Tarnêêng Nôôq Sưưq-đô 11

1Xók achêk, nôôq sưưq-đô lơq adhi anó dhiq plok Ju-đê xâng kơi dhanuôr katiêk lââng kung ơi pei đơơp taruuih ưng Yaang Pleng. 2Kơi ađek hayơq, xók Phi-e-rơ vôôiq đơk tơk Jê-ru-sa-leem, nôôq manưih mađó kabhuh đơơp iêt ng'kar tarkaai palơq ađó, 3móón kơi ađó ơi vôôiq mót leq dham nôôq manưih kah đơơp iêt ng'kar lơq cha madhiq palơq piđó. 4Bơơi xók pei praaq, Phi-e-rơ kluôh tarnêêng leq piđó ting kơi matââq tââq kơi ađô: 5“Aku xók gavơh nhan dhiq kanóón Jôôp-bê, lơq kalóóng gluh ravaai aku lêi rau tapalêi leq mưi rau kađôôq achêk xók dhaluônh, thê kơi tala bhaai gamak puôl puôn tahaal bâân padhaluônh tââq pleng lơq ađó tơk nham dhiq aku, 6hơq xók chaling lêi leq ađek, aku chamet lêi lơq lêi akóón adhah puôn dyung dhiq katiêk, nôôq adhah dhiq krơng, nôôq adhah laai tatơ, palơq nôôq achim pleng. 7Hayơq aku kung xâng mưi dhariêng praaq palơq ađêi: ‘Phi-e-rơ, xong xók yuur, nek leng adhah lơq đah aq!’ 8Bơơi aku ââi: ‘Kakoh Chuôq, Kah ve chóóm, ơi rau anhuq môôiq kah sek kah ve chóóm mót leq kalóóng bóóp akóón.’ 9Dhơ kơi ađek, dhariêng tââq pleng ââi lóóiq kalóóng chu đu bơơr, kơi ađô: ‘Rau dhơơm Yaang Pleng ơi têêng pasek, akóón kah chóóm lêi nek anhuq.’ 10Xók achêk, tarnêêng ađô vaaih tơk pe chu, hayơq dyóp rau bâân ruiq taval leq pleng. 11Lơq lêi tôôh, pe chanak padruuih n'drươh xók ađek dyương dhiq palóng đong đu nôôq yi xók tơơt kalóóng, taai ơi bâân kayua vôôiq tââq Sê-sa-rê tơk palơq aku. 12Xók achêk, Yaang Liêm kayua aku vôôiq palơq piđó, yươq rau ve karnóq. Kơi ađek hayơq, chapat adhi anó ađô kung vôôiq palơq aku, lơq nôôq yi mót leq kalóóng đong ưng ađó ađek. 13Tatun ađek, ađó achêk ơi truuih lóóiq leq nôôq yi ng'kơi ađó achêk ơi lêi dhơn pleng dyương kalóóng đong ađêi, kayua kơi ađô: ‘Nek kayua manưih vôôiq leq Jôôp-bê lơq vôôiq yua Si-môôn, manưih bâân đóók nek Phi-e-rơ, 14nek ađó e móón đóng amei nôôq paraaq pachóóm hơq đươi ađek, amei e bâân paq — amei lơq luch palóng đong ưng amei.’ 15Bơơi xók aku tââp praaq, Chuôq Yaang Liêm ơi dhaluônh jaq dhiq piđó kung thê kơi dhiq nôôq he leq xók tââp tanââp. 16Hayơq aku hei tơk paraaq ưng Chuôq, ng'kơi Ađó ơi praaq: ‘Jang ơi têêng bap-teem palơq đơơk; bơơi adhi anó e bâân bap-teem palơq Chuôq Yaang Liêm.’ 17Kơi ađek hayơq, la Yaang Pleng ơi đóng leq piđó mađó mưi ơơn kung kơi đóng leq nôôq he xók patơơt lóóm huuiq leq Chuôq, nek Jê-su Chuôq Paq Manưih, hayơq aku nek ngaai hơq ve chóóm kajơq Yaang Pleng?” 18Xók achêk, xók ơi xâng nôôq paraaq achêk, piđó kah dyơq tarkaai hơq bhi haanh Yaang Pleng, móón kơi ađô: “Kơi ađek nek Yaang Pleng kung ơi đóng leq nôôq dhanuôr katiêk lââng rau klôôq lóóm đóng đơơp parmông.”

19Tatun ađek, nôôq manưih tachêh tavươk tââq tarnêêng janah ơi vaaih taai tarnêêng Ê-tiên ơi tablah patơk leq Phê-ni-xi, Chiip-rơ lơq An-ti-ôôt, kah praaq đóng ngaai leq taruuih, mơ chapiên manưih Jo Thaaiq. 20Bơơi m'bưưiq manưih kalóóng sôôq ađek nek nôôq manưih tââq Chiip-rơ lơq Si-reen, hơq nôôq manưih ađô xók ơi vôôiq tơk An-ti-ôôt, piđó kung praaq palơq nôôq manưih Hi-laap, truuih Taruuih Liêm leq Chuôq Jê-su. 21Têi ưng Chuôq tơơt palơq piđó; lơq masôôq bơk bhlơng, ơi huuiq, ơi palâh lóóm leq Chuôq. 22Xók achêk, taruuih leq nôôq manưih ađô tanđôôr tơk katór akóón dhơn Chuôq tơơt dhiq Jê-ru-sa-leem, hayơq piđó kayua Ba-na-ba vôôiq patơk An-ti-ôôt, 23hơq xong xók tơk leq ađek lơq lêi phươk liêm ưng Yaang Pleng, ađó bâân bhuui marhaal lơq chut lóóm tabhơt bhiêk tơơt kalóóng Chuôq palơq rau tamưng kalóóng lóóm. 24Ơi ađó nek mưi manưih mamông liêm, bing bhlaai Chuôq Yaang Liêm palơq lóóm huuiq, lơq bơk manưih bâân n'dhương chô leq Chuôq. 25Tatun ađek, ađó vôôiq tơk leq Taat-sơ đóng chêk Saau-lơ. 26Xók ơi bâân lêi, ađó đââng Saau-lơ tơk An-ti-ôôt. Kơi ađek hayơq, chiên val vaaih palơq piđó patơk mơ kalóóng luch mưi kamó achêk nek bâân krong nhoom palơq akóón dhơn Chuôq lơq truuih pachóóm bơk manưih. N'drươh xók ađek, nek tââp tanââp dhiq An-ti-ôôt, nôôq môôn-đô bâân đóók nek manưih huuiq Chuôq.

27Xók achêk, kalóóng nôôq tangêi ađek, nôôq manưih đââng taruuih tââq Jê-ru-sa-leem vôôiq dhuônh tơk An-ti-ôôt. 28Kơi ađek hayơq, xong xók mưi nak kalóóng sôôq piđó, achak A-ga-buut, yuur dyương, ơi Yaang Liêm, ađó đóng n'nal kơi mưi ganơt ha-ul gamak ravang vaaih tơk dhiq plok hóng katiêk. Tarnêêng ađô ơi vaaih kalóóng đơơi Kơ-lôôt. 29Kơi ađek nek kalóóng nôôq môôn-đô, dyóp nak kalóóng sôôq achêk, la ngaai ve đuôh mak meen ve, piđó ơi praaq xêi ravang phơn poor jóói đóng pagơơi adhi anó mamông dhiq Ju-đê, 30hơq piđó lalua ơi têêng kơi ađek, xók kayua đââng tơk nôôq takóh bhươl tââq têi ưng Ba-na-ba lơq Saau-lơ.