1 Kô-rin-tô 15

1Nhan móón adhi anó, aku pakah đóng adhi anó n'nal leq Taruuih Liêm hơq aku ơi truuih móón đóng adhi anó, nek rau hơq adhi anó kung ơi đơơp xâng, lơq dyương tamưng dhiq ađek, 2kung tââq Taruuih Liêm achêk, hơq adhi anó bâân paq, la adhi anó pei dyuôch tamưng taruuih hơq aku ơi truuih pachóóm đóng adhi anó, la kah alua kơi achêk, nek adhi anó ơi huuiq kơi kah malơơi malaai. 3Taai kalóóng nôôq rau laloom tââm aku ơi truuih đóng adhi anó, nek rau hơq aku kung ơi đơơp huuiq, ađek nek Chuôq Paq Manưih ơi chêt taai matu lơt ưng nôôq he ting paraaq Bha-aar Yaang Pleng. 4Ađó ơi bâân tơp, lơq ơi bâân têêng mamông lóóiq leq tangêi đu pe ting paraaq Bha-aar Yaang Pleng. 5Lơq Ađó ơi pakah đóng Sê-pha, hayơq đóng majêt bơơr sưưq-đô. 6Tââq ađek, Ađó ơi pakah ađêi đóng lơh xââng hariêng adhi anó bâân lêi palơq mandrươh, pabhơt bơk ngaai kalóóng nôôq piđó ađôk bhiêk dyơq mamông, bơơi maphơn ơi xir. 7Xong ađek, Ađó ơi tabhral đóng Ja-kơ, hayơq đóng tabhơt nôôq sưưq-đô. 8Kơi achêk hayơq, đóng patơk xariêq paluch ưng dyóp ngaai, Ađó kung ơi pakah ađêi đóng aku bâân lêi, pakơi đóng mưi panong paniên n'niên nhuum. 9Taai aku nek manưih katưưiq tââm kalóóng nôôq sưưq-đô, nek manưih kah ve chóóm đaang rau đóng bâân đóók nek sưưq-đô, taai aku ơi kóóp janah akóón dhơn Chuôq ưng Yaang Pleng. 10Bơơi tââq ơơn phươk liêm ưng Yaang Pleng hơq aku nek chênh ađêi xók ađôk, lơq ơơn phươk liêm ưng Ađó kalóóng aku eh rau nek kah malơơi. Klóóih leq ađek, aku ơi nhok jarnah bơk xưa lơh tabhơt nôôq piđó ađek, bơơi eh rau aku, hơq nek ơơn phươk liêm ưng Yaang Pleng tơơt palơq aku. 11Kơi achêk, dhơ nek aku môôiq nek nôôq piđó achêk, nek nôôq yi truuih pachóóm kơi achêk lơq adhi anó ơi huuiq kơi achêk.

12Dhơ kơi ađek, la Chuôq Paq Manưih bâân truuih pachóóm kơi Ađó ơi bâân têêng mamông lóóiq tââq akan chêt, nek ng'kơi têêng mưi phơn manưih kalóóng adhi anó móón kơi kah ve rau mamông lóóiq ưng manưih chêt? 13Bơơi la kah ve rau mamông lóóiq ưng manưih chêt, hơq chênh nek Chuôq Paq Manưih kung ơi kah bâân têêng mamông lóóiq; 14hơq la Chuôq Paq Manưih ơi kah bâân têêng mamông lóóiq, nek rau truuih pachóóm ưng nôôq yi nek kah malơơi, lơq lóóm huuiq ưng adhi anó kung kah rau akiiq liêm. 15Hayơq nôôq yi patơk mơ bâân lêi nek nôôq manưih praaq truuih chachââr ưng Yaang Pleng, tââq nôôq yi ơi praaq truuih leq Yaang Pleng kơi Ađó ơi têêng Chuôq Paq Manưih mamông lóóiq, kơi achêk hayơq pajra kơi manưih chêt kah bâân têêng đóng mamông lóóiq, nek Ađó ơi kah têêng Yaang achêk mamông lóóiq. 16Ơi la manưih chêt kah bâân têêng mamông lóóiq, hơq chênh nek Chuôq Paq Manưih kung ơi kah bâân têêng mamông lóóiq, 17lơq la Chuôq Paq Manưih ơi kah bâân têêng mamông lóóiq, nek lóóm huuiq ưng adhi anó nek kah malơơi; adhi anó bhiêk dyơq tơơt kalóóng matu lơt ađêi. 18Kơi achêk hayơq nôôq manưih ơi xir kalóóng Chuôq Paq Manưih kung bâân chêt bil. 19La kalóóng nôôq he ve lóóm rââm dhiq Chuôq Paq Manưih chapiên kalóóng parmông ađôk, hơq nôôq he nek nôôq manưih đaang kayô lơh bhơt kalóóng tabhơt dyóp ngaai.

