Skip to content
BibleKenya

Kaike Standard Traslation

प्रे 27

पावलन रोम यात्रा

समुन्द्रन लम राह्‌राह्‌ ङि इतालिया वैचे जेङ्पा र्‌वानान निर्नय रामी, ख्युई पावल रे घङ हातिपा झ्यालखानाः त्यापा सिमिकाङ्मोः सम्रात अगस्तस फौजन युलियस मिह्‌न्न अफिसरन लाह्‌ग बिम्पा। एद्रामितेनोसलै एसिया प्रदेसन राँसा बन्दरगाहव राह्‌राह्‌ वैनान ती त्युन जहाजग चपचप ङी ल्हेम्म जाःपा। अरिस्तार्खस मिह्‌न रह्पा थेसलोनिकेन ती माकेदोनियान सिमि ङिन ङ्याबो ङ्याह्। नाप्चेरा ङ्योअजै सीदोनग लङ्‌गर कपा। युलियसजै पावलग दया थनथन नुन फुरीकाङ्मोः ङ्याबो वैवै त्वापातौ फुरी खेनान्न मौका बिम्बो। स्याह्‌लै ङिन त्युन जहाज ह्‌याङ समुन्द्रक्याँ जाःबो, जेङ्नै त्युन जहाजन ङूक्याँलै लन च्याङ्पान कारन ङि साइप्रस तापुन नाःलम काईकाई वैत्वाबो। किलिकिया रे पामफिलिया धिक्याँन समुन्द्रग ताप्मी, ङ्योअग लुकियान ती सहर माइरा सहरग स्वा ताप्पा। स्याह् इतालिया वैनान अलेक्जेन्द्रियान त्युन जहाजदी दोदो अफिसरजै ङी मनग चपफाम्बो। लै दिनथाल कोलेः कोलेः वैवै धौखेखे क्नीदसग स्वा ताप्पा रे लनजे हेँ ङू वैमफाम्मी क्रेतन च्योरच्योर ङ्योअग सालमोनेन ना-ना राह्‌राह्‌ वैपा। धौखेखे मन्न ना-ना जाःजाः ङ्योअग सुन्दर बन्दरगाह र्‌वानान ठाउँग स्वापा। स्याह्‌लै लासिया सहर ङेमः ङ्याह्। स्याह् ताप्चेन भिह्तु भेला लै वैपा ङ्याह्। बर्त छ्युङ्नान्न तीती लाह्ः यङ वैतपा ङ्याह् रे मन रुन्जेन भेलाः स्वापान छ्योलापवन कारन ता त्युन जहाजलम ङू वैचे ङिन्चे ङ्याह्। उजु राह्‌राह्‌ पावलजै जेँग कूनान्न सिमिकाङ्मोः झाम र्‌वाईर्‌वाई सम्झाई खेबो, “फुरीव हो, ङि चोँ त्युन जहाजलम स्यीह्‌लै वैङिन जहाज रे अनग ङिह्पान आलमाल मात्र नङ्पा, जेङ्नै ङी सिह्दरा र्‌वार्‌वा ङिन्चे ङ्याह्।” जेङ्नै अफिसरजै पावलन ल्होईवग नङ्पा जेङ्नै त्युन जहाजन कुल्नान्न सिमि रे त्युन जहाजन तापोन ल्होई ह्‌याल्म हीछेःबो। रुन्जेन भेला बिताई खेमः मन बन्दरगाह लः यङ मह्‌या। उजु रातौ हातिपा सिमिव तै खेखेई स्याह्‌लै वैवै फोनिक्स सहर ताप्चेन कोसिसग ङ्याह्। क्रेत तापू रह्पान मन फोनिक्स सहरग चन ज्याङ-ल्हो रे नुह्प ल्होक्याँ होल्पान बन्दरगाह ङ्याह्।

