1 Ti-mô-thê 4:12

1Yaang Liêm praaq drêh dróói kơi kalóóng ganah tatun ki, bơk manưih e m'peq lơơi lóóm huuiq, đââng achak ting nôôq yaang galơơk chachââr lơq taruuih pachóóm ưng abhưi, 2taai rau galơơk a-ô ưng kabhuh galơơk chachââr, lóóm karnóq ưng kabhuh ađek ơi bâân nhâng kakơu, 3xók jơl châq póói đóng, nhan dhaniêng habưưn nôôq chana dhanah đu Yaang Pleng tavaaih buôn pei đơơp palơq lóóm n'nal ơơn tââq manưih huuiq ganơơm lơq kanóq n'nal paraaq dhalam. 4Taai dyóp n'dreh m'ma ưng Yaang Pleng nek kre liêm, lơq yươq ve harau đaang m'peq lơơi xók bâân pei đơơp palơq lóóm n'nal ơơn, 5tââq chana dhanah bâân têêng pasek ve paraaq Yaang Pleng lơq paraaq gavơh nhan.

6Xók patơơt nôôq rau achêk toom mat adhi anó, akóón e nek dhơn ratơơq dhalam liêm ưng Jê-su Chuôq Paq Manưih, bâân ban paar tââq paraaq ưng lóóm huuiq lơq taruuih pachóóm liêm kre đu akóón ơi huuiq xâng. 7Bơơi phaai jơl jak nôôq chiên kah makoq machak hóng katiêk ưng nôôq amooq takóh. Klóóih dhiq ađek, phaai pakeen chênh ađêi leq rau bhi huuiq, 8tââq “rau pachóóm pakeen achak araang nek malơơi malaai kalóóng tangêi kaxe gađóq bơơi pachóóm pakeen lóóm bhi huuiq nek malơơi malaai đóng dyóp tarnêêng, taai ve paraaq hươq đóng klaang ađôk lơq klaang tatun.” 9Paraaq achêk nek đaang huuiq ganơơm lơq đaang pơh đơơp tabhơt, 10tââq nôôq he nhưh nhok lơq tarvei tajơl đóng rau ađôk, taai nôôq he tabóq lóóm rââm dhiq Yaang Pleng taluôn mamông, Ađó nek Chuôq Paq ưng dyóp ngaai, tââm nek ưng manưih huuiq.

11Phaai truuih kayua lơq pató pachóóm nôôq rau achêk. 12Óóq đóng ngaai kađiq lêi tuôi n'dhóm ưng akóón, hơq phaai val xar têêng panloom đóng nôôq manưih huuiq, kalóóng paraaq praaq, kalóóng kơi tarnêêng parvôôiq, kalóóng lóóm tanhơr, kalóóng lóóm huuiq, kalóóng rau sek chadhah. 13Phaai taraang lóóm leq đok bha-aar, bhơơl trêh, pató pachóóm đóng tơk xók aku bhral. 14Óóq m'peq lơơi ơơn tơơt kalóóng akóón, nek ơơn ơi bâân đóng leq akóón tââq paraaq manưih đââng taruuih, nek palơq rau lơơi têi ưng nôôq takóh bhươl.

15Phaai pachóóm pakeen nôôq tarnêêng achêk, phaai taluôn chamet leq piđó, buôn rau tadhơ taklôôq ưng akóón val xar drêh dróói palơq dyóp ngaai. 16Phaai chagơn chamet lêi chênh achak akóón lơq tarnêêng têêng pató pachóóm. Phaai jêi tarang kalóóng nôôq tarnêêng achêk, taai têêng kơi achêk akóón e paq bhơt achak ađêi kala lơq nôôq manưih xâng akóón.