20Bơơi xók ađôk, Chuôq Paq Manưih ơi bâân têêng mamông lóóiq tââq akan chêt, nek pale tanââp nil ưng nôôq manưih ơi xir. 21Ơi taai tââq mưi chanak hơq ve akan chêt, nek kung tââq mưi chanak hơq ve rau mamông lóóiq ưng manưih chêt. 22Ơi n'đó kơi kalóóng A-đaam, dyóp ngaai maar chêt, nek kung kơi achêk, kalóóng Chuôq Paq Manưih, dyóp ngaai nek bâân têêng đóng mamông. 23Bơơi ting chanak ting matââq tââq n'tua ưng ađêi: Chuôq Paq Manưih nek pale tanââp nil; xong tơk nek nôôq manưih mađó leq Chuôq Paq Manưih xók bhêêl val lóóiq ưng Ađó. 24Xong ađek e nek rau tatun xariêq, bhêêl Ađó pajaau katiêk pleng lóóiq leq Yaang Pleng nek Ama, xók Ađó ơi leng pabhơt kala kadhâng akoq, palơq dyóp kala kataai lơq praan karơ. 25Ơi Yaang achêk phaai kadhâng akoq đóng tơk xók Ađó ơi patơơt pabhơt nôôq manưih aróp brau huông dhiq dyung ađêi. 26Manưih brau tatun xariêq bâân leng kaxiêt nek akan chêt. 27Taai “Ađó ơi patơơt dyóp rau raal dyung ađêi.” Bơơi xók praaq kơi.“ Ađó ơi patơơt dyóp rau,” nek drêh dróói nek kah ve pâng Yaang têêng dyóp rau xâng bóóp Ađó. 28Xók achêk, xók dyóp rau ơi bâân têêng phaai xâng Ađó, nek bhêêl achêk chênh Akóón kung e xâng bóóp Yaang ơi têêng dyóp rau xâng ađêi, buôn Yaang Pleng ve chóóm nek tabhơt kalóóng dyóp rau.

29La kah lalua kơi achêk, nek nôôq manưih đơơp bap-teem klóóih đóng manưih chêt e têêng harau? La manưih chêt kah lalua bâân têêng đóng mamông lóóiq, nek hau kơi nôôq manưih achêk đơơp bap-teem klóóih đóng nôôq manưih tôôh? 30Hayơq taai hau kơi nôôq yi đơơp tarmenh dyóp bhêêl? 31Adhi anó ơơi, aku chêt dyóp tangêi, tââq rau tarhơơnh liêm leq adhi anó, nek rau aku ve kalóóng Jê-su Chuôq Paq Manưih, Chuôq nôôq he. 32Pajra la ting kơi ưng akóón manưih, aku ơi tarjơl palơq nôôq adhah grâ dhiq Ê-phê-sô, nek malơơi harau đóng leq aku? La manưih chêt kah bâân têêng mamông lóóiq, nek “phaai cha, lơq ơm, taai tangêi rayiiu nôôq he chêt.” 33Óóq lơơi bâân galơơk chachââr: “Nôôq manưih marau tarnêêng môôp têêng pahư tabil nôôq lóóm karnóq liêm.” 34Phaai marngal val lóóiq kơi đaang phaai ve! Lơq óóq dyơq têêng matu lơt. Ơi mưi phơn manưih kah ve n'nal rarau leq Yaang Pleng. Aku praaq rau ađô cha-ól leq aan kachiit mat ưng adhi anó.