समुन्द्रग हुर्‌यापा

जब ज्याङन लन कोलेः कोलेः स्वामः जाःबो। ख्युन उदेस्य ल रह्पा र्‌वानान छुछु, लङ्‌गर छ्युछ्यु ख्यु क्रेतन ना-ना रातौ यात्रा खेमः जाःबो। जेङ्नै ङाइलै मन तापुलै ङिनङिनलैम हुर्‌यापा तोबग नुह्प-स्यारग लन किम स्वाबो। जब त्युन जहाज हुर्यापाई च्योर्बो, मह्‌नजै हुर्यापाः सामना खे मतैबो, रे ङी मनग खाः वैनै वयाःयो र्‌वार्‌वा ख्योवापा। क्लौदा र्‌वानान्न तापुन ज्याङक्याँ ताप्मी तापुई लनग ङाई काःबो। जेङ्नै स्याह् रे ङी त्युन जहाजन ङिक खीपान कत्याम दोङाः धौखेखे जगाई खेतैपा। ख्युई मनग त्युन जहाजग कान्बो जहाजग थाःपाई खीबो। लिबियान सिरितिस र्‌वानान्न पेह्‌मान नाः छार्ङिम कि र्‌वार्‌वा ख्यु ङिह्‌म्बो, अन्नकारन ख्युई पाल पोँ साःबो रे त्युन जहाजग लनजै फ्याफाम्बो। ता हुर्यापाई ङ्योअकाङ्मोः यामयाम सोल्म रे दिम्फाम्म जाःबो, रे नाप्चे ख्युई त्युन जहाजन आलमाल पह्‌म्म जाःबो। आलै सुमङी ख्युई जेँनै लाह्जै त्युन जहाजन लत्ठा पप्पो। लै दिनथाल ङिह्‌मा, घर तये रङ्चे मदेप्पो। लन किम च्याङ्पाच्याङ्त्वा राह्‌राह्‌ अन्त्यग सोन्चेन आस यङ ङ्योअजै ख्योवापा।

लै दिनथाल ख्यु मझारे छ्युङ्पा ङ्याह्। तब पावलजै ख्युन ङ्याबो स्वास्वा र्‌वाबो, “फुरी हो, ङेनजै ङन सल्‌ला ङ्यानङ्यान क्रेतलै त्युन जहाज मकुल्चे ङ्याह्, रे झाम तूरि रे नोङ ङेनजै कुत्वानान मह्‌या। जेङ्नै चोँ ङा ङेनकाङ्मोः छ्याफुल्चे, हिम्मत ख्या। ङेनकोन बर्ग सुई यङ सिह्‌नान मह्‌या, जेङ्नै त्युन जहाज मीपा राह्‌नान ङ्याह्। तैङर्‌वाङिन कन परमेस्वरन सिमि ङा जेङ्पा, रे सुन आराधना ङा खेनान, नुन दुतदी थ्याँ छान ङन रह्‌म्म च्याङ्बो। नुई ङा र्‌वाबो, ‘पावल, नङिना, ना कैसरन ङू तेम्मा च्याङ्चे जेङ्पा, रे सेह्‌ना, नान ङ्याबो त्युन जहाजग चप्नान भरी पुरून परान परमेस्वरजै नान लाह्‌ग बिम्पा ङ्याह्।’ अन्नकारन फुरी हो, हिम्मत ख्या। ङा परमेस्वरग बिस्वासन, ङा कुजु र्‌वापा ङ्याह्, ठिक्‌क मनलैम राह्‌नान ङ्याह्। जेङ्नै ङ्योअ चन कान तापुदीग ठ्वात्वानान ङ्याह्।”

