Kaike Standard Traslation
प्रे 23
पावलजै यहूदी जोम्पु लिबरुङक्याँ सेनसेन र्वाबो, “थिक्कोव हो, त्यान बेर जिन्दगीन यात्राग ङै ङन बिबेग्ग परमेस्वरन ङू छाङ्म नाम्पा ङिह्पा।” अन ल्होईग प्रधान पुजारी हननियाजै पावलन रह्म्म थाङ्थाङ् छ्युङ्नानकाङ्मोः खापराः फ्याँ र्वाबो। तब पावलजै नू र्वाबो, “हे चुना छिम्पान पेः! नाः र्वार्वा परमेस्वरजै फ्याङ्नान ङ्याह्। ना कानुन अन्सार ङन न्याय खेमः छ्युङछ्युङ तै कानुन्न बिरोधग ङाः फ्याँ र्वानौ?”1
आलै पावलन रह्म्म थाङ्थाङ् छ्युङ्नानवजै र्वाबो, “तै ना परमेस्वरन प्रधान पुजारीन माबि पन्नौ?” तब पावलजै र्वाबो, “इस्राएली भाइ हो, ना प्रधान पुजारी जेङ्पा र्वानान ङाः क्युई मया। तैङर्वाङिन पबित्रसास्त्रग सर्पा ङ्याह्, ‘नाई जेँन जनतान हाकिमग अलः ल्होई नर्वाःयो’।”2 जेङ्नै मन यहूदी जोम्पू पातीदी सदुकी रे घङ पाती फरिसीव जेअँ र्वानान क्युई राह्राह् पावलजै केह्ः किमः र्वाबो, “इस्राएली भाइ हो, ङा ता फरिसीवन ङोह्जो फरिसी यङ जेङ्पा। सिह्पावन आस रे सिपालै सम्पु ग्युर्नान्न कारन ङन मुद्दा चलि रह्पाई ङ्याह्।”3
नुई झाम र्वामी फरिसीव रे सदुकीवन घूँ सल्ला मदीनान रह्पा, रे मोङग भाचे रह्पा। तैङर्वाङिन सदुकीव र्वानान, कि सिपालै सम्पु ग्युर्नान, स्वर्गदुत, आत्मा र्वानान तये मीपा। जेङ्नै फरिसीव मन पुरू ङ्यान्नान।4 स्याह् किम फाईरा रह्पा, रे फरिसी पातीन कान कानुन लन्नान्न सिमिव च्याङच्याङ झाम र्वायङ खाथू खेमः जाःबो, “अन सिमिन स्याह् ङि तये अलः मदेन्नान। यदि आत्मा आथबा स्वर्गदुतजै नू झाम र्वापा जेङ्न तै?”
स्याह् लै सोच मदीनान रामी ख्युई पावलग छम कर्दरा र्वार्वा ङिनङिन सेनापतिजै सिपाहीकाङ्मोः पोँ वैवै नू ख्युन घूँलै हलजफत खेखे सस्सै ब्यारेकन झिङ होरायो र्वार्वा कोह्बो।
नाप्चे छान्जे प्रभुई नुन रह्म्म थाङ्थाङ् छ्युछ्यु र्वाबो, “हिम्मत ख्या, पावल, तैङर्वाङिन कुजुई नाई यरूसलेमग ङन भारेः बयान बिम्पा, उजुखेखे नाई रोमगै साँचि बिनत्वानान।”
पावलग सच्चेन सदेन्त्र
नाप नम नाङ्मी यहूदीवजै राह्ङराङ्साः मोङ रूरू पावलग मसच्चेन बेर तये मझानान रे मथुङ्नान र्वार्वा रेनरुबो। अन सदेन्त्र खेनान सिमिव ङेथलन खेरै ह्याल्म ङ्याह्। अजोवजै ङोत्वा पुजारीकाङ्मोः रे अगुवावन स्याह् वैवै र्वाबो, “पावलग मसच्चेन थाल ङि तये झानान मह्या र्वार्वा ङ्योअजै पक्का रेनरुपा ङिह्पा। अन्नकारन ङेनकाङ्मोः रे यहूदी जोम्पुन सिमिव दीदी सेनापती निबेदन भिना, रे नुन मुद्दान निर्नय हेँ लः खेखे खेत्वानान र्वानान बहाना दोङदोङ नू स्वा र्वा। आलै अन स्याह् स्वालुङ्मीम ङि नु सच्चेन भिह्तु तयारग छ्युङ्नान।”
ता पावलन तिन ङोह्जोई अन सदेन्त्र हाकोको ब्यारेकन झिङ वैवै पावलग र्वाबो। तब पावलजै सुबेदारकाङ्मोः बर्ग ती सिमि घ्वाघ्वा र्वाबो, “अन छबा अफिसरन ङ्याबो होरा, तैङर्वाङिन अन नु तयाः र्वाचेन सम खेँ।” अन्नकारन नुई नु वव्वै सेनापतिन ङ्याबो फेप्पे र्वाबो, “बन्दी पावलजै ङा घ्वाघ्वा अन चोलोङ्चाः नान ङ्याबो होरा र्वापा ङ्याह्, ना र्वाचेन तयाः ल्होई ङ्याह्, रु।”
सेनापतिजै नुन लाह् जुङ्जुङ् तीक्याँ वव्वै फाक लोप्पो, “नाई ङाः र्वानान्न ल्होई तै जेङ्पा?”
