiiq vei kalóóng nôôq đong gươl nôôq ngaai huuiq leq Amei. 20Bhêêl ahaam ưng Ê-tiên, manưih truuih đuui ưng Amei, bâân gluh n'toh, chênh akóón biêh kung dyương đan ađek, iêm lóóm, lơq đương jư aau nguôi ưng nôôq manưih leng chêt ađó achêk.’ 21Hayơq Ađó praaq palơq aku: ‘phaai vôôiq, taai aku e kayua akóón vôôiq changaai tơk palơq nôôq dhanuôr katiêk lââng.’”

22Xók achêk, manưih dhanuôr xók xâng ađó đóng tơk paraaq ađô, nek piđó yuur praaq, móón kơi ađô: “Phaai leng karchêt dhong manưih kơi ađô tââq hóng katiêk, taai kah đaang đóng ađó mamông.” 23Chadrươh, xók piđó nek dyơq lalơu treeh, m'peq aau nguôi lơq vươk puui leq pleng, 24nek takóh linh kadhâng koq ơi kayua parâng đóng Phaau-lô bâân đââng mót pơơq linh, móón ađó phaai đơơp avuôt palơq parvuôt, đóng ve chóóm n'nal taai hau rau hơq dhanuôr manưih val treeh lalơu jơl ađó kơi ađek. 25Bơơi xók piđó ơi bhriêq ađó palơq talêi ravang avuôt, Phaau-lô móón palơq linh têêng koq xók dyương dhiq ađek: “Ve alua gani đóng pheep nôôq pe pei parvuôt avuôt mưi manưih Rô-ma hơq kah glêh xêi matu lơt?” 26Bhêêl achêk, taai xâng kơi ađek, nek linh kadhâng koq, xong xók tơk palơq takóh linh kadhâng koq, ơi móón lóóiq kơi ađô: “Amei hau karnóq têêng? Taai manưih ađô nek dhanuôr Rô-ma.” 27Kơi ađek, xók ơi vôôiq tơk, takóh linh kadhâng koq praaq palơq Phaau-lô: “Phaai đóng aku n'nal, amei ve lua nek dhanuôr Rô-ma eh alua?” Hayơq Phaau-lô móón: “Alua.” 28Xók achêk, takóh linh kadhâng koq ââi lóóiq: “Aku ơi kơl đóng bâân đóók dhanuôr ađek palơq mưi sôôq jêên gamak.” Bơơi Phaau-lô móón: “Dyơq aku lalua bâân n'niên kơi ađek.” 29Tââq kơi ađek, nôôq manưih karnóq vuôt ađó n'drươh róch xooq lơh tââq ađó, dyơq takóh linh kadhâng koq nek kakhin xók n'nal kơi ađó nek dhanuôr Rô-ma, lơq taai ađêi ơi đóng kóóp kađaai ađó.

30Kơi ađek hayơq, tangêi rayiiu, taai kiêng n'nal lalua ng'hau kơi hơq ađó bâân manưih Jo Thaaiq kaauq patu, hayơq takóh linh kadhâng koq ơi lêh talêi kađaai ađó, lơq kayua parâng đóng nôôq takóh kadhâng bhanuôih bhơt liêm palơq tabhơt Kabhuh Xêi Xanêi hoop lóóiq. Hayơq xong xók đââng Phaau-lô dhaluônh, takóh linh kadhâng koq patơơt ađó dyương dhiq m'pơng piđó.