1 Ti-mô-thê 2

1Kơi achêk hơq, laloom bhơt, aku chut kayua nôôq paraaq mââl nhan, praaq chiên, gavơh đóng, n'nal ma-ơơn chóóm bâân yuur tapôông đóng dyóp ngaai, 2đóng nôôq bhua lơq tabhơt nôôq ngaai dyơq tơơt kalóóng dhiq tanơơt kataai karơ, buôn nôôq he ve chóóm mamông mưi đơơi yươq rauha lơq khe liêm palơq dyóp rau huuiq bhi lơq paraaq tarnêêng. 3Ađek nek rau liêm kre lơq dhalam đaang toom mat Yaang Pleng, Chuôq Paq nôôq he, 4nek Yaang kiêng dyóp ngaai bâân paq lơq vôôiq tơk dhiq đơơp n'nal paraaq dhalam. 5Taai chapiên ve mưi Yaang Pleng lơq mưi Yaang dhiq m'pơng Yaang Pleng lơq akóón manưih, ađek nek Jê-su Chuôq Paq Manưih, mưi akóón manưih, 6Yaang ơi pajaau chênh ađêi têêng panók pók đóng dyóp ngaai, kơi paraaq taruuih leq pâng bhêêl ganah, 7tââq paraaq taruuih achêk hơq aku ơi bâân tabóq têêng manưih truuih taruuih liêm lơq sưưq-đô, aku praaq lalua kalóóng Chuôq Paq Manưih, aku kah praaq chachââr, hơq nek têêng manưih pachóóm đóng nôôq dhanuôr katiêk lââng leq lóóm huuiq lơq paraaq dhalam.

8Taai kơi chêk, aku kiêng nôôq padruuih tơơt dyóp dhiq phaai gavơh nhan, jarơ têi yuur sek chadhah kah ting đââng rau grâ jar-ââih lơq tarkaai tarlak, 9markơi ađek, nôôq adhi anó pađiil phaai têêng paliêm chênh ađêi kalóóng chanam pâng dhalam palơq lóóm pa-katưưiq lơq pakala, eh rau palơq tarnêêng klaanh xok, nek palơq vaang, môôiq ngok, môôiq kun aau mat jêên, 10hơq palơq rau targlap palơq manưih pađiil đóók móón ve lóóm bhi kakhin Yaang Pleng ve nôôq tarnêêng liêm.

11Pađiil parkan phaai hok tamóh kalóóng moor parngau, kalóóng rau huuiq xâng bhơt dyóp. 12Mat lââng, aku kah đóng pheep pađiil parkan pachóóm pahêêl môôiq têêng kala dhiq padruuih, hơq phaai parngau. 13Taai A-đaam ơi bâân tavaaih laloom, hayơq ve tơk Ê-va, 14lơq A-đaam yươq bâân galơơk chachââr, bơơi manưih pađiil, xók tabhơt bâân dharơơl galơơk, ơi ruul tơk dhiq matu lơt. 15Dhơ kơi ađek, manưih pađiil e bâân paq dhiq tarnêêng n'niên akóón, la kơi piđó bhiêk tơơt kalóóng lóóm huuiq, lóóm tanhơr lơq rau sek chadhah, palơq lóóm karnóq liêm karơ.