जेङ्नै जब छान च्युल्‌लि रह्पा ङ्याह्, रे ङ्योअ एद्रियास समुन्द्रग हुत्ति रह्पा ङ्याह्, तब छानफेरा दोङा कुल्नानवजै ङ्योअग कान सान रह्‌म्म स्वातपा ङ्याह् र्‌वानान छोई खेबो, रे तिङ नापी खेखे सेन्तौ ख्युई मितर ङेथल क्युई रह्पा, रे ङाइ धेरा वैवै ह्‌याङ तिङ नापी खेखे सेन्तौ ख्युई सुमच्यु मितर हाकोबो। आलै कान लुङ्न लाह्ः फ्याङ ताप्नान कि र्‌वानान ङिनङिन, ख्युई त्युन जहाजन ङीक्याँलै लङ्‌गर ली पप्पो रे नाप रायो र्‌वार्‌वा सोअताप्मः जाःबो। जब नावीकाङ्मोः त्युन जहाजलै ज्यार्मः जाःपा ङ्याह्, रे ङूक्याँ लङ्‌गर पच्‌चेन बहानाजै दोङा समुन्द्रग साःतपा ङ्याह्, तब पावलजै अफिसर रे सिपाहीकाङ्मोः र्‌वाबो, “अन सिमिकाङ्मोः त्युन जहाजग मछ्युङ्‌ङिन ङेनकाङ्मोः सोन्नान मह्‌या।” तब सिपाहीवजै दोङान थाःपाभरी थुम्बो, रे दोङाः वैफाम्बो।

नम नाङ्मः जाःमी पावलजै सिमिकाङ्मोः “तयाः झाई त्वानान” र्‌वानान्न सल्‌ला भिनैभिनै र्‌वाबो, “ङेन छरान कारन झाई मझारे छ्युङ्पा च्युल्‌लिर्या रा तदँ। अन्नकारन तयाः झा र्‌वार्‌वा ङा ङेनकाङ्मोः छ्याःफुल्चे। तयाः झाङिन ङेन सोन्नान ङ्याह्।” अन ल्होई र्‌वामी नुई रोता झबो, रे पुरून ङू परमेस्वरग धन्यवाद फुलफुल अन क्युक्क्युई झाम जाःबो। तब ख्यु पुरूजै हौसला देद्दे तयाः झायाप झबो। त्युन जहाजग ङिह्पा ङ्योअ पुरू क्याम ङेह् रै फेराङलिथल रे रु सिमि ङ्याह्। ख्युई बरङबरङ झामी, त्युन जहाज भोङ्म दोङ्म समुन्द्रग रुन्जन पप्पो।

त्युन जहाज मीपा रह्पा

नाह्प रामी ख्युई समुन्द्रन कान नाः रङ्बो, जेङ्नै त्युन जहाज कुल्नानवजै मन थाउँ स्योः मतैबो। नाः थाउँ सम्म रङरङ ख्युई त्युन जहाजग स्याह्ई वच्‌चेन नावा खेबो। ख्युई लङ्‌गरव साःबो, रे मन समुन्द्रगै लुईफाम्बो। मन्नै भेला पतवारकाङ्मोः खीपान रूव फोल्बो। ङूक्याँन पाल सोलसोल लनक्याँ होल्बो रे त्युन जहाजग नाक्याँ वप्पो। जेङ्नै त्युन पोँ पेर्पा पेह्‌मान रासो त्युन जहाज ठ्वाठ्वा स्याह्ई मीपा रह्बो, त्युन जहाजन ङूस्योवान भाग खल्बो रे गुलै मतैबो, आलै ङीस्योवान भाग चन छ्योलापवन तोपजै क्युप्मः जाःबो।

झ्यालखानाः त्यापा सिमिकाङ्मोः पौरी फ्याङफ्याङ ज्यार्दरा कि र्‌वार्‌वा छुछु सिपाहीवजै ख्युकाङ्मोः सच्‌चेन सम खेबो। जेङ्नै अफिसरजै पावलग सोमफान्सुम खेखे ख्युकाङ्मोः उजु खे मफाम्बो। पौरी फ्याङ तैनान पुरू त्युन जहाजलै पहिली बोरबोर नाः स्वा र्‌वानान आदेस नुई बिम्बो, लाःमा रह्पाकाङ्मोः चन पाँलेपवग रे त्युन जहाजन तुकरावग धेँ वैचे र्‌वाबो। झामखेखे पुरू सुरछित नाः ताप्पो।

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.