Tarnêêng Nôôq Sưưq-đô 15

1Hayơq, masôôq manưih tôôh vôôiq dhuônh tââq Ju-đê, pachóóm nôôq adhi anó kơi ađô: “La adhi anó kah đơơp iêt ng'kar ting gani takóh ưng Môôi-se, nek adhi anó kah chóóm bâân paq.” 2Kơi ađek nek, xong xók ơi vaaih rau kah makơi lóóm lơq tarkaai kah katưưiq bhlưa Phaau-lô lơq Ba-na-ba palơq nôôq manưih tôôh, hayơq nôôq adhi anó kayua Phaau-lô lơq Ba-na-ba palơq masôôq manưih lââng bhlưa kalóóng piđó đóng vôôiq đơk lum nôôq sưưq-đô lơq takóh bhươl dhiq Jê-ru-sa-leem leq tarvei ađô. 3Kơi ađek, nôôq manưih bâân akóón dhơn Chuôq kayua vôôiq chaang gan luch Phê-ni-xi lơq Sa-ma-ri, truuih đuui giit palâh lóóm huuiq ưng nôôq dhanuôr katiêk lââng, lơq piđó ơi đââng lóóiq rau bhuui gamak đóng tabhơt nôôq adhi anó. 4Xók achêk, xók ơi tơk dhiq Jê-ru-sa-leem, piđó bâân pơh kêch taai akóón dhơn Chuôq, nôôq sưưq-đô lơq nôôq takóh bhươl, lơq n'drươh piđó praaq pakah n'nal n'đơq rau đu Yaang Pleng ơi ting têêng palơq ađêi. 5Bơơi nôôq manưih ơi huuiq achêk mađó kabhuh Pha-ri-si yuur dyương, praaq kơi ađô: “Kơng phaai têêng pheep iêt ng'kar đóng nôôq manưih achêk lơq truuih pachóóm piđó phaai jư gani Môôi-se.” 6Kơi ađek nek, nôôq sưưq-đô lơq nôôq takóh bhươl pahoop lóóiq đóng lêi pagiit leq tarnêêng ađô. 7Xók achêk, xong xók bơk tarkaai val vaaih, Phi-e-rơ, yuur dyương, praaq palơq piđó: “Nhan nôôq pe, nhan adhi anó, adhi anó maar n'nal kơi tââq nôôq tangêi tââp m'pơng kalóóng adhi anó, Yaang Pleng ơi chââih nôôq dhanuôr katiêk lââng ting tââq bóóp aku đóng xâng truuih Taruuih Liêm lơq huuiq. 8Yaang Pleng, Yaang n'nal kalóóng lóóm, ơi truuih đuui đóng piđó, xók đóng Chuôq Yaang Liêm leq piđó, kung kơi đóng leq nôôq he; 9lơq Ađó kah pantua bhlưa nôôq he palơq piđó, xók têêng lóóm piđó bâân sek tabah taai lóóm huuiq. 10Kơi ađek nek hau xók ađô adhi anó klêêu Yaang Pleng, xók pakuuk leq tuôr nôôq môôn-đô et đu nôôq avuôq nôôq he kah chóóm, lơq nôôq he kung kah ve đuôh đóng geng? 11Palâh lóóiq, nôôq he huuiq đóng bâân tapaq taai phươk liêm ưng Chuôq Jê-su, hơq piđó kung ting mưi tarnêêng kơi ađek.”

12Xók achêk, luch kabhuh manưih jư parngau lơq xâng Ba-na-ba lơq Phaau-lô truuih đuui n'đơq rau kanal chrih lơq tarnêêng raman chrih đu Yaang Pleng ơi têêng m'pơng kalóóng nôôq dhanuôr katiêk lââng tââq piđó. 13Kơi ađek hayơq, xong xók piđó praaq xong, Ja-kơ ââi praaq, kơi ađô: “Nhan móón nôôq pe, nhan móón adhi anó, nhan tameng xâng aku. 14Si-môôn ơi chaleq ng'kơi Yaang Pleng laloom tââm ơi ka-er lêi đóng pei pagluh tââq nôôq dhanuôr katiêk lââng mưi dhanuôr đóng achak Ađó. 15Rau ađô kung pâng palơq nôôq paraaq ưng nôôq manưih đââng taruuih kơi ơi bâân xaraq:

16‘Tatun nôôq tarnêêng achêk, Aku e val lóóiq,

hayơq Aku e têêng lóóiq pơơq ưng Đa-viit, nek pơơq ơi bâân kalơm,

Aku e têêng lóóiq nôôq rau bâân talâh kalơm ưng ađó lơq hayuur ađó,

17nek đóng phơn đu dyơq ưng akóón manưih lalua ve chóóm chik chêk Chuôq,

patơk mơ tabhơt nôôq dhanuôr katiêk lââng, hơq dhiq nôôq dhanuôr achêk, achak Aku bâân nhan gavơh dhiq tââq piđó.

Chuôq praaq kơi ađek, xók têêng nôôq tarnêêng ađô, 18nek rau bâân n'nal tơk tââq klaang hanua hana.’

