Skip to content
BibleKenya

Kaike Standard Traslation

प्रे 26

अग्रिपासन ङू पावल

अग्रिपासजै पावलग र्‌वाबो, “नाः जेँन भारेः र्‌वाचेन अनुमति ङ्याह्।” तब जेँन लाह् क्याङक्याङ पावलजै जेँन सुरछ्यान भिह्तु र्‌वामः जाःबो:

“हे झली अग्रिपास, यहूदीवजै ङा बिम्पा दोस पुरून भारेः त्या नान ङू ङै जेँग बचाई खेचेन भिह्तु ल्होई र्‌वाचे देत्तौ ङा जेँग सोरे छुनान। नाः यहूदीवन ल्हूलाम पुरू रे खाथू खेनान ल्होईवन भारेः लः खेखे क्युई रह्पान कारन ङा जेँग झन भाग्यमानी छुनान। उजु राह्‌राह्‌ ता नाः छ्याःफुल्चे, ङन ल्होई स्हेः र्‌याङ्म खेखे ङ्याना।”

“जेँन सिमिन घूँ ङन देस रे यरूसलेमग सुरुलै बिताई खेपा ङन छबा रातौलैन ङन चाल चलन यहूदीकाङ्मोः क्युई ङ्याह्। लैः ङूलै ख्युकाङ्मोः क्युई रह्पानै ल्होई जेङ्पा, कि ङिन धर्मन पुरून खेरे करा पन्थी पातिन अन्सार ङै फरिसीदी राह्‌राह्‌ जिन्दगी चलाई खेपा ङिह्पा। ख्युई चाहि खेङिन अन ल्होईन साँचि भिन तैनान ङ्याह्।1 परमेस्वरजै ङिन खेपुलकाङ्मोः रेनरुपा ङै आस नाम्पान कारनजै त्या ङा अन मुद्दाग च्याङ्पा ङिह्पा। च्योङेपाई कुल ङिन सिमिवजै अन आस देच्‌चेन भिह्तु ङिम्मेछाम्मे ती समजै परमेस्वरन आराधना खेँ, रे अन आसन पत, हे झली, यहूदीवजै ङा दोस बिम्पा ङ्याह्। परमेस्वरजै न्यायग सिह्पाकाङ्मोः सम्पु ग्युर्फान्नान र्‌वानान्न ल्होईग ङेनको तैङ बिस्वास मखेनान?”

“नासरतन येसुन मिह्‌न्न बिरोधग कारबाई लै खेत्वानान र्‌वानान ङह् र्‌वार्‌वा बिस्वास ङिह्पा,2 ङै यरूसलेमग उजुई खेपा, रे ङोत्वा पुजारीव लम आङ देद्दे लै परमेस्वरन पबित्र सिमिकाङ्मोः ङै झ्यालखानाः कपा मात्र नङ्पा, जेङ्नै ख्युकाङ्मोः सत्तौ ख्युनै बिरोधग ङै ङन भोत यङ बिम्पा। आलै पुरू यहूदीवन आराधनालय ख्युकाङ्मोः घरिघरि सजाय बिमबिम ख्युकाङ्मोः बिस्वास ख्योवा फान्चेन प्रयास खेँ। ख्युन बिरोध सुतूतू खोलोःन सहरवगै ङै ख्युकाङ्मोः तेपफाम्पा।”

पावलजै जेँन सम लःरितपा भारेः र्‌वापा

(प्रे ९:१-१९; २२:६-१६)

झामखेखे ङोत्वा पुजारीकाङ्मोः लम आङ रे आग्या पत्र देद्दे ङा दमस्कसक्याँ वैपा। हे झली अग्रिपास, ङिह्‌मास्यार्मी लमग ङै स्वर्गलै ङिह्‌मा खेरै साल्म ताह्‌म रङ्पा, जो ङा रे ङन ङ्याबो लेन्नानवन लिब्रुङक्याँ चम्की रह्पा ङ्याह्। जब ङ्योअ पुरू सा घ्यापा ङ्याह्, तब हिब्रु ल्होईग ङा झाम र्‌वापा केह्ः ङै ताह्पा, “साऊल, साऊल, ना तैङ ङाः तेपफान्नान? छाम पेर्गाः लात्ती फ्याङ्तौ नाः र्‌वार्‌वा खङ्नान।” “आलै ङै र्‌वापा, ‘हे प्रभु, ना सु जेङ्पा?’ प्रभुई ङा र्‌वाबो, ‘ङा येसू जेङ्पा, सु ना तेपफाम्बो। ता च्याँ, ङा नाः ङन सेवक रे ङन साँचि बिन्नान्न सिमि दोङ्सुम ङिह्पा। अन्नकारन ङा नान स्याह् रङ्पा जेङ्पा। नाई ङन भारेः रङ्पान ल्होई रे ङै नाः ङिक थन्नान्न ल्होईव यङ घङ सिमिकाङ्मोः स्यात्त्वानान। ङा ना नान जेँनै इस्राएल रे यहूदीन खोलोःन सिमि लम छुतकरा बिन्चे, सुन स्याह् ङा ना फेच्चे,3 कि नाई ख्युन मी पोवा, रे ख्यु नाःतुमालै ज्योतिक्याँ, रे सैतान्न सक्तिलै परमेस्वरक्याँ होला। झामखेखे ख्युई तीपान माफ देन्नान ङ्याह् रे ङन ङ्यान बिस्वास लम पबित्र रह्पावन ठाउँ ख्युई र्‌वार्‌वा देन्नान ङ्याह्।’4

