Skip to content
BibleKenya

Katu Bible Literal Text

1 Ti-mô-thê 3

Paraaq ađô nek đaang huuiq ganơơm: “La ngaai ađek rââm têêng manưih muk sư, nek manưih achêk rââm kiêng mưi tarnêêng yaal liêm.” Kơi achêk hơq, manưih muk sư phaai nek manưih yươq dhiq chóóm bâân trêh, kayiik ưng mưi kađiêl, bhriêl chagơn, jư ađêi kala, matư ma-iiq, yaauq tamóói, ve chóóm đuôh pachóóm pahêêl, kah giêng buôh, kah buôn tavaaih tarvei, hơq phaai moor liêm, mapheep dha-iiq kah n'thaam jêên, trêh pachóóm paliêm đong ađêi, ve akóón anaaq xâng bóóp palơq tabhơt lóóm bhi chap (ơi la mưi chanak kah n'nal kơi trêh pachóóm đong ađêi, nek manưih achêk e gamang lêi Akóón Dhơn Chuôq ưng Yaang Pleng ng'kơi chóóm?), kah chóóm nek manưih tame huuiq, đóng yươq ơi taai yuur laach jơơr hơq manưih achêk xruuk leq rau xêi janah kơi abhưi. Palâh lóóiq, manưih têêng muk sư kung phaai ve paraaq móón liêm tââq manưih eh akóón dhơn Chuôq, buôn manưih achêk kah pâng leq rau kađiq kachiit lơq mơk tarnêêng ưng abhưi.

Markơi ađek, nôôq chơp sưưq phaai charnap, kah praaq bơơr kơi, kah giêng buôh alak, kah n'thaam dhahik, jư lêi rau đu lalââp ưng lóóm huuiq palơq lóóm karnóq sek chadhah. Mat lââng, piđó kung phaai bâân klêêu klôôq laloom, hayơq xong ađek phaai lơơi piđó têêng yaauq xók yươq bâân trêh jươm.

Nôôq manưih kađiêl kung kơi achêk, phaai charnap, kah praaq tamôôp, jư ađêi kala, bhơt lóóm kalóóng dyóp rau.

Nôôq chơp sưưq phaai nek kayiik ưng mưi kađiêl, trêh pachóóm paliêm akóón anaaq lơq bhơt đong ađêi. Taai nôôq manưih têêng yaauq dhalam liêm đââng chô đóng ađêi dhiq tarnơơt liêm kre lơq bơk rau grâ nhóól kalóóng lóóm huuiq dhiq Jê-su Chuôq Paq Manưih.

Aku xaraq nôôq paraaq ađô đóng akóón, rââm tơk tham akóón đâh bhlơng, bơơi la aku jih tơk, nek akóón ve chóóm n'nal phaai praaq têêng ng'kơi kalóóng đong ưng Yaang Pleng, hơq ađek nek Akóón Dhơn ưng Yaang Pleng taluôn mamông, jarơng lơq tanól đương jaklâk ưng paraaq dhalam. La lââp leq rau huuiq bhi alua nek gamak bhlơng kah đuôh chóóm tarkaai, nek:

“Yaang bâân pakah kalóóng ng'kar m'bech,

bâân đóók bhơt liêm kalóóng Yaang Liêm,

bâân chalaang lêi tââq dhơn Pleng,

bâân truuih karơ dhiq m'pơng nôôq dhanuôr,

bâân huuiq ganơơm dhiq hóng katiêk,

bâân yuur padyók kalóóng cha-iil tabah.”

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.