2 Phi-e-rơ 3

1Adhi anó bơk nh'nhơr, lơh mưi ganah tangêi kaxe, ađô nek tala thơ đu bơơr aku xaraq đóng adhi anó; hơq kalóóng miq bơơr thơ, aku panhok lóóm karnóq lalua dhalam ưng adhi anó palơq rau pahei pató, 2đóng hei lóóiq nôôq paraaq ơi bâân truuih đuui n'loom hei tââq nôôq manưih đââng taruuih liêm kung palơq paraaq kayua ưng Chuôq lơq Chuôq Paq lơh tââq nôôq sưưq-đô ưng adhi anó, 3taai n'nal laloom rau ađôk, ađek nek nôôq manưih ajóóch paxê e tơk mót ganah tatun xariêq palơq rau bhalưưk paxê, đađưưq ting lóóm kanóq ưng chênh ađêi, 4hơq móón: “Paraaq hươq tơk rau val dhaluônh ưng Ađó tơơt n'dhiq? Taai tââq xók nôôq abhươp avuôq chô bhalô mangi, dyóp rau biêh dyơq i-ngi tââq xók tavaaih pleng katiêk tââp tarnââp.” 5Taai xók đươi lóóm kơi ađek, rau ađô val kơi pađơp mat piđó, ađek nek tââq paraaq ưng Yaang Pleng, pleng ơi vaaih tââq hanua hana, lơq katiêk yuur avaaih tââq đơơk lơq đươi đơơk, 6kung tââq nôôq rau ađek hơq hóng katiêk xók achêk ơi bâân leng kaxiêt, taai bâân đơơk chip paklêch. 7Bơơi xók ađôk, tââq kung paraaq ađek, pleng lơq katiêk bâân koom đóng óih, bâân jư đóng tangêi praaq xêi lơq rau leng kaxiêt nôôq akóón manưih kah chap.

8Dhơ kơi ađek, nhan móón adhi anó bơk nh'nhơr, óóq lơơi mưi rau ađô xar kơi pađơp mat adhi anó, kơi mưi tangêi ting kơi palơq Chuôq thê kơi mưi ngaan kamó, lơq mưi ngaan kamó thê kơi mưi tangêi. 9Chuôq kah pajih tơk paraaq hươq ưng Ađó, kơi mưi phơn manưih kanóq nek pajih; klóóih dhiq ađek, Ađó đuôh jruôn đơơp kađung ting kơi palơq adhi anó, kah kiêng ngaai nak bâân chêt bil, bơơi kiêng tabhơt maar ve bhêêl bâân vôôiq tơk rau klôôq lóóm matu lơt. 10Dhơ kơi ađek, tangêi ưng Chuôq e bhral kơi manưih tatông, hơq kalóóng tangêi ađek, talaang pleng e bil tich kalóóng dhariêng tar-auq ơơr, lơq nôôq rau dhiq kalóóng katiêk e bâân pahư xók bâân óih óch róh, dyơq katiêk lơq nôôq tarnêêng kalóóng ađek e bâân tapagluh. 11Taai dyóp rau ađek e bâân pahư tabil kơi ađek, hayơq phaai kajuq adhi anó phaai cha tơơt kalóóng mamông sek liêm lơq bhi huuiq, 12rââm đương lơq bhơt lóóm đương rââm tangêi tơk bhral ưng Yaang Pleng, taai bhêêl ađek nôôq talaang pleng e bâân pahư taai bâân óih óch róh, dyơq nôôq dyóp rau kalóóng katiêk e roong hóói taai bâân boh róh garưq. 13Bơơi ting paraaq hươq ưng Ađó, nôôq he dyơq đương lêi pleng tame lơq katiêk tame, hơq dhiq dham ađek rau bhơt liêm tơơt kađơu.

14Taai kơi ađek, nhan móón adhi anó bơk nh'nhơr, ơi taai rââm lêi nôôq rau achêk, phaai bhơt praan đóng bâân Ađó chalaang lêi nek yươq madhôôn madham lơq yươq dhiq chóóm trêh jươm, kalóóng rau yươq rauha. 15Lơq phaai n'nal lóóm đuôh đương ưng Chuôq nôôq he nek taai ơơn paq jóói, kung kơi Phaau-lô, manưih adhi anó bơk nh'nhơr ưng nôôq he, ơi xaraq đóng adhi anó, ting rau tarbech galang ơi bâân đóng leq ađêi, 16lơq kơi kalóóng dyóp tala thơ, xók praaq kalóóng thơ tơk nôôq rau ađô, dhiq ađek ve bơơr pe rau hadhơơp n'nal hơq nôôq manưih kah n'nal rarau lơq kah đuôh tamưng đââng palơt paxraang, kung kơi palơq nôôq phơn Bha-aar lââng, móón tơk rau leng kaxiêt ưng chênh ađêi. 17Taai ađek, nhan móón adhi anó bơk nh'nhơr, taai n'nal laloom nôôq tarnêêng ađek, adhi anó phaai jư ađêi đóng adhi anó yươq patôq tabil rau tamưng ưng ađêi hơq bâân đââng vôôiq lơt xraang tââq rau dharơơl galơơk ưng nôôq manưih kah charnap. 18Bơơi phaai tahayuur grơơt kalóóng ơơn phươk liêm lơq rau tabech n'nal Chuôq lơq Chuôq Paq nôôq he, nek Jê-su Chuôq Paq Manưih. Rââm nhan cha-iil tabah tơk ưng Ađó miq dhiq xók ađôk lơq tơk dhiq tabhêêl nh'chró. A-meen!