1 Kô-rin-tô 13

1Dhơ aku ve chóóm praaq bơk nôôq dhariêng ưng akóón manưih lơq dhơn Pleng, hơq aku kah ve lóóm tanhơr, nek aku ơi val kơi m'beq dhariêng góóng tar-auq môôiq bheeng kabhór ka-uôih kadhuôih. 2Dhơ aku ve ơơn truuih taruuih Chuôq lơq ve chóóm n'nal tabhơt đu lalââp palơq dyóp tarbech, lơq dhơ aku ve pabhơt lóóm huuiq patơk mơ patââi bôôl booiq, hơq aku kah ve lóóm tanhơr nek aku kah rauriq. 3Patơk mơ dhơ xók aku pei đóng dyóp drươp karvaan ưng ađêi, lơq dhơ aku pajaau achak ađêi hơq đóng aku ve chóóm yuur pajơơr, hơq aku kah ve lóóm tanhơr nek aku kah bâân rau ve. 4Lóóm tanhơr ve lóóm đơơp jruôn lơq pakah rau moor dha-iiq. Lóóm tanhơr yươq makhinh; Lóóm tanhơr yươq laach jơơr, yươq praaq parlaach, 5yươq têêng praaq grô próng, kah tabâân mââl nhan nôôq rau ưng n'tua ađêi, yươq buôn bâân ơơr pagrâ, yươq kanóq lóóm rau lơt aak, 6yươq bhuui leq rau kah dhalam, bơơi bhuui sương kalóóng paraaq dhalam. 7Lóóm tanhơr lơơi bhơt dyóp rau, huuiq ganơơm dyóp rau, đương rââm dyóp rau, đơơp jruôn dyóp rau. 8Lóóm tanhơr yươq mơ chóóm luui bil. Mat lââng, dhơ nek ơơn praaq paraaq Yaang pleng, nek piđó bhơt hatươt, dhơ nek ơơn praaq bơk rau dhariêng, nek piđó e kadhơq; dhơ nek tarbech bhriêl galang, nek piđó e bâân m'peq lơơi. 9Taai nôôq he đuui n'nal phơn m'bưưiq, lơq nôôq he truuih taruuih Yaang Pleng phơn m'bưưiq. 10Bơơi xók rau bing dyóp tơk, rau kah ơi dyóp ưng phơn achêk e bâân m'peq lơơi. 11Xók aku dyơq nek akóón paniên, aku praaq kơi akóón paniên, aku kanóq kơi akóón paniên, aku tar-ââi kơi akóón paniên. Xók aku val kơi taha, aku m'peq lơơi nôôq tarnêêng ưng akóón paniên. 12Ơi, bhêêl ađôk, nôôq he móng lêi dhiq xamil palơq a-ô li-bhrơơu, bơơi tơk bhêêl ađek nek mat taje mat. Xók ađôk, aku ve bâân n'nal phơn m'bưưiq, bơơi tơk bhêêl ađek, aku e bâân n'nal bing dyóp, kung kơi aku ơi bâân n'nal kơi bing dyóp. 13Bơơi xók ađôk dyơq lóóiq pe rau ađô: Lóóm huuiq, lóóm rââm, lơq lóóm tanhơr; hơq rau liêm lơh pabhơt kalóóng pe rau achêk nek lóóm tanhơr.