2 Phi-e-rơ 2

1Dhơ kơi ađek, kơi nôôq manưih đââng taruuih galơơk ơi tơơt dhiq m'pơng dhanuôr manưih, nek nôôq manưih pachóóm galơơk kung e tơơt dhiq m'pơng adhi anó, hơq nek nôôq manưih e tông anóóch đââng tamót nôôq taruuih chrih rơh pahư lơq taai kah huuiq Manưih Kala ơi pók kơl ađêi, hayơq bhiêk tabâân pei rau kanchêt đâh bhlơng. 2Bơk ngaai e ting tađuui nôôq tarnêêng lơt môôp ưng palââng, hơq taai nôôq manưih achêk hơq taruuih ưng paraaq dhalam e bâân praaq tamôôp. 3Tââq lóóm n'thaam, palơq nôôq paraaq chachââr galơơk, piđó e kamuuch adhi anó, hơq taphaak pakoom đóng piđó ganah n'loom kah glêh bil tiêng, lơq rau leng kaxiêt ưng piđó kah mơ bêch. 4Ơi la Yaang Pleng ơi kah đơơp lơơi lơt nôôq dhơn Pleng têêng lơt, bơơi m'peq leq ayêêr ayah dhơuq kalóóng taklooiq ưng dhiq kanam kanheet, Ađó pajaau nôôq manưih bâân takról ađek đóng rau praaq xêi. 5Ađó kung ơi kah lơơi lơt hóng katiêk tââq hanua, bơơi jư lêi takóól chanak, ve Nô-ê, nek manưih taruuih pachóóm bhơt liêm, xók Ađó n'toh garnhuh bó tuh leq hóng katiêk ưng nôôq manưih kah huuiq; 6lơq xók boh róh nôôq dhanuôr Sô-đôôm lơq Gô-mô-rơ xar bló puui, Ađó ơi pakah dhanang leng kaxiêt, têêng palêi tơk nôôq rau dhơơm nek vaaih tơk đóng nôôq manưih kah bhi chap. 7Hơq Ađó ơi trôông paq Loot bhơt liêm, xók dyơq đơơp jarnah xarngaat taai lóóm kanóq kalóóng cha tơơt rau taniêt ưng kabhuh brel huông, 8(tââq manưih bhơt liêm ađô xók mamông tangêi lơh tangêi dhiq m'pơng kabhuh piđó ơi bâân pruut ranhau kalóóng ravaai bhơt liêm ưng ađêi taai lêi lơq xâng nôôq tarnêêng kah charnap); 9nek Chuôq n'nal kơi têêng trôông paq manưih bhi huuiq tââq klêêu lêi lơq kadhâng jư manưih kah dhalam đóng bâân tóóm janah kalóóng tangêi praaq xêi. 10Hơq liêm tââm ting kơi palơq nôôq manưih rajooch kalóóng nôôq malóóch kiêng huông hư ting manưih ti lơq kađiq lêi têêng kala. Nôôq kabhuh laach pajơơr nhâng akoq nhâng tuôr, piđó kah paprô xók tóh taaiq nôôq yaang cha-iil tabah; 11kalóóng xók nôôq dhơn Pleng ve praan karơ lơq mataai raman gamak lơh kah mơ pagluh paraaq praaq xêi tamôôp, jaklâk lóóiq nôôq yaang achêk toom Chuôq. 12Dyơq kabhuh ađô, kơi nôôq akóón dhah kah ve lóóm karnóq, ting kơi parmông bâân tavaaih đóng bâân kóóp lơq leng kaxiêt, praaq tamôôp tơk nôôq rau hơq piđó kah bâân n'nal. Kabhuh ađek kung e bâân pahư tabil kơi rau leng kaxiêt ưng nôôq akóón adhah tôôh, 13xók bâân chróót bharang kơi jêên makông ưng rau môôp lơt. Taai lêi bhuui bhe kơi tarnêêng cha blôônh dhiq m'pơng tangêi tarkaai; kabhuh piđó nek nôôq dham dhôôn anhuq lơq karđiq kachiit, iêm lóóm kalóóng rau galơơk chachââr ưng ađêi xók tơơt cha bhiêk palơq adhi anó; 14ve nôôq kaliêng mat bing tapiing taniêt lơq kah talơơi chamet leq matu lơt, dharơơl kajôông nôôq lóóm kanóq kah mưng têêng lơt môôp, lơq ve luônh lóóm bâân pachóóm lóóm kanóq n'thaam, nek akóón anaaq ưng rau tanóh karuuh! 15Taai m'peq lơơi kalơng tapat dhalam, kabhuh piđó bâân xraang xruk xók ting vôôiq kalơng ưng Ba-la-aam, akóón padruuih Bê-ô, manưih malóóch kiêng jêên makông ưng rau kah dhalam. 16Bơơi ađó ơi đơơp rau trêh teng taai matu lơt ưng ađêi, mưi panong axeh bơq ơi kajơq rau abhôh xươl ưng manưih đââng taruuih xók praaq palơq dhariêng manưih. 17Kabhuh ađô nek tóm kah ve đơơk lơq nek dhaluk dhangeng bâân adhiiq gamak tapar đââng, nek nôôq manưih hơq dhiq kanam kanheet dhaluk dhangeng ơi bâân pakoom lơơi. 18Taai, xók praaq nôôq paraaq parlaach pajơơr dharuông kagóh, tââq lóóm kiêng huông hư ưng manưih ti, kabhuh piđó dharơơl kajôông ngaai nôôq kơi tame gluh lơh tââq kabhuh manưih dyơq mamông kalóóng môôp lơt, 19hươq đương rathaai đóng nôôq manưih achêk, dhiq xók achak araang kabhuh piđó nek têêng xól ưng rau chêt bil. (Taai ngaai nak bâân ve rau đươk lơh, nek manưih ađek bâân têêng xól đóng rau ađek.) 20Ơi la ơi gluh lơh tââq talum hư jir ưng hóng katiêk ve đơơp n'nal Chuôq lơq Chuôq Paq nôôq he, nek Jê-su Chuôq Paq Manưih, bơơi bâân takamak kalóóng ađek val lóóiq, nek nôôq manưih ađek bâân xâng bóóp, hơq talum rau tabhêêl nh'chró ting kơi palơq piđó val kơi parneq lơh kơi xók tarnââp. 21Alua nek rau liêm lơh đóng piđó xók kah n'nal kalơng katôôch bhơt liêm lơh nek ơi n'nal aq hơq palâh hóng lơq gani pachóóm liêm ơi bâân truuih đóng ađêi. 22Paraaq alua dhalam ưng pachóóm tabech ađô ơi yuur avaaih đóng piđó: “Anuq cha lóóiq chana ơi kata” lơq “adhââk ơi hóm sek alaaq pơl kalóóng luuq.”