Tarnêêng Nôôq Sưưq-đô 10

1Xók achêk dhiq kanóón Sê-sa-rê, mưi manưih achêk achak Koot-nêi, nek manưih kadhâng koq kalóóng kabhuh linh bâân đóók nek I-ta-li, 2nek manưih bhreh bhriêl lơq bhi kakhin Yaang Pleng palơq tabhơt đong ađêi, têêng bơk tarnêêng poor jóói đóng manưih dhanuôr lơq gavơh nhan palơq Yaang Pleng kơi taluôn. 3Kiêng mơ xók jơ đu takiêh kalóóng tangêi, kalóóng mưi rau tapalêi, ađó lêi drêh dróói mưi dhơn ưng Yaang Pleng bhral palơq ađêi lơq praaq palơq ađó: “Koot-nêi!” 4Bơơi xong xók lêi li mrang leq dhơn pleng lơq vaaih kapơn, ađó ââi: “Chuôq ơơi, ve raau kah?” Hayơq dhơn pleng achêk praaq palơq ađó: “Nôôq paraaq gavơh nhan ưng amei palơq nôôq tarnêêng poor jóói ưng amei ơi dyók tơk toom mat Yaang Pleng pakơi mưi bhanuôih hei taluôn. 5Xók ađôk, nek kayua manưih tơk leq Jôôp-bê lơq vôôiq yua Si-môôn tôôh, ađó bâân đóók nek Phi-e-rơ. 6Ađó achêk xók bâân yaauq taai mưi Si-môôn tôôh, thơơq ih ng'kar, nek manưih ve đong dhalam tóór taxiiq.” 7Kơi ađek hayơq, xók dhơn pleng, nek dhơn pleng praaq palơq ađó, ơi yuur xooq, nek xong xók dhaloong bơơr dhơn ratơơq kalóóng đong, palơq mưi chanak linh ve lóóm huuiq kalóóng sôôq nôôq manưih têêng yaauq ađêi, 8lơq xók ơi truuih đóng piđó dyóp rau, ađó kayua piđó tơk leq Jôôp-bê.

9Tangêi tatun, nek xók nôôq piđó achêk vôôiq dhiq kalơng lơq đan tơk kanóón, Phi-e-rơ vôôiq dyók leq taang pabhung đong đóng gavơh nhan patơk mơ jơ đu chapat. 10Xók achêk, ađó tââp xâng ha-ul lơq kiêng cha, bơơi nek xók palââng ravang chana, mưi rau tapalêi bhral dhiq ađó, 11ađó lêi talaang pleng ơi bâân tayaah lơq mưi rau kađôôq achêk padhaluônh, thê kơi mưi tala bhaai gamak, bâân padhaluônh leq katiêk taai puôn tahaal, 12hơq kalóóng ađek nek tabhơt nôôq akóón adhah puôn dyung, nôôq adhah laai tatơ dhiq katiêk lơq nôôq achim pleng, 13Hơq mưi dhariêng praaq tơk palơq ađó: “Phi-e-rơ, nek xók yuur, hơq leng adhah lơq đah aq.” 14Bơơi Phi-e-rơ ââi: “Kakoh Chuôq, kah ve chóóm, ơi akóón yươq glêh ve đah cha dhơ dharau đu anhuq lơq kah ve sek.” 15Lơq mưi chu dyơq, dhariêng praaq achêk tơk palơq ađó kalóóng chu đu bơơr: “Rau dhơơm Yaang Pleng ơi têêng pasek, akóón óóq lêi nek anhuq.” 16Kơi ađek hayơq, tarnêêng ađô vaaih tơk pe chu, lơq tala bhaai ađek n'drươh bâân takatoom chô leq pleng.

