1 Jang 1

1Rau biêh ve tââq tarnââp, nek rau nôôq yi ơi xâng, nek rau nôôq yi ơi lêi toom mat ađêi, nek rau nôôq yi ơi móng lêi, lơq têi nôôq yi ơi kadhâng, pâng tơk Paraaq ưng rau mamông. 2Alua, rau mamông ơi bâân pakah lơq nôôq yi ơi haliq lêi, nôôq yi dyơq truuih đuui lơq praaq pađââr đóng adhi anó rau mamông nh'chró, nek rau biêh tơơt palơq Ama lơq ơi bâân tapakah đóng nôôq yi. 3Rau nôôq yi ơi lêi lơq ơi xâng nek nôôq yi truuih đuui đóng adhi anó, đóng adhi anó kung ve rau makơi lóóm palơq nôôq yi. Alua, rau makơi lóóm ưng nôôq he nek palơq Ama lơq palơq Akóón Ađó, nek Jê-su Chuôq Paq Manưih. 4Nôôq yi xaraq nôôq paraaq ađô đóng rau bhuui marhaal ưng nôôq he bâân bhơt dyóp.

5Ađôk nek taruuih liêm đu nôôq yi ơi xâng tââq Ađó lơq dyơq truuih đuui đóng adhi anó kơi ađô: Yaang Pleng nek rau brương lơq kalóóng Ađó kah ve dhơ dhađó rau kanam kanheet. 6La nôôq he móón kơi nôôq he ve rau makơi lóóm palơq Ađó, dhơ kơi ađek jađaang vôôiq kalóóng rau kanam kanheet, nôôq he dyơq praaq chachââr lơq kah ting têêng kơi paraaq dhalam. 7Bơơi la nôôq he jađaang vôôiq kalóóng rau brương kơi chênh Ađó tơơt kalóóng rau brương, hơq nôôq he ve rau makơi lóóm palơq xóng ađêi, lơq ahaam Chuôq Jê-su, Akóón Ađó, kajut sek nôôq he tââq dyóp rau matu lơt. 8La nôôq he praaq kơi ađêi kah ve lơt, nek nôôq he dyơq tư galơơk chachââr ađêi lơq paraaq dhalam kah tơơt kalóóng nôôq he. 9La nôôq he đơơp pakah matu lơt ađêi, hơq Ađó nek kah tadhơ lơq bhơt liêm, đóng lơơi lơt đóng nôôq he lơq kajut sek nôôq he tââq dyóp rau kah liêm. 10La nôôq he móón kơi ađêi yươq glêh têêng lơt, nek nôôq he đóng Ađó nek đu praaq chachââr, lơq Paraaq Ađó kah tơơt kalóóng nôôq he.