2 Ti-mô-thê 3:16

1Bơơi akóón phaai n'nal rau ađô, ađek nek kalóóng nôôq tangêi tatun xariêq, e vaaih tơk nôôq ganah bhêêl kadhaap kara. 2Taai akóón manưih e nh'nhơr ađêi, nh'nhơr jêên baak, laach jơơr, praaq harlaau, praaq chôlô, kah xâng bóóp akonh akan, kah n'nal ơơn, mamông kah liêm, 3kah mót lóóm, kah chóóm mamông paliêm, buôn praaq tamôôp, kah jư ađêi, vaaih lóóm grô jar-ââih, kah nh'nhơr rau đu liêm, 4tabil ơơn, huông jarul, i-thi têêng ađêi, nh'nhơr đu bhuui lơh nh'nhơr Yaang Pleng, 5ve têêng pathê huuiq bhi, bơơi vil m'peq lơơi mataai karơ ưng rau huuiq bhi. Phaai viêr changaai nôôq manưih achêk.

6Taai kalóóng m'pơng piđó nek nôôq đu tông mót đong palââng, yua pa-eep nôôq pađiil parkan ngôôk ngaak, ng'gơơn tabing matu lơt, bâân đââng dharơơl tââq dyóp rau malóóch kiêng, 7đuui taluôn hơq kah mơ ve chóóm vôôiq tơk dhiq kanóq n'nal paraaq dhalam. 8Jaan-neet lơq Jaam-be ơi jaklâk jơl Môôi-se ng'kơi, nek nôôq manưih ađô kung dyơq jaklâk jơl paraaq dhalam kơi achêk, kabhuh manưih achêk nek nôôq manưih ve lóóm karnóq bâân hư bil, nek nôôq đu galơơk pathê nek palơq lóóm huuiq. 9Bơơi piđó e kah ruul kuôq changaai đuôh, taai rau ngôôk ngaak ưng piđó e val kơi drêh dróói toom mat dyóp ngaai, kung thê kơi rau ngôôk ngaak ưng bơơr chanak tôôh ơi haleh gluh.

10Bơơi akóón ơi ting griêq paraaq pachóóm, kơi mamông, kanóq kaniêng, lóóm huuiq, lóóm jruôn parngau, lóóm tanhơr, rau đuôh jruôn ưng aku, 11nôôq galuh kóóp róp, nôôq jarnah xarngaat kơi ơi vaaih tơk leq aku dhiq An-ti-ôôt, dhiq I-kô-ni, dhiq Liit-trơ, dyóp kơi kóóp róp hơq aku ơi đơơp. Lơq Chuôq ơi jóói paq aku tââq tabhơt piđó. 12Bơơi alua tabhơt ngaai nôôq kiêng mamông kơi huuiq bhi kalóóng Jê-su Chuôq Paq Manưih maar e bâân têêng jarnah. 13Hayơq kabhuh manưih lơt aak lơq đu bhlơp chachââr e kaang yuur vaaih rau mahaai mahư bơk lơh, galơơk chachââr palââng lơq bâân palââng galơơk chachââr. 14Dhơ kơi ađek, akóón, phaai bhiêk tơơt kalóóng nôôq rau đu akóón ơi đuui lơq huuiq mưng, taai n'nal ađêi ơi đuui piđó tư tââq ngaai, 15lơq kơi tââq bhêêl dyơq paniên, akóón ơi hok n'nal Bha-aar Yaang Pleng, ve chóóm têêng akóón tabech galang malóóm tơk rau paq jóói taai lóóm huuiq kalóóng Jê-su Chuôq Paq Manưih.

16Bhơt Bha-aar Yaang Pleng nek rau gahó parhââm ưng Yaang Pleng, lơq nek rau malơơi đóng tarnêêng pató pachóóm, trêh teng, klôôq paliêm pajêi pakeen kalóóng rau bhơt liêm, 17buôn manưih ưng Yaang Pleng ve chóóm hayơq bhơt dyóp, bâân ravang pasam bing dyóp, đóng dyóp rau tarnêêng liêm.