1 Kô-rin-tô 12

1Hayơq leq nôôq ơơn đuui Chuôq, nhan móón adhi anó, aku kah kiêng adhi anó kah n'nal rauriq. 2Adhi anó n'nal kơi xók ađêi dyơq nek manưih ti, adhi anó ơi bâân kađââng chơơng ting kơi kiq ađek, xók bâân kajôông kamôôi malóóm leq nôôq kabhêi bơq. 3Taai kơi achêk, aku pakah đóng adhi anó n'nal kơi kah ngaai papraaq tââq Yaang Liêm ưng Yaang Pleng hơq vil móón: “Jê-su nek manưih đaang tóh!” Lơq la kah tââq Chuôq Yaang Liêm, kah ngaai ve chóóm đơơp móón “Chuôq Jê-su nek Chuôq.”

4Mat lââng, ve bơk rau n'tua kơi leq nôôq ơơn liêm, bơơi mađó mưi Yaang Liêm. 5Ve bơk rau n'tua kơi leq nôôq tarnêêng têêng yaauq, hơq mađó mưi Chuôq. 6Ve bơk rau n'tua lalêi leq nôôq tarnêêng, hơq mađó mưi Yaang Pleng, nek Yaang têêng dyóp tarnêêng kalóóng dyóp ngaai. 7Bơơi rau têêng pakah ưng Yaang Liêm bâân pajaau đóng ting chanak buôn đââng lóóiq malơơi madhiq. 8Ơi đươi Yaang Liêm, paraaq tarbech galang bâân đóng leq manưih ađô, hayơq paraaq tarbech bâân đóng leq manưih lââng ting mađó mưi Yaang Liêm achêk; 9tââq mađó mưi Yaang Liêm lóóm huuiq bâân đóng leq manưih ađô, hayơq ơơn payươh ka-ai bâân đóng leq manưih lââng tââq mưi Yaang Liêm achêk, 10Hayơq đóng manưih ađô, nôôq rau tarnêêng mataai karơ; đóng manưih tôôh, paraaq loom truuih taruuih; đóng manưih têêh, đuôh chóóm n'nal nôôq yaang; đóng manưih lââng, nôôq kơi rau dhariêng n'tua kơi; hơq đóng manưih lââng dyơq, rau chóóm lók nôôq dhariêng paraaq. 11Bơơi chapiên mưi giêl lơq mađó mưi Yaang Liêm yuur têêng dyóp tarnêêng achêk, xók blah nh'xóóng piđó kơi n'tua rau đóng ting chanak manưih ting kơi karnóq Ađó kiêng.

12Ơi thê kơi achak nek mưi hơq ve bơk rau dhiq achak, hayơq tabhơt nôôq rau dhiq ưng achak, dhơ ve bơk, hơq chapiên nek mưi achak, Chuôq Paq Manưih kung kơi achêk. 13Ơi alua tââq mưi Yaang Liêm, tabhơt nôôq he bâân têêng bap-teem mót kalóóng mưi achak, dhơ nek manưih Jo Thaaiq môôiq manưih Hi-laap, dhơ nek têêng xól môôiq manưih rathaai, nek tabhơt bâân têêng đóng ơm mưi Yaang Liêm. 14Ơi achak nek eh rau mưi beq dhiq achak, bơơi nek bơk rau dhiq achak. 15Pajra móón dyung praaq: “Taai aku eh rau nek têi, hayơq aku eh mađó leq achak,” nek kah chóóm taai kơi achêk hơq ađó kah mađó leq achak. 16Lơq pajra kơi katór praaq: “Taai aku eh rau nek mat, hayơq aku kah mađó leq achak,” nek kah chóóm ơi taai achêk hơq ađó kah mađó leq achak. 17La bhơt achak nek kaliêng mat, nek tarnêêng xâng n'đó dhiq? La bhơt achak nek bóng katór, nek tarnêêng hunh n'đó dhiq? 18Kơi achêk hayơq, palâh lóóiq, Yaang Pleng ơi ralap rapaq nôôq rau phơn kalóóng achak, ting beq mưi kalóóng nôôq piđó, ting kơi karnóq Ađó kiêng. 19Hayơq la tabhơt biêh nek mưi rau dhiq achak, nek achak tơơt n'dhiq? 20Hơq kơi achêk, dhơ bơk rau dhiq achak, bơơi chapiên mưi achak. 21Mat lââng, mat kah ve chóóm praaq palơq têi: “Aku kah ve rau đươi leq amei.” Môôiq akoq kung kơi achêk nek palơq dyung: “Aku kah ve rau đươi leq amei.” 22Palâh lóóiq, nôôq rau dhiq kalóóng achak đơơp ngóq kơi nek dhur óóch lơh hơq nek kơng bhlơng dhaang lơh. 23N'đó phơn kalóóng achak hơq nôôq he lêi đơơp ngóq nek kah rauriq lơh nek nôôq he koom đóng ađó rau bhi chap gamak lơh; lơq nôôq rau dhiq achak kah liêm ưng nôôq he nek ve rau pacham paliêm bơk lơh, 24hayơq nôôq phơn dhiq achak ơi liêm ưng nôôq he, nek kah ve đươi tơk achêk. Dhơ kơi ađek, Yaang Pleng ơi m'bhô achak araang palơq xóng piđó, đóng kơơq rau bhi chap đóng n'đó beq m'bưưiq bâân bhi chap, 25hơq đóng óóq ve rau tablah tachia kalóóng achak, bơơi hơq nôôq phơn dhiq achak kung lêi kanóq tơk xóng ađêi. 26Xók mưi phơn dhiq achak pâng ka-ai, nek tabhơt nôôq phơn dhiq achak kung jruôn; la mưi phơn dhiq achak bâân bhi chap, nek dyóp phơn dhiq achak bhuui madhiq palơq ađó. 27Mat lââng, adhi anó nek achak araang ưng Chuôq Paq Manưih, lơq nek nôôq dhiq achak ưng ting phơn lalêi n'tua. 28Yaang Pleng ơi chaleq đóng mưi phơn manưih kalóóng akóón dhơn Chuôq. Laloom tââm nek sưưq-đô, hơq bơơr nek nôôq manưih đââng taruuih Yaang Pleng, đu pe nek nôôq manưih pachóóm, hayơq tơk nôôq mataai chrih, xong ađek nek nôôq ơơn payươh ka-ai, poor jóói, têêng kala, lơq nôôq bơk rau dhariêng n'tua kơi. 29Ve kơq pabhơt nek sưưq-đô? Ve kơq pabhơt nek manưih đââng taruuih? Ve kơq pabhơt nek manưih pachóóm? Ve kơq pabhơt maar têêng mataai chrih? 30Ve kơq pabhơt ve ơơn payươh ka-ai? Ve kơq pabhơt praaq dhariêng chrih? Ve kơq pabhơt chóóm kluôh lók? 31Bơơi phaai bhơt lóóm rââm kiêng nôôq ơơn bhươh gamak lơh. Hayơq dhalam xók ađôk, aku chapiên đóng adhi anó lêi mưi ploong kalơng liêm kre lơh.