1 Tê-sa-lô-ni-ka 5:16

1Adhi anó ơơi, leq tangêi jơ lơq ganah, adhi anó kah kơng nôôq yi xaraq đóng adhi anó. 2Ơi chênh adhi anó n'nal lóng drêh kơi tangêi ưng Chuôq bhral n'đó kơi — kơi đu tatông kalóóng hayum kanam. 3Xók palââng móón: “khe liêm lơq yươq rauha,” nek rau chêt bil parmat yuur vaaih dhiq piđó, thê kơi ka-ai luônh ayaai nek palơq manưih pađiil xók đađââng akóón, lơq piđó dhakơi kah leq róch. 4Bơơi, adhi anó ơơi, adhi anó yươq tơơt kalóóng bóng kanam, buôn hayơq tangêi achêk avaaih tơk leq adhi anó parmat kơi manưih tatông. 5Ơi adhi anó maar nek akóón ưng taklaaq brương lơq akóón ưng tangêi. Nôôq he yươq mađó leq hayum môôiq bóng kanam, 6kơi achêk hayơq, nôôq he óóq bêch kơi nôôq manưih lââng palâh lóóiq, nôôq he kơng meh đương lơq n'taach marngal. 7Ơi manưih bêch nek bêch xók hayum, lơq đu ból nek ból xók hayum. 8Bơơi taai mađó leq tangêi, hayơq nôôq he phaai n'taach marngal xơp aau gróh ưng lóóm huuiq lơq lóóm tanhơr, palơq panơơng bhaxêi — nek lóóm rââm jóói paq. 9Taai Yaang Pleng ơi kah kiêng đóng nôôq he đơơp xâng pagrâ janah, hơq buôn đơơp rau paq jóói đươi Chuôq nôôq he, nek Chuôq Jê-su Paq Manưih. 10Yaang ơi chêt taai nôôq he, buôn nôôq he, dhơ blââk môôiq bêch, nôôq he maar nek mamông palơq Ađó. 11Taai ađek, phaai bhơơl pahei xóng ađêi, manưih ađô phaai tơq hayuur manưih tôôh, kơi adhi anó dyơq xók têêng.

12Adhi anó ơơi, nôôq yi nhan adhi anó phaai bhi nh'nhơr nôôq manưih đơơp hadhơơp nhok dhiq m'pơng adhi anó, đââng chơơng adhi anó kalóóng Chuôq, pahêêl yua adhi anó, 13lơq phaai kanóq tơk piđó pakơi bhi chap kalóóng lóóm tanhơr taai tarnêêng têêng ưng piđó. Phaai mamông paliêm palơq xóng ađêi. 14Adhi anó ơơi, nôôq yi chut yua adhi anó: phaai patrêh móón manưih kah matich, phaai bhơơl pahêêl manưih kalơm lóóm, phaai tơq hayuur manưih dhur lóóm, phaai jruôn parngau palơq tabhơt dyóp ngaai. 15Phaai chagơn, óóq ngaai pei aak chróót aak đóng ngaai, palâh lóóiq, phaai taluôn ting viêng rau liêm kre, pakoom đóng xóng ađêi lơq đóng dyóp ngaai. 16Phaai taluôn luôn bhuui marhaal. 17Phaai gavơh nhan kah ha-ơt. 18Kalóóng bhơt dhơ dharau, phaai ma-ơơn, taai rau ađek nek karnóq kiêng ưng Yaang Pleng pakoom đóng adhi anó kalóóng Chuôq Jê-su Paq Manưih. 19Óóq tapat Yaang Liêm. 20Óóq kađiq lơơi nôôq paraaq manưih đââng taruuih. 21Phaai haliq lêi dyóp rau. Phaai pei jư hau rau nek liêm kre. 22Phaai róch changaai lơh dyóp rau đơơp ngóq lơt aak.

23Gavơh nhan chênh Yaang Pleng yươq rauha pasek paliêm adhi anó dyóp bhơt, lơq nhan tabhơt lóóm karnóq, ravaai, achak araang ưng adhi anó bâân jư lêi đóng óóq dhiq chóóm trêh xók Chuôq nôôq he, nek Chuôq Jê-su Paq Manưih dhuônh jaq. 24Yươq dhơ lóóm alua nek Yaang dhaloong adhi anó, kung nek Yaang e yuur têêng tarnêêng achêk.

25Adhi anó ơơi, kung phaai gavơh nhan đóng nôôq yi dyơq.

26Nhan tamóh tham tabhơt adhi anó palơq chanum chum liêm. 27Aku vơn dhanóók Chuôq truuih leq adhi anó phaai đóng tala thơ ađô bâân đok leq tabhơt adhi anó.

28Rââm nhan ơơn phươk liêm ưng Chuôq nôôq he, nek Chuôq Jê-su Paq Manưih tơơt palơq adhi anó.