1 Tê-sa-lô-ni-ka 4

1Kơi achêk hayơq, tatun xariêq, nhan móón adhi anó, nôôq yi mââl nhan lơq bhơơl pahêêl adhi anó kalóóng Chuôq, nek Chuôq Jê-su, dhiêp kơi adhi anó ơi pei đơơp tââq nôôq yi n'đó kơi nek rau kơng bhlơng đóng adhi anó buôn mamông lơq têêng liêm lóóm Yaang Pleng, kung pakơi adhi anó dyơq mamông, hơq đóng adhi anó ve chóóm ruul tơk lơh dyơq. 2Ơi adhi anó n'nal n'đó nôôq paraaq pachóóm nôôq yi ơi truuih đóng adhi anó tââq Chuôq Jê-su. 3Ơi ađôk nek karnóq kiêng ưng Yaang Pleng, hơq nek rau vaaih liêm ưng adhi anó: phaai jư ađêi róch changaai rau tapiing taniêt; 4ting chanak kalóóng adhi anó phaai n'nal jư lêi achak araang ađêi kalóóng rau sek tabah lơq bhi chap, 5kah ting tađuui marlóóch kiêng tââq lóóm (thê kơi dhanuôr nguôi nek đu kah n'nal Yaang Pleng); 6buôn óóq ngaai têêng lơt lơq kapươk malua adhi anó ađêi kalóóng tarnêêng ađô, ơi taai Chuôq nek Yaang chróót leq dyóp rau ađek, kơi nôôq yi kung ơi loom praaq lơq drêh taniih trêh móón đóng adhi anó. 7Ơi Yaang Pleng kah dhaloong nôôq he tơk rau đu anhuq, bơơi mót klóóng rau tabah liêm. 8Taai kơi achêk, ngaai kah đươi pachóóm ađô eh rau kah đươi akóón manưih, hơq nek kah đươi Yaang Pleng, Yaang đóng Chuôq Yaang Liêm Ađó leq adhi anó.

9Hayơq leq lóóm tanhơr kre liêm bhóng ađêi, adhi anó yươq kơng nôôq yi xaraq đóng adhi anó, ơi chênh adhi anó bâân Yaang Pleng pachóóm phaai tanhơr xóng ađêi. 10Ơi alua, adhi anó ve têêng kơi achêk nek palơq tabhơt adhi anó plok kalóóng xưưq Ma-xê-đoan. Bơơi adhi anó ơơi, nôôq yi mââl bhơơl adhi anó bhiêk yuur tơk lơh dyơq, 11lơq phaai raan pakarơ mamông paliêm, gamang karaang nôôq tarnêêng ưng ađêi, tââq têi ađêi matêêng, kơi nôôq yi ơi truuih pachóóm adhi anó, 12buôn adhi anó ve chóóm tơơt cha kơi pâng dhalam toom mat manưih nguôi lơq yươq ve rau tabhuch tapiêl.

13Adhi anó ơơi, nôôq yi kah kiêng adhi anó kah n'nal rau leq nôôq manưih ơi bêch, buôn adhi anó yươq ranguôq lóóm kơi nôôq manưih lââng nek nôôq đu kah ve lóóm rââm. 14Ơi la nôôq he huuiq kơi Chuôq Jê-su ơi chêt lơq ơi mamông lóóiq, nek Yaang Pleng kung e đââng nôôq đu ơi bêch tơk palơq Ađó tapâng dhiq Chuôq Jê-su. 15Ganương leq paraaq ưng Chuôq, nôôq yi móón rau ađô đóng adhi anó, kơi nôôq he, nôôq manưih xók dyơq mamông, nôôq manưih dyơq tơơt lóóiq đóng patơk bhêêl Chuôq dhaluônh, dhakơi kah vôôiq laloom nôôq manưih ơi bêch. 16Ơi chênh Chuôq e tââq pleng dhaluônh palơq paraaq kayua, palơq dhariêng ưng dhơn Pleng taha, nek palơq dhariêng karyóól ưng Yaang Pleng, hayơq nôôq manưih ơi chêt kalóóng Chuôq Paq Manưih e mamông lóóiq laloom tabhơt. 17Hayơq tơk nôôq he, nek nôôq manưih xók dyơq mamông, nôôq manưih dyơq tơơt lóóiq, e bâân yuur padyók nek palơq piđó kalóóng garboq dhaluk buôn lum Chuôq dhiq bharyô, lơq kơi achêk, nôôq he e tơơt palơq Chuôq taluôn luôn. 18Taai ađek, phaai bhơơl pahêêl xóng ađêi palơq nôôq paraaq ađô.