1 Kô-rin-tô 11

1Phaai val xar nôôq manưih ting đuui aku, kơi aku kung nek manưih ting đuui Chuôq Paq Manưih.

2Aku haanh adhi anó taai adhi anó ơi hei tơk aku kalóóng dyóp tarnêêng, lơq adhi anó jư tamưng nôôq taruuih hanua, dhiêp kơi aku ơi truuih đóng adhi anó. 3Dhơ kơi ađek, aku kiêng adhi anó n'nal kơi Chuôq Paq Manưih nek akoq ưng dyóp ngaai manưih padruuih, hơq manưih padruuih nek akoq ưng manưih pađiil, hayơq Yaang Pleng nek akoq ưng Chuôq Paq Manưih. 4Dyóp ngaai manưih padruuih gavơh nhan môôiq loom truuih taruuih Yaang Pleng, la ve rauriq ađek klum dhiq akoq, nek têêng tamôôp akoq ađêi. 5Bơơi dyóp ngaai manưih pađiil gavơh nhan môôiq loom truuih taruuih Yaang Pleng palơq akoq kah bâân klum lóóiq, nek tamôôp akoq ađêi. Taai rau ađô nek mưi palơq tarnêêng akoq ơi goot kaklông. 6Ơi la mưi manưih pađiil kah klum akoq, nek pađiil achêk kung phaai kut xok vaq. Hayơq la kut xok hamôôiq goot akoq nek rau tamôôp nek palơq manưih pađiil, nek pađiil ađek phaai klum akoq lóóiq. 7Ơi mưi mat, manưih padruuih kah chóóm klum akoq ađêi taai đââng a-ô lơq cha-iil tabah ưng Yaang Pleng. Mat lââng, manưih pađiil nek cha-iil tabah ưng manưih padruuih. 8Taai manưih padruuih nek kah gluh tââq manưih pađiil, hơq nek manưih pađiil gluh tââq manưih padruuih. 9Kung taai manưih padruuih kah bâân tavaaih taai manưih pađiil, hơq nek manưih pađiil taai manưih padruuih. 10Taai ơi kơi achêk, manưih pađiil kơng phaai pơơng karnal karơ kataai dhiq akoq ađêi, ơi taai nôôq dhơn pleng. 11Dhơ kơi achêk, kalóóng Chuôq, manưih pađiil kah pantua palơq manưih padruuih, manưih padruuih kung kah pantua palơq manưih pađiil. 12Taai manưih pađiil gluh tââq manưih padruuih n'đó kơi, nek manưih padruuih kung đươi manưih pađiil hơq ve kơi achêk. Bơơi dyóp rau gluh tââq Yaang Pleng. 13Phaai chamet lêi dhiq m'pơng chênh ađêi adhi anó: Manưih pađiil kah klum akoq gavơh nhan palơq Yaang Pleng nek ve pâng kah? 14Kah alua dhalam chênh kơi kaxu pachóóm adhi anó kơi mưi mat, la manưih padruuih lơơi xok yaal, hơq ađek nek yuur takađiq kachiit đóng ađó? 15Mat lââng, la manưih pađiil ve bhayam xok yaal, hơq ađek nek cha-iil tabah đóng leq pađiil achêk alua? Taai bhayam xok yaal ơi bâân đóng leq pađiil achêk babi kơi kalum klum akoq. 16Hayơq la ngaai đơơp ngóq ve lóóm tarliin tarkaai leq tarnêêng ađô, nek nôôq yi kah ve pakeen đu kơi achêk, nôôq kabhuh akóón dhơn Chuôq ưng Yaang Pleng kung kah.

