1 Kô-rin-tô 10

1Ơi nhan móón adhi anó, aku kah kiêng adhi anó kah n'nal kơi abhươp avuôq nôôq he pabhơt ơi tơơt raraal garboq dhaluk, pabhơt ơi chaang lơh taxiiq. 2Pabhơt malóóm ting Môôi-se ơi bâân têêng bap-teem kalóóng garboq dhaluk lơq raal taxiiq, 3pabhơt ơi cha palơq mưi rau tarmông huuiq Chuôq, 4lơq pabhơt ơi ơm palơq mưi đơơk ơm huuiq Chuôq, ơi piđó ơm tââq mưi bhangôh dhơl huuiq Chuôq ting ađêi, hơq dhơl ađek nek Chuôq Paq Manưih. 5Dhơ kơi ađek, Yaang Pleng ơi kah liêm lóóm palơq bơk ngaai nôôq manưih achêk, hayơq piđó bâân kalơm chêt dhiq ađô dhiq tôh kalóóng kruung vơng. 6Mat lââng, nôôq rau ađô ơi val xar nôôq đuui lóóiq đóng nôôq he, buôn óóq têêng nôôq he nek nôôq manưih malóóch kiêng nôôq rau môôp lơt kung thê kơi piđó ơi malóóch kiêng. 7Kung óóq val xar nôôq manưih bhuôih kabhêi kơi nôôq manưih tôôh kalóóng nôôq piđó; tơk mơ kơi ve paraaq xaraq: “Dhanuôr manưih tơơt chok leq buôn cha lơq ơm, hơq yuur dyương blôônh vavơq.” 8Nôôq he kung kah chóóm têêng matu tapiing taniêt kơi bơk ngaai kalóóng nôôq piđó ơi têêng taniêt, hơq bơơr jêt pe ngaan manưih ơi kalơm chêt kalóóng mưi tangêi. 9Kung kah chóóm klêêu Chuôq kơi bơk ngaai kalóóng nôôq piđó ơi klêêu Chuôq hayơq bâân leng chêt tââq kaxênh. 10Kung óóq m'bhoonh kơi bơk ngaai kalóóng nôôq piđó ơi m'bhoonh lơq bâân yaang kaxiêt leng chêt. 11Dhơ kơi ađek, nôôq tarnêêng achêk ơi yuur vaaih đóng piđó kơi nôôq đuui lóóiq, hơq piđó ơi bâân xaraq lóóiq đóng leq tarnêêng praaq pachóóm nôôq he, nek dhiq nôôq manưih hơq nôôq rau tatun xariêq ưng nôôq klaang đơơi ơi tơk aq. 12Ơi kơi achêk, ngaai ngóq ađêi dyương, phaai chagơn vaaih kalơm. 13Kah rau dharơơl galơơk n'đó ve tơk palơq adhi anó chapiên rau mađó leq akóón manưih; mat lââng, Yaang Pleng yươq tadhơ, nek Yaang e kah lơơi adhi anó bâân dharơơl galơơk lơh mơ praan adhi anó đuôh jruôn, bơơi palơq rau dharơơl galơơk ađek, Ađó kung e lóng kalơng gluh buôn adhi anó ve chóóm đuôh đơơp jruôn.

14Taai kơi achêk, adhi anó bơk nh'nhơr ưng aku ơơi, phaai viêr changaai tââq rau bhuôih kabhêi. 15Kơi ngóq aku xók praaq kayua palơq nôôq manưih tabech n'nal. Adhi anó phaai tư kanóq chamet rau aku praaq. 16Choom phươk liêm hơq nôôq he nhan ma-ơơn, kah alua ađek nek rau tapâng phơn kalóóng ahaam ưng Chuôq Paq Manưih alua? Beng hơq nôôq he yuur veh, kah alua ađek nek rau tapâng phơn kalóóng achak ưng Chuôq Paq Manưih alua? 17Taai ve mưi beq beng, hayơq nôôq he, dhơ bơk, chapiên nek mưi achak, taai tabhơt nôôq he tapâng phơn kalóóng mưi beq beng. 18Phaai lêi dhanuôr I-sơ-ra-êên ting phơn achak. Kah alua nôôq ngaai cha adhah bhuôih nek nôôq manưih tapâng phơn dhiq baang bhanuôih alua? 19Kơi achêk, aku xók praaq hau rau? Bhanuôih bhuôih kabhêi nek hau rau-riq? Môôiq kabhêi nek hau-hiq? 20Dhơ kơi achêk, nôôq rau hơq nôôq dhanuôr katiêk nguôi bhuôih bhưk nek bhuôih bhưk đóng abhưi abhóch, eh rau đóng Yaang Pleng. Hơq aku kah kiêng adhi anó val xar nôôq manưih tapâng phơn palơq nôôq abhưi! 21Adhi anó kah chóóm mơ ơm choom ưng Chuôq lơq choom ưng abhưi abhóch chóóm. Adhi anó kah chóóm mơ tapâng phơn dhiq baang ưng Chuôq lơq dhiq baang ưng abhưi abhóch chóóm. 22Môôiq nôôq he pacha lóóm đóng Chuôq yuur pagrâ kơq? Ve kơq nôôq he nek karơ lơh Chuôq?

23“Dyóp rau nek chóóm pheep,” bơơi eh rau dyóp rau đââng tơk malơơi. “Dyóp rau nek chóóm pheep,” bơơi eh rau dyóp rau đââng têêng tahayuur. 24Óóq ngaai achêk tabâân malơơi n'tua ưng ađêi, bơơi nek malơơi ưng manưih lââng. 25Phaai cha dyóp rau bâân kơl baan dhiq chơơq, óóq tamóh rau ơi taai lóóm karnóq. 26Ơi “katiêk palơq dyóp rau kalóóng ađó mađó leq Chuôq.” 27La dhơ dhangaai manưih kah ơi huuiq kayua adhi anó lơq adhi anó kiêng vôôiq, nek phaai cha dyóp jama jamat bâân dhoon toom mat ađêi, óóq tamóh hau rau ơi taai lóóm karnóq. 28Bơơi la ngaai ađek móón palơq adhi anó: “Ađô nek bhanuôih bhuôih,” nek óóq cha, ơi taai manưih ađek, nek manưih ơi đóng adhi anó n'nal, lơq lóóm karnóq. 29Bơơi aku praaq leq lóóm karnóq, eh rau nek ưng kala achak adhi anó, hơq nek lóóm karnóq ưng manưih ađek. Achêk nek hau kơi rau rathaai ưng aku bâân lóóm karnóq ưng manưih lââng xêi lơt? 30La aku ting tơơt palơq lóóm n'nal ơơn, nek ng'kơi aku bâân praaq tamôôp taai dhanah hơq aku ma-ơơn? 31Taai ađek, dhơ dhakơi adhi anó cha, môôiq ơm, hamôôiq têêng mưi n'đó tarnêêng ađek, phaai têêng tabhơt đóng rau cha-iil tabah ưng Yaang Pleng. 32Óóq têêng palââng ting lơt đóng miq manưih Jo Thaaiq, palơq manưih Hi-laap, lơq kabhuh akóón dhơn ưng Yaang Pleng, 33Thê kơi aku kung ravang lóóm têêng yaauq dyóp ngaai kalóóng dyóp tarnêêng, Kah tabâân malơơi ưng n'tua ađêi, bơơi nek malơơi ưng bơk ngaai, buôn piđó ve chóóm bâân paq.