1 Jang 2

1Nôôq akóón ưng aku, aku xaraq nôôq rau ađô leq nôôq akóón đóng nôôq akóón kah têêng lơt. Lơq la ve ngaai têêng lơt, nek nôôq he ve mưi Yaang ââi paq palơq Ama nek Jê-su Chuôq Paq Manưih, Yaang bhơt liêm. 2Ađó nek bhanuôih pók matu taai matu lơt ưng nôôq he, bơơi kah chapiên đóng matu ưng nôôq he, bơơi dyơq đóng matu ưng bhơt manưih hóng katiêk dyơq. 3La nôôq he huuiq jư nôôq gani pachóóm ưng Ađó, hơq ve ađek nôôq he n'nal kơi ađêi ơi đơơp n'nal Ađó. 4Ngaai móón kơi ađô: “Aku n'nal Ađó” bơơi kah huuiq jư nôôq gani pachóóm ưng Ađó, achêk nek đu praaq chachââr, lơq paraaq dhalam kah tơơt kalóóng manưih ađek. 5Bơơi la ngaai huuiq jư Paraaq Ađó, hơq lóóm nh'nhơr ưng Yaang Pleng alua dhakơi bâân bhơt dyóp kalóóng manưih ađek. Nôôq he n'nal kơi ađêi tơơt kalóóng Ađó taai rau ađôk: 6Ngaai manưih móón ađêi biêh tơơt kalóóng Ađó hơq chênh manưih ađek kung phaai mamông thê kơi Ađó ơi mamông.

7Nôôq adhi anó nh'nhơr bơk, aku kah xaraq đóng adhi anó mưi gani pachóóm tame, bơơi nek gani pachóóm ti đu adhi anó ơi ve tââq bhêêl tarnââp. Gani pachóóm ti achêk nek paraaq đu adhi anó ơi xâng. 8Mat lââng, aku xaraq đóng adhi anó mưi gani pachóóm tame, hơq gani pachóóm ađek nek alua dhalam kalóóng Ađó lơq kalóóng adhi anó, taai rau kanam kanheet bâân yaah tabil, lơq rau brương lalua dyơq taklaaq dyóól aq. 9Ngaai móón ađêi tơơt kalóóng rau brương hơq vil geet adhi anó ađêi hơq xók ađôk biêh dyơq tơơt kalóóng rau kanam kanheet. 10Ngaai nh'nhơr adhi anó ađêi nek bhiêk tơơt kalóóng rau brương lơq taai têêng n'đóih kalơm kah ve kalóóng manưih ađek. 11Bơơi ngaai geet adhi anó ađêi nek tơơt kalóóng a-ô kanam lơq jađaang vôôiq kalóóng kanam kanheet, manưih ađek kung kah n'nal ađêi dyơq vôôiq n'leq, taai a-ô kanam ơi têêng kabaang mat ađó.

12Nôôq akóón ơơi, aku xaraq đóng nôôq akóón taai matu nôôq akóón ơi bâân talơơi ve dhanóók Ađó. 13Nhan móón nôôq manưih takóh, aku xaraq đóng nôôq pe taai nôôq pe ơi n'nal Yaang ve tââq tarnââp. Nôôq parjơơk n'dhóm kamór ơơi, aku xaraq đóng nôôq pe taai nôôq pe ơi đươk lơh đu aak. 14Nôôq paniên katưưiq ơơi, aku ơi xaraq đóng nôôq akóón taai nôôq akóón ơi n'nal Ama. Nhan móón nôôq manưih takóh, aku ơi xaraq đóng nôôq pe, taai nôôq pe ơi n'nal Yaang ve tââq tarnââp. Nôôq parjơơk n'dhóm kamór ơơi, aku ơi xaraq đóng nôôq pe taai nôôq pe karơ gamak, paraaq Yaang Pleng biêh tơơt kalóóng nôôq pe, lơq nôôq pe ơi bâân đươk đu aak. 15Óóq nh'nhơr hóng katiêk kung kơi dyóp rau kalóóng hóng katiêk. La ngaai nh'nhơr hóng katiêk nek lóóm nh'nhơr ưng Ama kah tơơt kalóóng manưih achêk. 16Taai dyóp rau kalóóng hóng katiêk kơi rau marlóóch kiêng ưng manưih ti, rau marlóóch kiêng ưng mat, lơq keen praaq laach ưng đơơi, eh rau nek tââq Ama, bơơi nek tââq hóng katiêk. 17Lơq hóng katiêk bâân roong bil palơq marlóóch kiêng ưng ađó, bơơi ngaai ting têêng karnóq kiêng Yaang Pleng hơq bhiêk dyơq tơk nh'chró.