17Xók achêk, nek xók Phi-e-rơ dyơq kanóq karaang kalóóng lóóm leq tapalêi đu ađó tame lêi nek hau rau, hơq lêi tôôh, nôôq manưih bâân Koot-nêi kayua vôôiq ơi dyương dhiq palóng, xong xók chêk tamóh đong Si-môôn. 18Pei dhariêng dhaloong, piđó tamóh Si-môôn, bâân đóók nek Phi-e-rơ, ve alua môôiq eh nek xók bâân yaauq dhiq ađô. 19Dyơq Phi-e-rơ, nek xók dyơq đương kanóq leq rau tapalêi achêk, nek Yaang Liêm praaq palơq ađó: “Lêi tôôh, pe chanak padruuih xók chêk akóón. 20Dhơ kơi ađek xong xók yuur dyương, akóón nek dhaluônh lơq vôôiq palơq piđó, óóq rau paangra, taai Aku ơi kayua piđó.” 21Kơi ađek nek, xók ơi vôôiq dhaluônh talum nôôq manưih achêk, Phi-e-rơ praaq: “Lêi nô, aku nôk manưih đu nôôq pe chik chêk. Ơi hau rau tarnêêng hơq nôôq pe vôôiq leq ađô?” 22Xók achêk, piđó ââi: “Takóh kadhâng akoq Koot-nêi, mưi manưih bhơt liêm lơq bhi kakhin Yaang Pleng, kung nek bâân haanh liêm taai tabhơt dhanuôr Jo Thaaiq, ơi bâân mưi dhơn pleng tabah pachóóm kayua phaai yua amei vôôiq leq đong ađêi đóng xâng nôôq paraaq pachóóm tââq amei.” 23Kơi ađek, xók ơi kayua piđó mót leq đong, ađó yaauq piđó. Hayơq tangêi rayiiu, xong xók yuur dyương, ađó yuur vôôiq palơq piđó, lơq nôôq adhi anó tââq Jôôp-bê ting vôôiq palơq ađó. 24Lơq hayơq, tangêi tatun, piđó vôôiq tơk leq Sê-sa-rê. Xók achêk, Koot-nêi đương kêch piđó, xók bhêêl ơi dhaloong bơk xóng anó ađêi palơq nôôq parjơơk đan griêq nhoom hoop lóóiq. 25Bhêêl ađek, chiên ơi vaaih xók Phi-e-rơ bhadyaang mót, bhêêl lum mat ađó, nek Koot-nêi bhuôih kakoh, chakoh takól dhiq dyung ađó. 26Bơơi Phi-e-rơ tơq ađó yuur, praaq: “Nhan nek yuur dyương! Chênh aku kala kung nek akóón manưih giêl.” 27Xók praaq chiên palơq Koot-nêi, ađó mót lơq lêi bơk manưih ơi nhoom kaboq madhiq. 28N'drươh xók ađek, ađó praaq palơq piđó: “Chênh nôôq pe n'nal ađô nek rau lơt gani ng'kơi palơq mưi manưih Jo Thaaiq têêng parjơơk môôiq vôôiq tham mưi manưih dhanuôr lââng, bơơi palơq aku, Yaang Pleng ơi paraaq pachóóm óóq đóók mưi nak nek anhuq môôiq kah sek. 29Taai kơi ađek, xong xók ơi bâân kayua, aku ơi vôôiq mưi kơi yươq karnóq karaang. Kơi ađek, aku xók karnóq, hau rau hơq nôôq pe đóng kayua aku?” 30Koot-nêi ââi: “Puôn tangêi bhalek, tơk jơ ađô, xók aku gavơh nhan kalóóng đong ađêi leq jơ đu takiêh, nek lêi tôôh, mưi manưih dyương toom mat aku xơp kun aau brương braang, 31lơq manưih achêk praaq: ‘Koot-nêi, paraaq gavơh nhan ưng amei ơi bâân xâng lơq nôôq tarnêêng poor jóói ưng amei ơi bâân hei tơk toom mat Yaang Pleng. 32Kơi ađek, nek kayua manưih vôôiq leq Jôôp-bê lơq kayua Si-môôn, nek ađó bâân đóók nek Phi-e-rơ. Ađó achêk xók bâân yaauq dhiq đong ưng Si-môôn, mưi manưih ih ng'kar, tóór taxiiq.’ 