19Taai kơi ađek, aku lêi kơi óóq pagei panhok đóng nôôq manưih tââq nôôq dhanuôr katiêk lââng val lóóiq palơq Yaang Pleng, 20dhơ kơi ađek, phaai xaraq bha-aar pató pachóóm piđó viêr changaai rau nhơơp xrơơm ưng kabhêi, rau tapiing, dhanah adhah chêt phet lơq ahaam. 21Ơi tââq nôôq klaang đơơi hanua hana, dhiq dyóp kanóón, gani Môôi-se dyơq buôn ve bơk nak truuih pachóóm gani achêk, ơi bâân đok kalóóng đong gươl leq dyóp tangêi Sa-baat.”

22Xong ađek, nôôq sưưq-đô lơq takóh bhươl, palơq luch akóón dhơn Chuôq, lêi phaai kayua nôôq manưih bâân chââih m'pơng kalóóng piđó vôôiq tơk An-ti-ôôt mandrươh palơq Phaau-lô lơq Ba-na-ba — dhơơm Ju-đa bâân đóók nek Ba-sa-ba, lơq Si-la, chênh nek nôôq manưih kadhâng koq kalóóng nôôq adhi anó — 23xók xaraq bha-aar vôôiq tââq têi piđó: “Nôôq sưưq-đô lơq nôôq takóh bhươl, nôôq adhi anó, pagơơi đóng nôôq manưih huuiq plok xưưq An-ti-ôôt, Si-ri lơq Si-li-si, chênh nek adhi anó, nôôq manưih gluh tââq nôôq dhanuôr katiêk lââng. Lóóm nh'nhơr chap yayar! 24Ơi xók ađô, nôôq yi ơi xâng kơi masôôq manưih chêk xók vôôiq gluh tââq m'pơng nôôq yi ơi panhok adhi anó palơq nôôq bóóp praaq têêng nhok nhói lóóm adhi anó, hơq nôôq manưih achêk nek nôôq yi kah rau kayua, 25hayơq rau ve liêm tââm đóng nôôq yi nek xong xók krong mưi lóóm, pei chââih nôôq manưih, nek kayua piđó vôôiq tơk leq adhi anó palơq Ba-na-ba lơq Phaau-lô, bơơr adhi anó tanhơr ưng nôôq yi, 26nek bơơr nak ơi yươq châq chêt ađêi taai achak Chuôq nôôq he, nek Jê-su Chuôq Paq Manưih. 27Taai ađek, nôôq yi ơi kayua Ju-đa lơq Si-la, nek nôôq manưih kung praaq pakah rau dhơơm ađô palơq bóóp praaq. 28Ơi lalua kơi Chuôq Yaang Liêm lơq nôôq yi ơi lêi kah ve đóng kơơq hau rau bâân patơơt têêng haleng leq adhi anó chapiên nôôq rau đu kiiq tatun ađô: 29phaai viêr changaai nôôq rau bhuôih leq kabhêi, ahaam, adhah chêt phet, lơq rau tapiing, adhi anó e têêng liêm, xók jư ađêi kala tââq nôôq rau achêk. Nhan đóng adhi anó bâân mưng karơ.”

30Kơi ađek nek, xong xók bâân kayua vôôiq, nhiđó vôôiq dhuônh tơk leq An-ti-ôôt, lơq krong kabhuh manưih lóóiq xong, nhiđó pađơơp tala bha-aar đóng. 31Xók achêk, xók đok bha-aar xong, nôôq manưih huuiq bâân bhuui marhaal toom rau payuur lóóm achêk. 32Miq Ju-đa lơq Si-la, chênh nhiđó nek kung nôôq manưih đââng taruuih, ơi payuur lóóm nôôq adhi anó palơq mưi taruuih yaal lơq têêng piđó karơ lóóm. 33Xók achêk, xong xók tơơt dhiq ađek mưi ganah, nhiđó bâân nôôq adhi anó đââng chalaang chô palơq nôôq manưih ơi kayua ađêi kơi yươq rau ha. 34[Bơơi Si-la lêi kơng tơơt lóóiq palơq piđó, hayơq Ju-đa ơi yuur vôôiq mưi ađêi.] 35Dyơq Phaau-lô lơq Ba-na-ba bhiêk tơơt dhiq An-ti-ôôt, pachóóm lơq truuih đuui paraaq Chuôq, palơq bơk manưih lââng.

36Tatun ađek, xong masôôq tangêi kah tadhơ, Phaau-lô praaq palơq Ba-na-ba: “Lalua, nôôq he kơng tơk tham nôôq adhi anó, xók val lóóiq dhiq dyóp kanóón hơq tơơt dhiq ađek, nôôq he ơi truuih đuui paraaq Chuôq, lêi piđó xók ng'kơi.” 37Bơơi Ba-na-ba kung kiêng đââng Jang, bâân đóók nek Maak, ting vôôiq. 38Dyơq Phaau-lô lêi kah đaang đóng đââng ađó achêk ting vôôiq, chênh nek ađó ơi yuur xooq tââq nhiđó dhiq Baam-phi-li lơq kah ting vôôiq palơq nhiđó kalóóng tarnêêng. 39Xók achêk, mưi rau tarkaai gamak val vaaih, patơk mơ nhiđó bâân tablah xóng nhiđó, lơq n'drươh Ba-na-ba đââng Maak ting ađêi vôôiq bhuông tơk leq Chiip-rơ. 40Dyơq Phaau-lô, xók ơi chââih Si-la, nek yuur vôôiq, xong xók bâân nôôq adhi anó pajaau leq phươk liêm ưng Chuôq. 41Kơi ađek hayơq, ađó vôôiq plok xưưq Si-ri lơq Si-li-si, tamưng nôôq akóón dhơn Chuôq.