Kaike Standard Traslation
फिले 1
येसु मसिहन भिह्तु ङा झ्यालखानाः त्यापान पावल रे ङिन भाइ तिमोथीलम अन हिगा ङिन ङ्याबो धोन खेनान स्याङ्पान फुरी फिलेमोन, ङ्योअन बहिनी अप्फिया रे ङ्योअन फुरी सिपाही अर्खिप्पास, रे नान यिमन मन्दली:1 ङेनकाङ्मोः दया रे ङ्योअन पा परमेस्वर रे प्रभु येसु मसिहलम सान्ति!
फिलेमोन्न मया रे बिस्वास
ङन भाइ फिलेमोन सोअतापवग जब ङा नाः चिङ्ङ तब ङा ङन परमेस्वरग एकुरो मया रह्पा र्वानान, तैङर्वाङिन प्रभु येसु मसिहन ङ्या नान बिस्वासन भारेः रे परमेस्वरन पबित्र सिमिवक्याँ नान मयान भारेः ताँ। ङा सोअताप्चे कि नान बिस्वासन सङ्गतिजै मसिहग रह्पा ङ्योअन ल्होई लः पुरून ग्यान छार तयाःयो। ङन भाइ, नान मया लम ङै लै किम्म रे सान्त्वना देप्पा ङिह्पा, तैङर्वाङिन ना लम परमेस्वरन पबित्र सिमिवन सम ह्याङ ताजा रह्पा ङ्याह्।
ओनेसिमसन भिह्तु पावलन छ्याफुल
नाई तै खेत्वानान, अन खेमः आग्या बिन्चेन भिह्तु मसिहग ङाः हिम्मत ङिनै, मयान खातिर बरु ङा नाः छ्याःफुल्सुम ङिह्पा, ङा काप्पो पावल, आलै चोँ येसु मसिहन भिह्तु झ्यालखानाः त्यापान सिमिदी ङन आत्मिक ङोह्जो ओनेसिमसन भिह्तु ङा नाः छ्याःफुल्चे, ङा झ्यालखानाः रातौ मसिहग नुन पा रह्पा ङिह्पा।2 नु ङू नान भिह्तु काम मीपान सिमि ङ्याह्, जेङ्नै चोँ नान भिह्तु रे ङन भिह्तु यङ फानत्वानान रह्पा ङ्याह्। ङा नू, सु ङन जेँनै समन तुकरा जेङ्पा, नान स्याह् ताप्ताप् फेम्मः जाःपा ङिह्पा। ल्होन् लःन कारन झ्यालखानाः ङिह्पान भेला नान पूँ नू ङन सेवा खेमः नान्नान ङ्याह्, जेङ्नै नान आदेस मीम ङा तये खेसुम मीपा, ताकि नान भलो करकापजै खेपा नराःयो, जेङ्नै नान जेँनै इच्छ्याई खेपा रायो। हालम ना लम ङाई बेरन भिह्तु ओनिसमस भापा ङ्याह्, ताकि नु एकुरोन भिह्तु नान ङ्याबो छ्युङ् तयाःयो। तान धेरा राङ्पालैम नङ्पा, जेङ्नै राङ्पा खेरे ह्याल्म, स्याङ्पान भाइलैम, ङोत्वा ङन भिह्तु, जेङ्नै झन ह्याल्म ल्होग, प्रभू र्वार्वा, नान भिह्तु।
अन्नकारन यदि नाई ङाः जेँनै फुरी छुँङिन ङाः लैम नू स्वीकार ख्या। यदि नुई नाः तयाः अलः खेपा रानै, आथबा नु तयाः ल्होईन छेर्सूपा ङिन, अन ङन हिसाबग नाह्ना। ङा पावल, जेँनै लाह्जै अन सर्चे। अन छेर ङह् फाःनान ङ्युँ। नाः र्वापा र्वात्वा खेमत्वामतौ, कि जेँनै भिह्तु यङ ना ङन छेरसूपा ङ्याह्। स्याङ्पान भाइ, ना लम प्रभू तयाः लाभ धेरायो र्वानान ङा सम खेनान। मसिहग ङन समग ह्याङ स्याङ्चे धोवाँ। नाई र्वापा ङ्यान्नान र्वार्वा भर नान्नान ङै तोल्पान खेरे हेँ ह्याल्म खेनान ङ्याह् र्वानान छुछु ङा नाः सर्मः जाःपा ङिह्पा। ङ्याबो ङन भिह्तु दम्फु छ्युङ्नान्न कोठादी ठिक्क दोङदोङ नाह्ना, तैङर्वाङिन नान सोअताप लम ङा रे नान स्याह् स्वाचे देङ्ङिम कि र्वानान आस खेनान।
अन्त्यन स्हीम ङिह्पाऊ र्वापा
येसु मसिहग ङन ङ्याबो झ्यालखानाः त्यापान इपाफ्रासजै नाः सिम ङिह्पाऊ र्वार्वा लोप्पा ङ्याह्। उजुईखेखे ङ्योअन ङ्याबो धोन खेनान मर्कुस, अरिस्तार्खस, देमास रे लुकाई यङ। प्रभु येसु मसिहन दया ङेनकोन आत्मान ङ्याबो लुयाःयो।
Source notes (2)
- Cross-reference कल ४:१७
- Cross-reference कल ४:९
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.