1 Kô-rin-tô 14

1Phaai ting taviêng lóóm tanhơr, bơơi phaai jêi tarang leq nôôq ơơn liêm đuui chuôq, hơq tââm nek buôn adhi anó ve chóóm praaq taruuih Yaang Pleng. 2Taai manưih praaq paraaq chrih nek kah praaq palơq akóón manưih, bơơi nek palơq Yaang Pleng, taai kah ngaai n'nal, dhơ kơi achêk, ađó praaq nôôq rau đu lalââp kalóóng lóóm karnóq. 3Bơơi manưih praaq taruuih Yaang Pleng nek yuur praaq rau têêng tahayuur, lơq pahêêl palơq rau paraaq bhơơl đóng leq palââng. 4Manưih praaq dhariêng chrih nek têêng tahayuur ađêi kala, hayơq manưih praaq taruuih Yaang Pleng nek têêng tahayuur akóón dhơn Chuôq. 5Mat lââng aku rââm lêi tabhơt adhi anó praaq dhariêng chrih, hơq hayơq lơh kơi achêk dyơq, ađek nek adhi anó ve chóóm praaq taruuih Yaang Pleng. Bơơi manưih praaq taruuih Yaang Pleng liêm pabhlơng lơh manưih praaq dhariêng chrih chapiên ngaai ađek ve chóóm kluôh lók, hơq đóng akóón dhơn Chuôq bâân đơơp rau têêng tahayuur. 6Bơơi, nhan móón adhi anó, pajra kơi xók ađôk aku tơk praaq nôôq rau dhariêng chrih palơq adhi anó, nek aku e poor harau malơơi đóng adhi anó la aku kah praaq palơq adhi anó kalóóng rau pakah đóng lêi, môôiq tarbech galang bheh bhriêl, hamôôiq palơq paraaq taruuih Yaang Pleng môôiq paraaq pató pachóóm? 7Patơk mơ nôôq rau kah n'nal rarau yuur vaaih dhariêng, dhơ nek n'dreh aluôt môôiq tambhreh haak, la ting rau kah yuur tavaaih nôôq dhariêng xanuul n'tua lalêi, nek dhariêng bâân plong dhiq aluôt hamôôiq dhariêng bâân peh dhiq tambhreh haak e bâân đơơp n'nal palơq n'đó kơi? 8Ơi la karyóól yuur vaaih xanuul kah drêh dróói nek ngaai e ravang lơơi đóng ganhuh tarjơl? 9Adhi anó kung thê kơi achêk: La tapâng dhiq bóóp n'taak ađêi, adhi anó kah praaq pakah paraaq praaq drêh dróói khe n'nal, nek ng'kơi têêng rau bâân gluh paraaq e ve chóóm bâân n'nal? Taai adhi anó chapiên nek xók papraaq chiên palơq adhiiq. 10Ve nôôq rau paraaq dhariêng n'tua kơi dhiq hóng katiêk, dhakơi ve n'jau nek bơk bhlơng, lơq kah ve n'đó nek kah malơơi. 11Kơi achêk, la aku kah n'nal kiêng móón ưng dhariêng paraaq, hơq aku e nek manưih katiêk lââng nek palơq manưih xók papraaq, lơq manưih xók papraaq achêk e nek manưih katiêk lââng nek palơq aku. 12Adhi anó kung thê kơi achêk. Taai adhi anó nek nôôq manưih jêi tarang kalóóng nôôq ơơn liêm đuui Chuôq malóóm tơk tarnêêng têêng tahayuur akóón dhơn Chuôq, hayơq phaai chik-chêk hơq đóng adhi anó ve xưa raai. 13Ơi kơi achêk, manưih praaq dhariêng chrih phaai gavơh nhan buôn ngaai ađek ve chóóm lók kluôh. 14La aku gavơh nhan palơq dhariêng chrih, nek lóóm yaang ưng aku gavơh nhan, bơơi lóóm karnóq aku nek kah rau mayưưm. 15Kơi achêk nek ng'kơi ađôk? Aku e gavơh nhan palơq lóóm yaang, bơơi kung e gavơh nhan palơq lóóm karnóq. Aku e babóóch palơq lóóm yaang, bơơi kung e babóóch palơq lóóm karnóq. 16La kah, la adhi anó babóóch chachơp palơq lóóm yaang, nek n'đó kơi têêng manưih dyương dhiq dham ưng manưih kaxu e praaq “A-meen” nek palơq paraaq ma-ơơn ưng adhi anó, taai manưih achêk kah n'nal adhi anó xók praaq harau? 17Ơi dhơ kơi adhi anó tapôông paraaq ma-ơơn kơi liêm kre, bơơi manưih lââng kah bâân têêng tahayuur. 18Aku ma-ơơn Yaang Pleng kơi aku praaq bơk dhariêng chrih lơh tabhơt adhi anó, 19bơơi kalóóng akóón dhơn Chuôq, n'jang aku praaq xââng paleh palơq lóóm karnóq ađêi buôn aku kung ve chóóm pató pachóóm nôôq manưih lââng, lơh nek kaaq bhaan paleh palơq dhariêng chrih.