35Dhơ kơi ađek, mưi chanak tôôh e móón: “Manưih chêt bâân têêng mamông lóóiq palơq n'đó kơi, hơq piđó tơk palơq achak araang ng'kơi?” 36Manưih ngôôk ngaak tôôh ơi! Rau hơq amei đââng choh kah chóóm têêng đóng mamông la ađó kah chêt aq. 37Lơq rau amei đââng choh nek eh rau dyaang achak ađó e val xar, palâh lóóiq, amei đââng choh chapiên nek kaliêng m'ma, praaq babi ađó ve nh'jau nek kaliêng haró môôiq kaliêng rau lââng. 38Bơơi Yaang Pleng đóng leq ađó mưi dyaang achak ting kơi kanóq Ađó kiêng, lơq đóng ting kaliêng m'ma mưi dyaang achak n'tua. 39Kah alua dyóp ng'kar m'bech nek kung mưi ng'kar m'bech. Palâh lóóiq nek ng'kar m'bech n'tua ưng akóón manưih, ng'kar m'bech n'tua ưng nôôq kabhuh adhah, ng'kar m'bech n'tua ưng nôôq kabhuh achim, lơq ng'kar m'bech n'tua ưng nôôq kabhuh kadhóóng. 40Kung ve nôôq dyaang achak dhiq pleng lơq nôôq dyaang achak dhiq katiêk. Dhơ kơi ađek cha-iil tabah mađó leq pleng nek kơi ađô, hayơq cha-iil tabah mađó leq katiêk nek kơi tôôh. 41Cha-iil tabah ưng mat tangêi nek kơi ađô, cha-iil tabah ưng mat bharương nek kơi tôôh, lơq cha-iil tabah ưng nôôq chatur xamenh nek n'tua dyơq. Taai chatur xamenh ađô n'tua kơi palơq chatur xamenh tôôh leq cha-iil tabah. 42Rau mamông lóóiq ưng manưih chêt kung kơi achêk. Dyaang achak bâân choh katơp kalóóng nek bâân khung nh'xoq, dyaang achak mamông lóóiq kalóóng nek vaaih yươq chóóm chêt. 43Bâân choh katơp kalóóng kadhaap janah, bâân mamông lóóiq kalóóng cha-iil tabah; bâân chok katơp kalóóng dhur óóch, bâân mamông lóóiq kalóóng kataai karơ. 44Bâân choh katơp nek dyaang achak kaxu, bâân mamông lóóiq nek dyaang achak cha-iil tabah. La ve dyaang achak kaxu, nek kung ve dyaang achak cha-iil tabah. 45Đóng hayơq kung ve paraaq xaraq: “Manưih tarnââp nek A-đaam ơi val xar yaang ravaai mamông.” A-đaam tatun xariêq nek Yaang đóng rau parmông. 46Bơơi eh rau dyaang achak cha-iil tabah ve laloom, hơq nek dyaang achak kaxu, xong ađek hayơq tơk dyaang achak cha-iil tabah. 47Manưih tarnââp gluh tââq katiêk, nek manưih mađó leq katiêk. Manưih đu bơơr bhral tââq pleng. 48Manưih mađó leq katiêk achêk n'đó kơi, nek nôôq manưih mađó leq katiêk kung kơi achêk. Lơq Yaang mađó leq pleng n'đó kơi, nek nôôq manưih mađó leq Pleng kung kơi achêk. 49Kơi nôôq he ơi xơp dyaang a-ô ưng manưih mađó leq katiêk, nek nôôq he kung kơng xơp dyaang a-ô ưng Yaang mađó leq pleng.

50Mat lââng, nhan móón adhi anó, aku nhan móón rau ađô, kơi achak lơq ahaam kah chóóm bâân đơơp katiêk ưng Yaang Pleng. Rau hư bil kung kah bâân đơơp rau kah hư bil. 51Lêi nô, aku đóng adhi anó n'nal mưi rau lalââp: Eh rau tabhơt nôôq he e bêch, bơơi tabhơt nôôq he e bâân n'luôt xar, 52kalóóng gamleh mat, kalóóng kabhriêp mat, mót dhariêng karyóól xariêq. Taai karyóól e yuur tar-auq, lơq nôôq manưih chêt e bâân têêng mamông lóóiq kalóóng dyaang achak yươq chêt bil, hayơq nôôq he e bâân n'luôt xar. 53Taai pa-eep dyaang achak hư bil ađô pei xơp rau yươq chóóm chêt, lơq dyaang achak phaai chêt ađô pei xơp rau yươq mơ chêt. 54Hayơq xók dyaang achak hư bil ađô ơi pei xơp rau yươq mơ chêt, lơq dyaang achak phaai chêt ađô ơi pei xơp rau yươq mơ chêt, nek bhêêl achêk, paraaq ơi xaraq e yuur vaaih kơi ađô:

“Akan chêt ơi bâân lâân galuôn kalóóng rau lơh đươk.”

55“Akan chêt ơơi, rau đươk ưng amei n'dhiq tơơt?

Akan chêt ơơi, havi chapââr ưng amei n'dhiq tơơt?”

56Hơq havi chapââr ưng akan chêt nek matu lơt, hayơq kataai karơ ưng matu lơt nek gani. 57Bơơi tapôông leq Yaang Pleng paraaq ma-ơơn, Yaang đóng leq nôôq he rau đươk lơh dhiq Chuôq nôôq he, Jê-su Chuôq Paq Manưih! 58Taai kơi achêk, adhi anó bơk nh'nhơr ưng aku ơơi, phaai val kơi tamưng panhơm, kah tââi tadhơ, xók taluôn luôn xưa bhlaai kalóóng tarnêêng Chuôq, taai n'nal kơi rau kadhaap nhok ưng adhi anó eh rau nek kah malơơi kalóóng Chuôq.