18Nôôq paniên katưưiq ơơi, xók ađôk nek tangêi tatun xariêq, lơq kơi nôôq akóón ve xâng kơi đu jaklâk lóóiq Chuôq Paq Manưih dyơq abhral, lơq xók ađôk bơk đu jaklâk lóóiq Chuôq Paq Manưih ơi bhral, hayơq nôôq he n'nal kơi xók ađôk nek tangêi tatun xariêq. 19Kabhuh piđó vôôiq gluh tââq nôôq he, bơơi piđó kah mađó lơq nôôq he. Taai la mađó lơq nôôq he, nek piđó alua nek bhiêk dyơq tơơt palơq nôôq he, bơơi eh rau kơi achêk, đóng piđó bâân tapakah kơi piđó kah mađó lơq nôôq he marau marâ. 20Dyơq nôôq akóón hơq ve bâân xut dhơu tââq Yaang Liêm, lơq nôôq akóón maar ơi đơơp n'nal. 21Aku ơi xaraq đóng nôôq akóón eh rau taai nôôq akóón kah n'nal paraaq dhalam, bơơi taai nôôq akóón ơi n'nal paraaq dhalam lơq taai kah ve rau galơơk chachââr n'đó nek gluh tââq paraaq dhalam. 22Ngaai nek đu praaq galơơk la eh rau đu kah huuiq, móón kơi ađô: Chuôq Jê-su eh rau nek Chuôq Paq Manưih? Ađó ađek chênh nek đu jaklâk lóóiq Chuôq Paq Manưih, nek đu kah huuiq Ama lơq Akóón. 23Ngaai manưih kah huuiq Akóón nek kah ve Ama. Dyơq ngaai đơơp huuiq Akóón nek kung ve Ama dyơq. 24Leq phơn nôôq akóón, phaai lơơi rau nôôq akóón ơi xâng tââq bhêêl tarnââp dyơq taluôn tơơt kalóóng ađêi. La rau nôôq akóón ơi xâng tââq bhêêl tarnââp bhiêk tơơt kalóóng nôôq akóón, nek nôôq akóón kung e bhiêk tơơt kalóóng Akóón lơq kalóóng Ama. 25Lơq ađôk nek paraaq hươq đu Ađó ơi praaq hươq palơq nôôq he: parmông nh'chró. 26Aku ơi xaraq nôôq paraaq ađô đóng nôôq akóón leq nôôq đu paxuq dharơơl nôôq akóón vôôiq lơt xraang. 27Leq phơn nôôq akóón, rau xut dhơu đu nôôq akóón ơi đơơp patư tââq Ađó biêh tơơt kalóóng nôôq akóón, lơq nôôq akóón kah ve rau kơng đóng mưi ngaai ađek pachóóm ađêi. Taval lóóiq kơi rau xut dhơu ưng Ađó dyơq pachóóm nôôq akóón leq dyóp rau, lơq ađek nek paraaq dhalam eh rau nek galơơk chachââr, kung kơi ơi pachóóm nôôq akóón bhiêk tơơt kalóóng Ađó.

28Xók ađôk, nôôq akóón ơơi, phaai bhiêk tơơt kalóóng Ađó, đóng la xók Ađó bhral, nôôq he ve lóóm grâ nhóól lơq yươq bâân kachiit mat toom mat Chuôq leq bhêêl Ađó bhral. 29La nôôq akóón n'nal kơi Ađó nek bhơt liêm, hơq nôôq akóón kung n'nal kơi dyóp ngaai manưih têêng rau bhơt liêm maar bâân gluh n'niên tââq Ađó.