पावल जेँन सेवाकाईन भारेः र्‌वापा

“अन्नकारन, हे झली अग्रिपास, स्वर्गन दर्सन लाह्ः ङा मङ्यानङ्यान छ्युङ मतैबो। जेङ्नै पहिली दमस्कसग, तब यरूसलेमग रे पुरू यहूदिया देसभरि छ्युङ्नानकाङ्मोः, रे यहूदीन खोलोःन सिमिकाङ्मोः र्‌वार्‌वा जेँन तीपालै घ्योप्पा खेखे परमेस्वरक्याँ होला रे जेँन घ्योप्पा जैनान्न धोन ख्या र्‌वार्‌वा ङै ताह्फेप्पा।5 अन ल्होईवन कारन कान यहूदीवजै जब ङा आराधनालयग ङ्याह् स्या जुङ्जुङ् सच्‌चेन हिम्मत खेबो। त्यान दिन्न बेर परमेस्वर लम ङै फुरी देप्पा ङिह्पा। अन कारनजै किम छ्युम ङ्योरुमग साँचि भिनैभिनै ङा स्यीह् च्याङ्पा ङिह्पा। भबिस्यबक्तावजै रे मोसाई र्‌वापा केह्ः तेम्माई पुरा राह्‌नान र्‌वानान ल्होई नङ्म ङै घङ तये र्‌वापा मया। ख्युई र्‌वापा ङ्याह् कि मसिहजै तूरि हुरत्वानान, रे सिपालै सम्पु ग्युर्पा ङूस्योवा राह्‌राह्‌ नुई यहूदी रे यहूदीन खोलोःन सिमिकाङ्मोः उद्धार ताह्‌मन घोसना खेनान ङ्याह्।”6

पावलजै जेँन सोमफान्चेन भिह्तु अन ल्होईव र्‌वातौ फेस्तसजै केह्ः किमः र्‌वाबो, “ए पावल, ना युङ्पा जेङ्पौ, नान लै बुद्धिजै ना युङ्पा दोङ्पा ङ्याह्।”

पावलजै र्‌वाबो, “माननीय फेस्तस, ङा युङ्पा नङ्पा, ङा लः ङिह्पा रे तेम्मान ल्होईव र्‌वानान। तैङर्‌वाङिन झली जेँगै अन ल्होईन भारेः क्युई ङ्याह्, सुन ङू ङा किम्म खेखे ल्होई र्‌वायङ ङिह्पा। तैङर्‌वाङिन अन ल्होई तये नुनलम पेर्पा मह्‌या। अन ल्होई फाक र्‌वापा नङ्पा। झली अग्रिपास, तै नाई भबिस्यबक्तावन लाह्ः बिस्वास खेनौ? ङा स्योःनान, नाई बिस्वास खेनान।” अग्रिपासजै पावलग र्‌वाबो, “तै अकेः ङाई भेला लै ना ङा इसाहि दोङ्सुम ङिह्पाऊ?”

पावलजै झब बिम्बो, “भेला ङाई रा या र्‌याङ्म ङन परमेस्वरग अन सोअताप ङिह्पा कि साँगलव नङ्म ना रे त्या ङन ल्होई ङ्यान्नान सिमि पुरू ङालैम राःयो।” तब झली, सासक, बरनिकी रे स्या छ्युङ्नानकाङ्मोः भरी पुरू च्याङ्बो। तब ख्यु गेप्मी राह्ङराङ्साः झाम र्‌वातौ ल्होई र्‌वाबो, “अन सिमिजै सच्‌चेन धल देन्नान आथबा झ्यालखानाः वैत्वानान लैम धोन तये खेपा मया।” अग्रिपासजै फेस्तसग र्‌वाबो, “अनजै कैसरन ङ्याबो निबेदन खेपा राङिन ता अन सिमि ख्योवानै राह्‌नान ङ्याह्।”

Source notes (6)
  1. Cross-reference प्रे २३:६; फिलि ३:५
  2. Cross-reference प्रे ८:३; २२:४-५
  3. Cross-reference १ इति १६:३५
  4. Cross-reference कानुन ३३:३-४; यसै ३५:५-६; ४२:६; ४२:१६; ६१:१
  5. Cross-reference प्रे ९:२०; ९:२८-२९
  6. Cross-reference यसै ४२:६; ४९:६; १ कोर १५:२०

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.