Kaike Standard Traslation
प्रे 28
पावल माल्ता तापू
ङि सुरछित नाः स्वामी मन तापुन मिह्न माल्ता जेअँ र्वानान ङी क्युई ङिह्पा। स्याह् छ्युङ्नानवजै ङी सार्बा दया थम्पा। नाङ्का ज्युज्यु ख्यारि रह्पान कारनजै ख्युई मेह् भुबो, रे ङि पुरूग स्वागत खेबो। पावलजै सिङ पाह्दी चाह्चाह् मेह्ग पह्न्तौ भुलेनदी मेह् छामन कारन नुन लाह्ग कह्बो।
स्याह् छ्युङ्नान्न सिमिवजै नुन ल्हाग भुलेन च्योम्पा रङरङ राह्ङराङ्साः र्वामः जाःबो, “अन सिमि तेम्माई सिमि सन्नान्न सिमि राईत्वानान। अन समुन्द्रलै सोनसोन ता गेप्पो जेङ्नै न्यायलम अन सोम मतैबो।” जेङ्नै पावलजै जेँन ल्हा खार्तौ भुलेन स्वात्तै मेह्ग छार्बो। स्याह्न सिमिवजै “पावल ङाईलै रङरङ सिह्नान ङ्याह्” र्वार्वा सेम्पाई छ्युङ्बो। आथबा नु घ्याघ्या सिदँ र्वार्वा ख्युई कुकु छ्युङ्मः जाःबो। जेङ्नै लैःलै यङ नू तये मरह्पा। अन रङरङ ख्युन नावा फिप्पो। रे हालाईलाई ख्युई र्वाबो, “अन ता पो जेअँ।”
मन तापुन पब्लियस मिह्न्न ङोत्वा पुजारीन खेः मन ठाउँन रह्म्मै ङ्याह्। नुई ङी जेँन यिम वव्वै स्वागत खेबो, ङि सुमङी नुन यिम दम्फु राह्राह् छ्युङ्पा। पब्लियसन पा छायोई रे आउँन नाजाइ खङ्पा ङ्याह्। पावल नु सेम्म होई, रे नुन पत सोअताप्पो, रे जेँन लाह् नुन लाह्ः नान्नान नुग सिमि दोङ्पा। झामखेखे ताःपा क्युई राह्राह् तापू ङिह्पान खङ्नान पुरूव स्वाबो रे पावलजै ख्युकाङ्मोः ताःफाम्बो। ख्युई लै प्रकारजै ङ्योअन सम्मान खेबो। जब ङ्योअ त्युन जहाजग चप्पा, ख्युई ङ्योअग त्वातौ आलमालव त्युन जहाजग कह्बो।
माल्ता तापुलै रोमथाल
लाह् सुमङीन ङिक छामा ला र्वानान्न त्युन जहाजग चपचप माल्ता तापू ख्योवाख्योवा वैपा। मन त्युन जहाज चन अलेक्जेन्द्रिया सहरलै स्वास्वा गुन्जेन भेलाभरि माल्ता तापुगै कुकु छ्युङ्पा ङिम्न। सुराकुसाईग ताप्ताप् ङि स्या सुमङी छ्युङ्पा। स्याह्लै ङि ना-नाः रेगियन सहरग स्वा ताप्पा। तीँन ङिक ज्याङन लन स्वाबो, रे नाप्चे ङि पतिओलिग स्वा ताप्पा। स्या ङ्योअजै भाइकाङ्मोः धोबो, रे ख्युई ङ्योअग नेर्याथाल ख्युन ङ्याबो छ्युङ्चेन भिह्तु छ्याःफुल्बो। झामखेखे ङ्योअग रोमग स्वा ताप्पा। स्याह्लै ङि स्वानान र्वानान्न ल्होन ताह्ताह रोमन बिस्वासी थिक्कोव ङी धोमः अप्पियसन बजार रे तीन पाती र्वापू स्वापा ङ्याह्। अजोवग रङरङ पावलजै परमेस्वरग मया रह्बो र्वाबो, रे हौसला देप्पो।
रोमग पावल
मन्न छाम्म ङि रोमग वैपा, रे स्याह् पावलग तितिमाई छ्युङ्फाम्बो। जेङ्नै नू सेन्चे खेचेन भिह्तु सिपाहीदी छ्युङ्बो।