17Bơơi xók đââng pagluh pachóóm râng tatun ađô, aku kah haanh adhi anó, taai adhi anó karong nhoom palơq xóng ađêi kah ruul tơk rau liêm lơh, bơơi nek malóóm tơk dhiq môôp lơh. 18Bơơi laloom bhơt, xók adhi anó nhoom lóóiq kalóóng kabhuh akóón dhơn Chuôq, aku xâng leq bơk rau tablah dhiq m'pơng kalóóng adhi anó, lơq aku huuiq rau ađek maphơn giêl. 19Taai kơng phaai ve nôôq malóóm mahóng m'pơng kalóóng adhi anó, hơq đóng nôôq ngaai ơi đơơp klêêu klôôq kung ve chóóm bâân gluh pakah drêh-dróói m'pơng kalóóng adhi anó. 20Taai kơi achêk, xók adhi anó nhoom lóóiq dhiq mađó madhiq, tarnêêng achêk eh rau nek buôn tơơt Bhiêk Liêm ưng Chuôq. 21Taai xók bhêêl cha, ting chanak tarhươk cha vaar cha mưi ađêi loom, hayơq dhơ ve ngaai nek ha-ul li-veu, bơơi ve ngaai nek ból plơ. 22Ve kơq adhi anó kah ve đong buôn cha lơq ơm kalóóng ađek alua? Môôiq adhi anó kađiq Kabhuh akóón dhơn Chuôq ưng Yaang Pleng lơq têêng bil mat nôôq manưih kah ve rau? Aku hayơq praaq harau palơq adhi anó? Hayơq bhi haanh adhi anó leq tarnêêng ađô kơq? Aku kah haanh adhi anó mơ! 23Taai aku ơi đơơp tââq Chuôq rau aku kung ơi truuih lóóiq đóng adhi anó, ađek nek Chuôq Jê-su, xók hayum hơq Ađó bâân tamôôp pajaau, ơi pei beng, 24hayơq xong xók ma-ơơn, Ađó yuur veh beng lơq praaq: “Ađô nek achak araang ưng thêi klóóih đóng adhi anó; phaai têêng rau ađô kalóóng rau kanóq hei tơk leq thêi.” 25Kung makơi ađek nek palơq choom xong xók cha, kơi ađô: “Choom ađô nek raket bóóp tame kalóóng ahaam thêi. La xók bhêêl adhi anó ơm choom, phaai têêng rau ađô kalóóng rau kanóq hei leq thêi.” 26Ơi la xók bhêêl adhi anó cha beng ađô lơq ơm choom ađô, adhi anó truuih đuui rau chêt ưng Chuôq đóng tơk xók Ađó bhral. 27Đóng hayơq, dhơ mak ngaai cha beng hamôôiq ơm choom ưng chuôq mưi kơi kah đaang dhalam nek e ve matu palơq achak lơq ahaam ưng Chuôq. 28Palâh lóóiq, ting chanak phaai tư lêi ađêi, hayơq kalóóng lóóm kanóq ađek hơq cha beng lơq ơm choom. 29Ơi ngaai cha lơq ơm hơq kah n'nal pantua achak Chuôq nek cha lơq ơm rau xêi lơt đóng ađêi. 30Taai ơi kơi ađek, bơk ngaai kalóóng adhi anó ka-ai pakhau, dhuôr xar lơq bơk manưih bêch. 31Bơơi la nôôq he tư kanóq lêi ađêi, nek dhakơi nôôq he yươq bâân xêi lơt. 32Hayơq xók bâân Chuôq xêi lơt, nôôq he bâân taklôôq paliêm buôn yươq bâân tabóq matu madhiq palơq manưih hóng katiêk. 33Kơi achêk hayơq, adhi anó ưng aku ơơi, xók karong lóóiq buôn cha, phaai tarđương xóng ađêi. 34La ngaai manưih ha-ul, nek phaai cha dhiq đong, buôn adhi anó óóq karong nhoom dhiq kalóóng rau xêi lơt. Hayơq leq nôôq tarnêêng lââng, aku e pakah paraaq chaleq kađââng dhalam bhêêl xók aku bhral.