2 Ti-mô-thê 4

1Aku taniih charnap truuih pachóóm akóón toom mat Yaang Pleng lơq Jê-su Chuôq Paq Manưih, Yaang e xêi xanêi manưih mamông lơq manưih chêt, taai rau bhral tơk ưng Ađó lơq katiêk Ađó, kơi ađô: 2Phaai truuih pachóóm Paraaq Chuôq; phaai ravang ravưa, dhơ kalóóng ganah khe môôiq ganah kadhaap; phaai trêh padheep, jươm teng, mââl bhơơl, palơq tabhơt rau jruôn parngau lơq praaq parchóóm. 3Taai e tơk ganah xók palââng e kah đuôh xâng paraaq parchóóm liêm kre. Klóóih dhiq ađek, piđó e panjoop đóng ađêi nôôq manưih pachóóm ting malóóch kiêng n'tua ưng ađêi, đóng hangur bóng katór, 4hayơq e kah mơ palơh katór gluh tââq paraaq dhalam, hơq dyơq palâh leq nôôq chiên huông hư. 5Bơơi akóón, phaai bhriêl tabech kalóóng dyóp tarnêêng. Phaai đơơp jruôn jarnah xarngaat. Phaai têêng tarnêêng ưng manưih truuih pachóóm Taruuih Liêm. Phaai chachên tarnêêng têêng ưng akóón.

6Dyơq aku nek dyơq bâân tantoh kơi mưi bhanuôih aq, lơq tơk bhêêl yuur vôôiq ưng aku ơi griêq đan. 7Aku ơi tarjeng tarjơl kalóóng mưi galuh pađuôh pađươk liêm kre; aku ơi xong bhơt kalơng pađuôh; aku ơi jư tamưng lóóm huuiq. 8Xók đôk, panơơng bhơt liêm ơi pakoom lơơi đóng aku, nek panơơng đu Chuôq, Manưih Praaq Xêi bhơt liêm, e đóng chaner leq aku kalóóng tangêi ađek, hơq kah chapiên pakoom đóng aku, bơơi dyơq đóng tabhơt nôôq manưih nh'nhơr rau bhral tơk ưng Ađó.

9Phaai tabhlơng tabhơt praan đóng đâh tơk lum aku, 10Taai Đê-ma ơi lơơi aku, taai malóóch kiêng đơơi ađôk, lơq ađó ơi vôôiq tơk Tê-sa-lô-ni-ka. Kơ-rêêt-xeen vôôiq Ga-la-ti, Tiit vôôiq Đa-ma-ti. 11Chapiên dyơq Lu-ka tơơt palơq aku. Xong xók pơh Maak, phaai đââng ađó achêk ting palơq akóón ơi taai ađó achêk chóóm malơơi đóng aku kalóóng tarnêêng têêng. 12Aku ơi kayua Ti-chi-kơ tơk Ê-phê-sô. 13Xók vôôiq, akóón, phaai đââng ting m'beq aau chaguôk đu aku lơơi dhiq đong Ka-buut dhiq kanóón Trô-et, nek palơq nôôq panuôl bha-aar, đu tââm nek nôôq panuôl bha-aar ng'kar.

14Têi manưih tôk kóng A-lek-xan-đơ ơi têêng mahaai aku bơk bhlơng. Chuôq e chróót charóót ađó ting kơi nôôq tarnêêng têêng ưng ađó, 15nek manưih đu akóón kung phaai hêch lêi, taai ađó, tabhlơng jaklâk jơl paraaq pachóóm ưng nôôq he.

16Xók bhêêl ââi paq tarnââp ưng aku, kah ngaai tơk pakah mat palơq aku, bơơi tabhơt maar xooq lơơi aku. Nhan matu ađek yươq n'toh lóóiq dhiq piđó. 17Bơơi Chuôq ơi dyương hót aku lơq têêng đóng aku karơ gamak, buôn tââq aku, tarnêêng truuih đuui Taruuih Liêm bâân yuur têêng bhơt dyóp, lơq tabhơt dhanuôr lââng maar ve chóóm bâân xâng. Aku kung ơi bâân paq jóói tââq bóóp sư tư. 18Chuôq e trôông paq aku tââq dyóp tarnêêng aak lơq e jư havit aku leq katiêk pleng ưng Ađó. Nhan cha-iil tabah chô leq Ađó đóng tơk nh'chró, kah bil. A-meen.

19Phaai tamóh tham Bê-rit-siin lơq A-kui-la, palơq dhanong đong Ô-nê-si-phô-rơ. 20Ê-raat tơơt lóóiq dhiq Kô-riin-tô, dyơq Trô-phiim taai ka-ai hơq aku lơơi lóóiq dhiq Mi-lê. 21Phaai tabhlơng tabhơt praan tơk loom nil ha-ót. Ơ-bu-lu, palơq Bu-đeen, Li-nuut, Kơ-lau-đia, lơq nôôq adhi anó maar tamóh tham akóón.

22Gavơh Chuôq tơơt palơq lóóm karnóq akóón. Nhan ơơn phươk liêm tơơt palơq adhi anó.