नुई र्वाबो, “यहूदीवजै पावलन भारेः हेँ लः खेखे लोच्चे खेनान बहाना खेखे नाप्चे नु यहूदी जोम्पु सर्हा र्वार्वा नान ङ्याबो अनुरोध खेनान सल्ला खेपा ङ्याह्। जेङ्नै नाई ख्युन ल्होई नङ्याना, तैङर्वाङिन ख्युन बर्ग ङेथल खेरै ह्याल्म सिमिवजै नु मसच्चेन बेर तये झाचे थुङ्चे मखेनान्न रेनरुरु नु सच्चेन भिह्तु कुकु छ्युङ्पा ङ्याह्, रे ता ख्यु नान बचन्न आस खेखे तयारग ङ्याह्।”
अन्नकारन सेनापतिजै मन चोलोङ्चा झाःम र्वार्वा आग्या बिमबिम फेप्पो, “नाई ङा अन लोन बिम्पा ल्होई सुई नर्वा।”
पावलग कैसरिया फेप्पा
मन्न छाम्म नुई अफिसरवन बर्ग ङे सिमि घ्वाघ्वा र्वाबो, “त्या छान नौ बजेरा क्याम ङेह् सिपाहीकाङ्मोः, फेराङलिथल ताः चपचप रे क्याम ङेह् दुङ जुङ्पाकाङ्मोः कैसरियाथाल वैमः तयार दोङदोङ नाना। आलै पावलन भिह्तु यङ तान ब्यबस्था ख्या, रे नू सुरछित सासक फेलिक्सन स्याह् साह्।” नुई झाम पत्र यङ सर्पा: “माननीय सासक फेलिक्सग, क्लौदियस लुसियस स्हीम ङिह्पाऊ! अन सिमी यहूदीवजै जुङजुङ सह्म्मः जाःपा ङ्याह्, जेङ्नै अन रोमी सिमि जेअँ र्वानान ङाः क्युई राह्राह् फौजन ङ्याबो स्याह् ताप्मी अनग फापा। कन आरोपग ख्युई अनग दोस बिम्पा जेअँ र्वार्वा स्योःनान समजे ङै अनग ख्युन यहूदी जोम्पु सप्पा। ख्युई कानुन्न प्रस्नन भारेः अनग दोस बिम्पा जेअँ। जेङ्नै ङै सच्चेन धल आथबा झ्यालखानाः काचे लैमन दोस तये मदेप्पो। अन सिमिन बिरोध सदेन्त्र रातौ ङ्याह् र्वानान ल्होईन लोन ङा बिम्बो, रे अनग तुरुन्तै नान ङू फेप्पा ङिह्पा, रे अन्न बिरोध दोस बिन्नानकाङ्मोः र्वार्वा नान ङू बयान बिना र्वार्वा आदेस खेपा ङिह्पा।”
अनजै आग्या देप्पा अन्सार सिपाहीवजै पावलग छानै एन्तिपात्रिसग साबो। ता चप्पान सिमिकाङ्मोः नुन ङ्याबो वैमः स्याह्ई ख्योवाख्योवा घङ्न लाह् ख्यु यरूसलेम ब्यारेकक्याँई होल्बो। कैसरियाग ताप्मी ख्युई सासकग हिगा बिमबिम पावलग र्वार्वा नुन ङू साबो। सासकजै हिगा तोअमी नु कन प्रदेसन जेङ्पा र्वार्वा लोप्पो। नु किलिकियान जेङ्पा र्वार्वा क्युई रामी नुई र्वाबो, “ना दोस बिन्नानकाङ्मोः स्वा ताप्मी नान मुद्दा ङ्यान्नन ङ्याह्।” आलै नुई नु हेरोदजै दोङ्पा दरबारग नाह्ना र्वार्वा आदेस बिम्बो।
Source notes (4)
- Cross-reference मत्ती २३:२७-२८; लेवी १९:१५; यहो १३:१०-१५
- Cross-reference प्रस २२:२८
- Cross-reference प्रे २६:५; फिलि ३:५
- Cross-reference मत्ती २२:२३; मर्क १२:२८; लुक २०:२७
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.