Kaike Standard Traslation
प्रे 25
सम्रातन ङू पावलन छ्याफुल
फेस्तस जेँन प्रदेसग स्वापा सुमङीन ङिक कैसरियालै यरूसलेमग स्वाबो। ङोत्वा पुजारीव रे यहूदीवन ङोत्वा सिमिवजै पावलन बिरोधग दोस बिम्बो, रे नु लमगै सच्चेन सदेन्त्र दोङ्दोङ पावलग यरूसलेमग सपफान्चेन दया राःयो र्वार्वा छ्याःफुल्बो। जेङ्नै फेस्तसजै पावल कैसरियागै झ्यालग नाम्पा, रे नह् खम्म वैचेन सम रह्पा ल्होई र्वाबो। नुई र्वाबो, “अन्नकारन ङेनकोन बर्ग अगुवाकाङ्मोः स्याह् ङन ङ्याबो कैसरियाग वयाःयो, रे मन सिमी तयाः अलः राङिन नु दोस बिना।”
ख्युन घूँ नु केर्या-च्युर्या खेरे ह्याल्म मछ्युङ्रे कैसरिया होल्बो, रे मन्नै नाप्चेरा न्याय आसनग छ्युङछ्युङ पावलग सच्चेन आदेस बिम्बो। पावल स्वामी यरूसलेमलै स्वापान यहूदीव नू लिब्रुङक्याँलै क्योरक्योर राँसा राँसान दोस गम्भिर बिम्बो, कन्न ख्युई पर्मान भिन मतैबो। पावलजै जेँन पछेग ल्होई र्वायङ र्वाबो, “ङै यहूदीवन कानुन्न बिरोधग, आराधनालयन बिरोधग, रे कैसरन बिरोधग अपराध तये खेपा मया।”
जेङ्नै फेस्तसजै यहूदीकाङ्मोः स्याङ्फान्चेन भिह्तु पावलग र्वाबो, “तै ना यरूसलेमग वैवै स्याह् ङन ङू अन ल्होईन भारेः न्याय ख्याःयो र्वानान्न इच्छ्या खेनौ?”
जेङ्नै पावलजै र्वाबो, “ङा कैसरन न्याय आसन्न ङू च्याङ्पाई छ्युङ्पा ङिह्पा, खाः ङन न्याय रात्वानान। यहूदीकाङ्मोः ङै अलः तये खेपा मया, अन ना लः खेखे क्युई ङ्याह्। यदि ङा अपराधी जेङ्पा, रे ङै सिचेन धल देच्चेन सम स्योरस्योरलैमन धोन खेपा राङिन सोन्चेन लाह्ई ल्होई मर्वाचे। जेङ्नै यदि अजोवजै ङा बिम्पान दोसग तेम्मा मराङिन ङा अजोवन लाह्ग सुई र्वार्वा बिनमतैनान। ङा कैसरन ङ्याबो निबेदन खेचे।”
तब फेस्तसजै सल्ला खेनानवन ङ्याबो सल्ला खेखे र्वाबो, “नाई कैसर ङ्याबो निबेदन खेपा, ना कैसर ङ्याबोई वैनान।”
अग्रिपास रे बरनिकीन ङू पावल
खजिर्या वैतामी फेस्तसग छ्याःफुल्म झली अग्रिपास रे बरनिकी कैसरिया स्वा ताप्पो। ख्यु स्याह् खजिर्या छ्युङ्मी फेस्तसजै पावलन ल्होई झलीन ङू झामखेखे स्याप्पो, “स्यीह् फेलिक्सजै झ्यालखानाः त्याःपान सिमिदी ङ्याह्, सुन भारेः, ङा यरूसलेमग रातौ, ङोत्वा पुजारीव रे यहूदीवन ताङ्बोन अगुवावजै नुन बिरोधग दोस बिमबिम नु धल बिनत्वानान र्वार्वा छ्याःफुल्पा ङ्याह्।” “दोस देप्पान सिमिजै दोस बिन्नान सिमिवन ङ्याबो ङू मर्हारे, रे जेँन बिरोध देप्पा दोसन भारेः र्वानान मौका मदेङ्ङिन सिमि सुई भाछ्योवा धलन आग्या बिन्नान रोमीवन ल्हूलाम मया र्वार्वा ङै ङेनकाङ्मोः झब बिम्पा। जब ख्यु जोमजोम स्यीह् स्वापा, ङै पुल्म मखेरे नाप्चे न्याय आसनग छ्युङछ्युङ ना हाजिर खेफान्नान आदेस खेबो। जब बैरीव च्याङ्पा ङै छुपालैम नुन मुद्दाग तये अलः ल्होईवन दोस ख्युई सप्मतैबो। जेङ्नै ख्युन भेदभाव चन ख्युनै धर्मन भारेः रे सितपा येसुन भारेः जेअँ, सू पावलजै चन हेँ सम्पु ङ्याह् र्वार्वा दाबि खेँ। अन ल्होईन भारेः ङै ता तये लोच्चे खेई मतैपा। उजु राह्राह् ङै नू ‘यरूसलेम वैवै नान न्याय स्याह्ई खेन राङिम कि’ र्वार्वा लोप्पा। जेङ्नै पावलजै सम्रातन फैसला मर्हान बेर झ्यालखानागै नाह्ना र्वार्वा निबेदन खेपा रामी नु कैसरन स्याह् मफेन्नान्न बेर लः खेखे सेन्चे ख्या र्वार्वा आदेस बिम्पा।”
तब अग्रिपासजै फेस्तसग र्वाबो, “अन सिमिन ल्होई ङह् ङ्यानसुम खेनान।” आलै नुई र्वाबो, “नाप्चे नाई ङ्याना।”
नाप्चे अग्रिपास रे बरनिकी मिह्दा खैकि खेखे सेनापतिव रे सहरन ङोत्वा पुजारी सिमिवन ङ्याबो जोमपू जाःबो। आलै फेस्तसन आदेस देद्दे पावलग सप्पो। फेस्तसजै र्वाबो, “झली अग्रिपास रे ङिन ङ्याबो स्यीह् स्वापा स्योनान्न सिमि पुरू हो, यहूदी पुरूवजै ङन स्यीह् उजुरी खेपान सिमि अनै जेङ्पा। अन सिमी सह्त्त्वानान अन सोन्चेन सम स्योरस्योर लैम मह्या र्वार्वा यहूदी पुरूवजै यरूसलेमग रे स्यीह् कैसरियाग र्वार्वा र्वाङ। जेङ्नै सच्चेन धल देत्त्वानान अनजै तये खेपा ङै मदोपा राह्राह् रे अन जेँजै र्वार्वा सम्रातन ङ्याबो निबेदन खेपा रामी ङै अनग फेच्चेन निर्नय पक्का खेपा। अन्न भारेः ङै ङन सम्रातग सर्नान ङोत्वा ल्होई तये मीपा। अन्नकारन ङै अनग ङेनकोन ङू, रे ङोत्वा खेखे, हे झली अग्रिपास, नान ङू सप्पा ङिह्पा, रे ङी अन्न छोए सेह्म्मी हालम ङै तये सर्चेन ल्होई देन्नान ङ्युँ। तैङर्वाङिन झ्यालखानाः त्यापा सिमिन बिरोधग पक्का दोस मथनरे नू फेम्मः ङा लः लाई मराँ।”
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.