Katu Bible Literal Text
1 Kô-rin-tô 16
Leq tarnêêng nhan pagoop đóng nôôq akóón dhơn Chuôq, ting kơi aku ơi pató pachóóm đóng nôôq akóón dhơn Chuôq parah Ga-la-ti, adhi anó kung phaai têêng kơi achêk. Dyóp tangêi tarnââp ưng tapól tangêi, ting chanak kalóóng adhi anó phaai lơơi pantua, xók goop karong đô-đaak n'đó ađek la manưih achêk bâân yưưm pale chanoh, buôn xók aku bhral, e yươq kơng phaai pagoop karong rau dyơq bhêêl ađek. Mat lââng, xók aku bhral, la adhi anó iêm lóóm nôôq manưih ngaai, nek aku e kayua piđó đââng kaliim ưng adhi anó nek palơq bha-aar thơ tơk Jê-ru-sa-leem. Hayơq la tarnêêng achêk kung nek rau đaang buôn aku phaai vôôiq, nek piđó e yuur vôôiq palơq aku. Bơơi aku e tơk palơq adhi anó xong xók chênh aku ơi vôôiq hót Ma-xê-đoan, ơi aku xók vôôiq kóh hót Ma-xê-đoan. Hayơq ve n'jau aku e tơơt lóóiq palơq adhi anó, môôiq patơk mơ bhơt nil hapruôt, buôn adhi anó ve chóóm đââng aku yuur vôôiq la aku kơng vôôiq ve leq ađek. Ơi aku kah kiêng lum adhi anó bhêêl ađôk dhiq kalơng vôôiq lalơh, ơi aku rââm bhiêk tơơt palơq adhi anó mưi ganah, la Chuôq đóng pheep. Bơơi aku e tơơt lóóiq dhiq Ê-phê-sô đóng patơk Bhiêk xââng jêt tangêi, Taai mưi bóng palóng bhươh lơq ve mayưưm ơi yuur lóng đóng aku, hơq bơk beq lââng nek xók chađơl kajơq aku.
Mat lââng, la Ti-mô-thê bhral, phaai chamet lêi buôn ađó achêk tơơt palơq adhi anó ting kơi yươq rau paprô kachiit, taai ađó achêk xók têêng tarnêêng Chuôq, dhiêp kơi aku. Taai ađek, óóq ngaai hayơq lêi kađiq ađó achêk. Bơơi phaai poor ađó achêk vôôiq kalơng yươq rauha, buôn ađó achêk ve chóóm tơk palơq aku, ơi aku dyơq đương rââm ađó achêk nek palơq nôôq adhi anó lââng. Hayơq leq manưih adhi anó A-bô-lô, aku ơi bhơt praan bhơơl lóóm ađó achêk buôn đóng ađó achêk tơk palơq adhi anó palơq nôôq adhi anó lââng, hơq ađek eh alua ve rau kanóq kiêng ưng ađó achêk ng'kơi đóng ađó achêk tơk xók bhêêl ađôk. Dhơ kơi ađek ađó achêk e tơk xók ve bâân bhêêl.
Phaai hêch lêi; phaai dyương tamưng kalóng lóóm huuiq; phaai grâ lóóm đaang nek manưih padruuih; phaai grâ karơ. Phaai lơơi dyóp tarnêêng ưng adhi anó bâân yuur vaaih kalóóng lóóm tanhơr.
Mat lââng, nhan móón adhi anó, aku bhơơl lóóm adhi anó (adhi anó n'nal manưih đong ưng Sê-pha-na, kơi piđó nek pale bóóng nil tanââp dhiq A-chaai, lơq piđó ơi tư đââng achak leq tarnêêng têêng yaauq nôôq kabhuh huuiq), buôn đóng adhi anó kung xâng bóóp nôôq manưih kơi achêk palơq tabhơt nôôq ngaai marau tarnêêng têêng lơq nhưh nhok. Aku bhuui marhaal leq tarnêêng Sê-pha-na, Phôôt-tu-na lơq A-chaai-kơ bhral, taai piđó ơi poor tabing hau rau dyơq tabhuch tââq dhiq adhi anó. Taai piđó ơi têêng tame lóóiq lóóm karnóq ưng aku lơq ưng adhi anó. Kơi achêk, phaai đơơp đươi nôôq manưih kơi achêk.
Nôôq kabhuh akóón dhơn Chuôq xưưq A-si pagơơi paraaq tamóh tham tơk adhi anó. A-kui-la lơq Bê-rit-siin, nek palơq kabhuh akóón dhơn Chuôq nhoom dhiq đong ưng piđó, bhuui lóóm tamóh tham adhi anó kalóóng chuôq. Tabhơt nôôq adhi anó tamóh tham adhi anó. Phaai tamóh tham xóng ađêi palơq chanum yeh Chuôq.
Paraaq tamóh tham ađô nek tââq chênh têi aku — Phaau-lô. La ngaai manưih kah bhi nh'nhơr Chuôq, nek manưih ađek phaai đơơp rau tóh đua! Kakoh Chuôq nôôq akóón, nhan Amei bhral! Rââm nhan ơơn phươk liêm ưng Chuôq Jê-su tơơt palơq adhi anó. Lóóm tanhơr ưng aku tơơt palơq tabhơt adhi anó kalóóng Jê-su Chuôq Paq Manưih. A-meen.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.