सुमङीन ङिक पावलजै यहूदीवन बासिन्दा लम ल थन्नान सिमिकाङ्मोः घ्वाम फेप्पा। ख्यु जमता रामी नुई ख्युकाङ्मोः र्वाबो, “इस्राएली जिङ्को हो, ङै ता जेँन देसन सिमिकाङ्मोः, आथबा खेपुलन ल्हूलामन बिरोध तये खेपा मया। जेङ्नै बन्दी राह्राह् यरूसलेमलै रोमीवन लाह्ग ङा बिम्पा ङ्याह्। ख्युई छोए सेह्म्मी ङन स्याह् सच्चेन धलन कारन तये मदोतौ ङा फेस्सुम खेपा ङ्याह्। जेङ्नै यहूदीवजै बिरोध खेपा रामी कैसरन स्याह् निबेदन खेमः ङा धिप्पी खेबो: ङन सिमिन बिरोध तैनै दोस सच्चेन ल्होई मया।1 अन्नकारनजै ङै ङेनकाङ्मोः ङ्याबो दोदो ल्होई खेमः ङेनकाङ्मोः घ्वापा जेङ्पा। तैङर्वाङिन इस्राएलन आस सु जेङ्पा नुन पत अन साँगलग ङा खीपा ङिह्पा।”
ख्युई नू र्वाबो, “ङ्योअजै ता नान भारेः यहूदिया प्रदेसलै हिगा तये देप्पा मया। कान ङिन सिमिव स्वास्वा नान बिरोध तये अलः ल्होई यङ ङ्याम्पा रे र्वापा मह्या। जेङ्नै ङि नान सोचव ङ्यान्सुम ङिह्पा। तैङर्वाङिन नान मोङन बिरोधग खास्यापुरू रह्पान ल्होई चन ङी क्युई ङिह्पा।”
तब ख्युई पावलन भिह्तु लाह्दी तोकि खेबो, रे ताँका लैग सिमिव नुन छ्युङ्पू स्वाबो। नुई ख्युकाङ्मोः नाह्पलै ङ्याजेनै बेर चर्चा खेबो, रे मोसान कानुन रे भबिस्यबक्तावन किताबलै परमेस्वरन राज्यन साँचि बिम्बो, आलै येसुन भारेः ख्युकाङ्मोः बिस्वास देप्फान्चेन प्रयास खेबो। नुई र्वापान ल्होई हातिपाई बिस्वास खेबो, हातिपाई बिस्वास मखेबो। ख्यु राह्ङराङ्साः मदीबो, रे भिदा राम जातौ पावलजै अन अन्त्यन भासन बिम्बो, “ङेन खेपुलग यसैया भबिस्यबक्ता लम पबित्र आत्माई र्वापान बचन लः ङ्याह्,”
“अन सिमिकाङ्मोः ङ्याबो वैवै र्वा,
‘ङ्याना ता ङेनकाङ्मोः ङ्यान्नन, जेङ्नै हातौयै मस्योनन,
सेन्चे ता सेन्नन, जेङ्नै हातौयै मरङ्नन।’”2
तैङर्वाङिन मन सिमिवन सम हरक्क हामकोनान रह्पा ङ्याह्,
रे ख्युई जेँन नाम्ज्योवा काःपा ङ्याह्,
मी चुम्पा ङ्याह्,
तेमन्ता ख्युन मीजै रङ्नान ङ्याह्।
नाम्ज्योवाजै ताह्नान ङ्याह्,
समजै हाकोनान ङ्याह्,
रे ङाक्याँ होल्नान ङ्याह्, रे परमेस्वरजै र्वाबो,
“आलै ङा ख्युकाङ्मोः ताःफान्नान ङ्याह्!”
अन्नकारन “ङेनकाङ्मोः क्युई रायो, कि परमेस्वरन अन मुक्ति यहूदीन खोलोःन सिमिवन पत फेप्पा ङिह्पा, रे ख्युई ताह्नान ङ्याह्।”3 [आलै नुई अन बचन र्वामी, यहूदीकाङ्मोः राह्ङराङ्साः लै खाथू खेतौ होई।]4
पावल पुरू ङेह्परा थाल जेँनै खर्चग रोमग छ्युङ्बो, रे नुन ङ्याबो स्वानानकाङ्मोः पुरूग नुई स्वागत खेबो। नुई सहासी राह्राह् परमेस्वरन राज्यन ताह्फेरैफेरै प्रभु येसु मसिहन भारेः लह्ङ्ङ रे सुई र्वार्वा मकाँ।
Source notes (4)
- Cross-reference प्रे २५:११
- Cross-reference यसै ६:९-१०
- Cross-reference भजन ६७:२; ९८:३; यसै ४०:५
- Cross-reference यसै ६:९-१०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.