33Taai kơi ađek, aku n'drươh đóng manưih vôôiq kayua amei, n'drươh ađek amei kung ơi vôôiq nek dhalam tơk leq ađô. Taai kơi ađek, xók ađôk, tabhơt nôôq yi tơơt dhiq ađô toom mat Yaang Pleng đóng xâng dyóp rau ơi bâân Chuôq pató pachóóm dhiq amei.” 34Xók achêk, ơi pơơh bóóp praaq, Phi-e-rơ móón: “Ting kơi paraaq dhalam, aku n'nal nek Yaang Pleng eh rau nek Yaang mahóng malóóm. 35Klóóih leq ađek, kalóóng dyóp dhanuôr, ngaai bhi kakhin Ađó lơq têêng rau bhơt liêm nek bâân đơơp đươi palơq Ađó. 36Taruuih đu Ađó ơi pagơơi đóng manưih dhanuôr I-sơ-ra-êên, truuih Taruuih Liêm leq yươq rau ha ting tââq Jê-su Chuôq Paq Manưih, Ađó nek Chuôq ưng akóón manưih — 37nôôq pe ơi n'nal xók tarnêêng ơi vaaih bhluuch luch xưưq Ju-đê, tââp tanââp dhiq Ga-li-lê, xong pheep bap-teem đu Jang ơi truuih đuui, 38leq Jê-su, Yaang gluh tââq Na-xa-reet, ng'kơi hơq Yaang Pleng ơi xut dhơu đóng Ađó palơq Chuôq Yaang Liêm lơq mataai raman, nek Yaang vôôiq leq ađô leq tôôh têêng tarnêêng liêm kre lơq payươh dyóp nak bâân abhưi bóq, ơi Yaang Pleng tơơt palơq Ađó. 39Nôôq yi nek nôôq manưih lêi n'nal leq tabhơt nôôq tarnêêng đu Ađó ơi têêng, dhiq katiêk ưng manưih Jo Thaaiq lơq kơi dhiq Jê-ru-sa-leem, kung nek Yaang đu piđó ơi leng palơq tarnêêng yông Ađó dhiq n'lóóng chatông. 40Yaang Pleng ơi têêng đóng Ađó mamông lóóiq leq tangêi đu pe lơq đóng Ađó pakah kơi drêh dróói, 41eh rau đóng tabhơt dyóp ngaai, bơơi đóng nôôq manưih lêi n'nal ơi bâân Yaang Pleng chââih tââq laloom — chênh nek đóng nôôq yi, nôôq manưih ơi cha lơq ơm palơq Ađó xók Ađó mamông lóóiq tââq kan chêt. 42Ađó ơi paraaq kayua nôôq yi truuih pachóóm đóng manưih dhanuôr lơq truuih đuui dyóp liêm kơi Ađó nek Yaang ơi bâân Yaang Pleng chââih têêng Yaang praaq xêi manưih mamông lơq manưih chêt. 43Achêk nek leq Ađó, tabhơt nôôq manưih đââng taruuih truuih đuui nek la ngaai lơơi lóóm huuiq dhiq Ađó nek bâân đơơp rau lơơi matu lơt kalóóng achak Ađó.”

44Xók Phi-e-rơ dyơq praaq nôôq paraaq achêk, nek Chuôq Yaang Liêm jaq dhiq dyóp nak đương xâng taruuih ưng ađó. 45Nôôq manưih huuiq mađó kabhuh đơơp iêt ng'kar — chênh nek tabhơt nôôq ngaai ơi vôôiq mandrươh palơq Phi-e-rơ — maar hêq lêi, taai rau đóng Chuôq Yaang Liêm kung bâân n'toh dhiq dhanuôr palââng. 46Taai piđó xâng nôôq manưih ađô praaq palơq nôôq dhariêng lââng lơq bhi haanh Yaang Pleng. Leq bhêêl achêk, Phi-e-rơ pơơh bóóp: 47“Ve kơq ngaai ađek ve chóóm kajơq đơơk đóng nôôq manưih ađô kah chóóm têêng bap-teem, chênh nek nôôq manưih ơi bâân đơơp Chuôq Yaang Liêm kung kơi nôôq he?” 48Kơi ađek hayơq, ađó kayua đóng piđó têêng bap-teem kalóóng achak Jê-su Chuôq Paq Manưih. Tatun ađek, piđó nhan ađó tơơt lóóiq bơơr pe tangêi.