20Adhi anó ơơi, óóq val kơi akóón paniên kalóóng lóóm kanóq ưng ađêi. Palâh lóóiq, phaai kơi akóón paniên nek palơq rau aak, bơơi phaai val kơi manưih taha kalóóng lóóm kanóq. 21Kalóóng gani ve paraaq xaraq kơi ađô:

“Chuôq praaq:

‘Aku e praaq palơq dhanuôr ađô

tââq nôôq manưih praaq nôôq rau dhariêng lââng lơq palơq bưưr bóóp ưng nôôq manưih changaai chrih;

hơq patơk mơ kơi achêk, piđó kung e kah xâng Aku.’”

22Chênh taai kơi achêk, nôôq dhariêng chrih buôn têêng mưi karnal, eh rau đóng manưih huuiq, hơq nek đóng manưih kah ơi huuiq; hayơq praaq taruuih Yaang Pleng nek eh rau đóng manưih kah ơi huuiq, hơq nek đóng manưih huuiq. 23Kơi achêk nek, pajra kơi bhơt akóón dhơn Chuôq nhoom lóóiq dhiq mađó mưi dhiq lơq pabhơt praaq dhariêng chrih, hơq manưih kaxu môôiq manưih kah ơi huuiq tơk tơơt, nek eh alua piđó e móón kơi adhi anó xươl abhôh kah alua? 24Bơơi la pabhơt praaq taruuih Yaang Pleng, hơq masôôq manưih kah ơi huuiq môôiq manưih kaxu tơk tơơt, nek manưih ađek e bâân dyóp ngaai trêh móón lơq bâân dyóp ngaai praaq tamóh, 25nôôq rau kadrêi lââp kalóóng lóóm manưih achêk bâân tapakah drêh dróói, lơq taai kơi achêk, xók ơi chip mat chok leq, manưih achêk e bhuôih haanh Yaang Pleng, praaq karơ kơi “Yaang Pleng lalua tơơt dhiq m'pơng adhi anó.”

26Kơi achêk, nhan móón adhi anó, pajoop lóóiq nek harau? Xók adhi anó karong nhoom lóóiq, ting chanak ve haanh pleng, ve paraaq pató pachóóm, ve rau tapakah, ve dhariêng chrih, môôiq ve rau kluôh lók. Phaai lơơi dyóp rau yuur vaaih malóóm tơk tarnêêng têêng tahayuur. 27Alua kơq ngaai ađek praaq dhariêng chrih, nek mưi chu bơơr môôiq bhơt bơk nek pe chanak, ting matââq tââq, lơq mưi chanak phaai lók kluôh. 28Hayơq la kah ve ngaai lók kluôh, nek manưih ađek phaai parngau kalóóng akóón dhơn Chuôq, klóóih leq ađek, phaai praaq palơq chênh ađêi lơq palơq Yaang Pleng. 29Hayơq nôôq manưih bâân ơơn praaq taruuih Yaang Pleng, phaai lơơi bơơr môôiq pe chanak yuur papraaq, lơq nôôq manưih lââng phaai chamet xâng. 30Bơơi la ve rauriq bâân tapakah đóng mưi ngaai ađek đu lââng xók tơơt nhoom, nek manưih đu laloom phaai parngau dhariêng. 31Ơi tabhơt ve chóóm praaq taruuih Yaang Pleng ting chanak mưi, buôn dyóp ngaai ve chóóm đuui n'nal lơq dyóp ngaai bâân tabhơơl. 32Lóóm yaang ưng nôôq manưih praaq taruuih Yaang Pleng đơơp xâng nôôq manưih praaq taruuih Yaang Pleng. 33Ơi Yaang Pleng eh rau nek ưng rau nhôôn nhaauq, hơq nek ưng rau khe liêm.

Kơi tabhơt kalóóng akóón dhơn Chuôq ưng nôôq manưih huuiq, 34manưih pađiil phaai tơơt parngau kalóóng akóón dhơn Chuôq. Taai piđó kah chóóm pheep papraaq, hơq phaai xâng bóóp, kung kơi gani pachóóm. 35Bơơi la piđó kiêng đuui n'nal ve rau, nek piđó phaai tamóh kayiik ưng ađêi dhiq đong, taai alua nek đaang kachiit mat kơi palơq pađiil pađââr dhariêng dhiq m'pơng akóón dhơn Chuôq. 36Môôiq paraaq ưng Yaang Pleng yuur gluh tââq adhi anó alua? Môôiq paraaq Chuôq chapiên tơk palơq adhi anó hơq giêl?

37La ngaai manưih đóng kơi ađêi nek manưih truuih taruuih Yaang Pleng môôiq manưih đuui Chuôq, nek manưih achêk phaai đơơp n'nal kơi nôôq rau aku xaraq đóng adhi anó nek paraaq râng ưng Chuôq. 38Bơơi la ngaai manưih kah đơơp lêi n'nal kơi achêk, nek phaai lơơi manưih ađek kah bâân lêi n'nal.

39Chênh taai kơi achêk, nhan móón adhi anó, phaai kiêng rahaal praaq truuih taruuih Chuôq lơq óóq châq praaq dhariêng chrih. 40Bơơi phaai yuur têêng dyóp tarnêêng kơi kre dhalam lơq kalóóng matư ma-iiq.