Kaike Standard Traslation
प्रे 24
पावलन बिरोधग मुद्दा
ङार्यान ङिक प्रधान पुजारी हननिया रे कान ताङ्बोन अगुवाकाङ्मोः, तर्तुल्लस मिह्न्न वकिलदीन ङ्याबो कैसरीयाग स्वाबो, रे ख्युई पावलन बिरोधग सासक फेलिक्सन ङू मुद्दा पेस खेबो। पावलग स्याह् सम्मी तर्तुल्लसजै नू झाम र्वायङ दोस बिम्म जाःबो, “मिह्दा माननीय फेलिक्स, नानलम ङ्योअजै किम्म किम देप्पा ङिह्पा, रे नाई अन देसन भिह्तु लै सुधारव सुरु खेपा ङ्याह्। अन ल्होई हरप्रकारजै ठाउँ पुरूग ङि घूँ खेखे स्वीकार खेनान। जेङ्नै नान भेला ह्याल्म मवव्वै ङ्योअन छ्याःफुल ङाई दया खेखे ङ्याना। तैङर्वाङिन ङी अन सिमि खातत्त्या तूरि बिमबिम लेन्नान, सन्सारभरीन यहूदी पुरूवन घूँ आन्दोलन मच्चाई खेनान, रे नासरी पातीन ङोत्वा अगुवान रुपग दोपा ङ्याह्। अनजै आराधनालय अपबित्र दोङ्चेन हिम्मत खेपा ङ्याह्, जेङ्नै अनग ङ्योअजै जुङ्पा। ङिन ल्हूलाम अन्सार धल बिम्पा राङिम, जेङ्नै सेनापति लुसियसजै ङिन स्याह् स्वास्वा मिह्दा हलजफत खेखे नू ङिन ल्हालै तलतल वप्पो, ता नजै अन्न छोए सेम्पा ङ्योअजै अनग बिम्पान दोसन अन ल्होई पुरू नुन लम क्युई रा तैनान।” मन यहूदीवजै र्वार्वा अन ल्होईव पुरू तेम्मा जेङ्पा र्वार्वा दीबो।
फेलिक्सन ङू पावलजै झब बिम्पा
सासकजै पावलग र्वाचेन लाःता खेतामी पावलजै झब बिम्बो, “लै परालै ना यहूदी जातिन न्यायधीस रह्पान ल्होई क्युई राह्राह् ङा जेँन भिह्तु ल्होई र्वाचे देद्दे स्याङ्पा ङिह्पा। नाई क्युई रा तैनान कि ङा यरूसलेमग आराधना खेमः वैपा दिन च्योङे खेरे ह्याल्म रह्पा मया। अन यहूदीव सुई ङाः दोस बिम्बो ख्युई ङाः आराधनालयग सुई ङ्याबो खाथू खेपाई छ्युङ्पा मधोबो। रे अजोवजै आराधनालयग या यहूदी आराधनालय आथबा सहरग जन्ताः बर्ग जाःजाः उल्बाङ खेफाम्पा यङ मधोबो। न ता ङा हेँ दोस बिम्पा ल्होईवन अजोवजै पर्मान बिनतैनान। जेङ्नै अन ल्होई चन ङा र्वाचे, कन मुक्ति देन्नान्न लमग ख्युई लबार र्वाङ, मनै लम्न ङिक जाःजाः ङा ङिन खेपुलन परमेस्वरन आराधना खेचे। जेङ्नै भबिस्यबक्तावजै सर्पान पबित्रसास्त्र रे मोसाई बिम्पान कानुन पुरु ङा बिस्वास खेचे। धर्मी रे पापीव ङ्योरुम सिपालै सम्पु ग्युर्नान र्वानान अजोव जेँजै स्वीकार खेपालैम ङा परमेस्वरग आस नान्नान।1 अन्नकारनजै ङा एकुरो परमेस्वर आलै सिमिवन ङू जेँन बिबेग प्रयास खेनान कन ङन बिस्वासग ल राह्नान।
“ता ङाई परान ङिक जेँन सिमिन भिह्तु दान रे भोकान भेती फुल्मः ङा यरूसलेमग स्वापा ङ्याह्।2 अजोवजै ङाः आराधनालयग दोतौ छाङ्म राचेन कानुन ङै पुरा खेतपा ङ्याह्, स्याह् मोङ सुई मया, फाईरा यङ मया। जेङ्नै स्याह् एसिया प्रदेसन कान यहूदीव ङ्याह्, ख्यु स्यीह् नान ङू स्वानान ङ्याह्। ङन बिरोध यदि तयाः र्वानान ल्होई राङिन ख्युई दोस बिनतैनान। आथबा अन सिमिवजै नह् स्याह् र्वाःयो, ङा किम जोम्पान ङू च्याङ्तौ ङन स्याह् दोस तये देप्पा मया? केबल अनै ल्होईदी मात्र जेङ्पा, कन ङै ख्युन घूँ थाङथाङ फाईरा खेखे र्वापा ङ्याह्, ‘सिह्पाव सम्पु ग्युर्नान र्वानान्न बिसयग त्या ङेन ङू ङन मुद्दा चलि रह्पाई ङ्याह्।’”3
अन लम्न बिसयग फेलिक्सग र्वापालैमन ग्यान रह्पा रह्पान कारन नुई अन ल्होईव ताह्मी ख्युकाङ्मोः झाःम र्वार्वा तारि खेखे फेप्पो, “सेनापति लुसियस स्यीह् स्वामी ङा ङेनकोन मुद्दा फैसला खेनान ङ्यु।” तब नुई पावलग सेन्चे लः खेखे नाह्नाःयो रे नू तयाः स्वतन्त्र भिनाःयो, आलै नू त्वायाप साःनान्न फुरीकाङ्मोः चन नकाः र्वार्वा सेनान्न अफिसरग आग्या बिम्बो।
पावल फिलिक्स रे द्रुसिल्लान ङू
खजिर्यालै फेलिक्स नुन यहूदी मिसा द्रुसिल्लाग ङ्याबो सस्सै स्वाबो, रे नुई पावलग घ्वाघ्वा मसिह येसुन ङ्यान बिस्वासन भारेः नुनलम ताह्बो। पावलजै परमेस्वरन इच्छ्या, स्हेः र्याङ्म रे स्वानान्न न्यायन भारेः ल्होई र्वातौ फेलिक्स आत्ती रह्पा, रे झाम र्वाबो, “चोँ वया, मौका देप्पान भेला ङा नाः स्वा र्वाच्योवा।” पावललम कार्तौ सोह्ङ देङ्ङिम कि र्वार्वा आस यङ खेपा ङ्याह्। अन्नकारनजै र्वार्वा नुई ना कार्तौकार्तौ घ्वाघ्वा ल्होई र्वाङ।
जेङ्नै ङे परान ङिक जब फेलिक्सन थाउँग पर्किअस फेस्तस स्वाबो, तब फेलिक्सजै यहूदीकाङ्मोः स्याङ्फान्चेन भिह्तु पावलग ज्यालग नान्नान होई।
Source notes (3)
- Cross-reference दान १२:२
- Cross-reference प्रे २१:१७-२८
- Cross-reference प्रे २३:६
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.